Tulaai Leitung Thuthang Tuamtuam Updates June 14, 2015

·      US gam  Texas state Dallas khuapi sung a om Palik zumpi maai ah migilo khat in June 13, 2015 ni in Bomb khat koih in tuahit ciang ataaikhawm in Palik zumpi thautawh bankaap gawp hi. Palik ten zong umcihpah zitizit uha, Migilo pa sialtalkap kaplumpah uhhi. Migilopa kua hi a banghang cihte akansan laaitak uh ahihi. BBC

·      2016 US President demding in Democratic pan Pi Hillary Clinton kum 67 in mipi maai ah amasapen thugenna  Mee tangzon na New York City’s Roosevelt Island ah June 13, 2015 ni in nei a amah adeih mipi atul tampi ten muakzihziah uhhi. US gamsung ah aomngeinaailo Numei President omsak in tangthu lamdang konggelh khiading ci in awng liahliah hi. Pinu peen 1947 kum in Chicago khuapi pan suak a, 1973 kum in Yale University pan Law tawh sangman hi. 1975 kum in Bill Clinton tawh pumkhat suak uha, 2000 kum in New Yoke state senator ding in teelna ngah hi. 2008 kum President ademleh lel sawnsawn ahihman in 2009-2013 kum sung Secretary of State in President Obama in teel hi. Democratic party pan 2016 President demding a ataangko mi 4 phata a, Republican pan 10 phata hi.BBC

·      Pakistan gam nitumna saklam Afghanistan tawh gamgi dung ah Pakistan gaalkaapten migilo benna June 13, 2015 ni in nasiatak in nei uha, migilo mi 20  thatlum hi ci in Pakistan gaalkaap ten taangkokhia uhhi.VOA

·      Afghanistan gam Helmand Province sung ah Taliban migilo te in Afghanistan palik te June 13, 2015 ni in nabuksim in nakap uh ahihman in Afghanistan palik mi 17 that ci in Afghanistan thunei te in taangkokhia uhhi.VOA

·      South Korea gam ah MERS natna lungno hang in June 13, 2015 niciang misi 14 cingto ta a, natna ngah mi 145 ciang tungto ta hi ci in South Korea thunei te in taangkokhia uhhi.BBC

·      US ten IS migilo te August 8,2014 pan June,2015 ciang asumzat uh $2.74billion cingta a, Nikhat bekbek in Gaalvanleeng ah $5million, Thau tang ah 2.1million, Tembaw ah $0.1million, Gaalkaap te khasum leh azat $1.9million hi avekpi gawm nikhat asumzat uh $9.1million tung cizen hi. Abeizah leh anasepna uh ki tawikhai kimlo ci in buaipian citcit ta uhhi.BBC

·      Singapore gam a kibawl Sea Game Tukpeeng kimawlna Semi Final ah Vietnam leh Kawlgam kisui a Kawlgam in 2:1 tawh zo uh ahihman in Final kahta uhhi. June 15,2015 ni zingsang nai 8 ciang Thailand tawh Final kisui ding uhhi. VOA ( Tutung Sea Game tukpeeng kisuihna  President U Thein Sein in a inn pan na en a, pianthak na lianpi ngah hi. Kawlgam pan Tukpeeng suite hanciamna amuhciang, banghang in hihten hizah a hahkat hiam ci in atal guaisak in angaihsut leh Kawlgam min ngahding adeihna uh a itna uh hi ci mukhia ahihman aw hihzah a Tukpeeng kisui lel ten gam le minam it a banghang in kei mipil lawmlawm in neektum mangding ngaihsun kahiam ci in Pianthakna lian pi ngah hi. ) Hih bel kei phuahsak hi sam ee

·      Kokant gaalkaap MNDAA te leh Kawl gaalkaap te kha 4 sung nasiatak akikap khit ciang June 10 ni in Kokant lampan gaalkikaapna kakhawl uh ci in taangkokhia himah leh June 12,13 ninih sung Kokant te gaalphualpi kawl gaalkaap ten avui atang tawh nazialkik uh ahihman in ut leh utloh kisailo in ngapkhopkhop in kivik kik ciatciat ta uhhi.VOA

Lungdam

Thang Khawm Pauzomi