Tulaai Leitung Thuthang Tuamtuam Updates June 30, 2015

Tulaai Leitung Thuthang Tuamtuam Updates June 30, 2015

·      Indonesia gam Medan khuapi tung ah Gaalvanleeng Vanpuate C-130 khat kia a , atung a tuang mi 122 te khatzong nungta lo in simangkhin uhhi. Misi luangte Medan khuapi sung aom Adam Milik Zatopi ah amiasa khentel ding in kipuak a, a innkuanpih ciat un khittui naptui tawh ngak ngiungeu ciat uhhi.Vanleeng kiatna ahang peen vanleeng aset asiatciang vanleengtual bawkding a akileh laaitak akiasuk ci in thunei te in gen uhhi.BBC

·      Kawlgam Upper Parliament in 2008 Pingpei thukhunpi abawlphatnop loh khitphet Parliament a Gaalkaap 25% akihel kadeih kei uh ci in Yangon khuapi ah June 30, 2015 ni in Sangnaupang te kizial pah ziahziah uha, Palik ten nakhaam vial ahihman in so semsem in buaina gamlumna lian seemseem hi.RFA

·      1961 kumpan kizopna kitat vivel in zong akiheel nawnvetlo US leh Cuba gam te in Langnih Palaai kizopna zum Embassy Cuba gam leh US gam ah langnih kithukimna tawh honpawi leh taangkokhiat na July 1,2015 ni nitaaklam nai 3 in neita ding uhhi. Hih peen thulamdang mahmah te lak ah khat ahihi.BBC

·      Japan gam Tokyo khupi leh Osaka khuapi kikaal ataai ahaatmahmah Thautang Meileeng Odawara khuapi kiang ah June 30, 2015 ni in  mikhat in meitui atung ah napua in haal ahihman in meikaang a minih si in adang 20 liam uhhi Aliamte lak ah 2 gim mahmah uha, siding hiding kitel naailo hi. BBC

·      Afghanistan gam Kabul khuapi kiang a phualsaat NATO gaalkaap te Camp sung ah June 30, 2015 ni in Taliban migilo khat in mawtaw tawh luut in puakkhamsak ahihman in naseem minautaang khat si in 20 liam uhhi.BBC

·      Canada gam a kibawl FIFA Numei World Cup 2015  Semi Final ah USA gam ten Germany gamte 2:0 zo ek uhhi. Japan leh England te July 1,2015 ni nikaai nai 3:30Pm Central time in in kimawlding uha, azo zawzaw leh USA te July 5,2015 ni nikaai nai 2:30pm US Central time ciang Final kimawl ding uhhi. VOA

·      Piantit gam ten kumsim Democracy lamtawh kisai Leitung ah mipaaktat huaite apiak uh ahi National Order of Merit minphatna Kawlgam Democracy kalsuan na ah lawptak a aseem 8888 Sangnaupang makaai Ko Min Ko Naing June 30, 2015 ni in piakhia uhhi. Piantit President Francois Hollande kihel theilo ahihman ama taang in Yangon Piantit Palaaipi Thierry Mathou in piakhia hi.VOA

·      Leitung a minthang vangvang ahi Ko Omna pan kipankhia Kentucky Fried Chicken-KFC ann Kawlgam Yangon khuapi ah amasapeen June 30, 2015 ni in kihongkhia ta a kawlten alamdangding sa uh ahihman in kisil manlo liang in ann neding pai uha, mitam lua mahmah ahihman saikongkhak bang khakcip liang in ki ngaaksak dimdem uhhi.VOA

·      Leitung ah akhangto mawhlo a kingaihsun Greek gam te in Leitungbup sumkholna IMF tetung ah leiba alohding uh $1.8bn June 30, 2015 ni apiakding peen piazolo in ni ongtum ta hi. Europe gampawl te in piaksakding cih geelna om himah leh piaksaklo kikding in kithukimkik uh ahihman in alohzolo uh ahihi. Hih peen Leitung gamkhangto te lak ah amasapeen leiba lohzolo gam in kiciamteh a asinkhamhuai mahmah thukhat zong ahihi.VOA

Lungdam

Thang Khawm Pauzomi

Tulaai Leitung Thuthang Tuamtuam Updates June 29, 2015

Tulaai Leitung Thuthang Tuamtuam Updates June 29, 2015

·      Nungsung teng Kokant leh Kawl gaalkaap te kidona sung ah Sen gam sung Kawlgaalkaap ten thautang tusak kha uha, Azu asa tawh sasi taak in avathuum uhhang Sente lungkim zotuanlo in phulzeel uh ahihman in  Kawl Gaalkaap Maangpi Min Aung Hlaing  mawhna hinapi Vanlam Gaalkaap Maang Lwin Oo nasepna pan mawk tawpsak hi ci in USA gam Washington DC khuapi Kawlgam palaaizumpi a Gaalkaap Maang aseem Bu Aung Lin Htut in June 29, 2015 ni in genkhia hi.VOA

·      UWSA Wa gaalkaap te gamsung Kawl gaalkaap ten gamkeekkeek uh ahihman in Langnih munla in ki ngimcitcit ta uhhi. June 29, 2015 ni Nypidaw dong ah kilemna nading zong in Wa Makaai te vapai himah leh kamkhum zalo uh ahihman tunbel keeksa tuak in aom hita ci in Wa Makaai U Aung Myint in  gen khia hi.VOA

·      Sen leh Kawlgam kihona leem nawntak lo Sen ten Kawlten mawhna lawh tawh khuhsak zonawnlo ahihman in leh amau le amau lah agamtatziading thei tuanlo ahihman in Kawlgam Gaalkaap Maangpi Min Aung Hlaing July kha kaalnih sung ah India gam ah khutdawh ngeending in vazinding hi. pawlkhat in bel in Naga gamsungmi te leh Meitei te zialding vaai kikumding ci in gen uhhi.VOA

·      Kawlgam President U Thein Sein Mongolia gam tusung vazin a June 29, 2015 ni in Mongolia gam leh Kawlgam azawnggelgel sumzong khawmding in thukim pawlkhat nei uha,thukimna suaikaai thei uhhi.VOA

·      US Secretary of state John Kerry makaihna tawh  gamtuamtuam pan makaai te Iran gam Nuclear vaaitawh kisai June 29, 2015 ni in Vietnam gam ah nasiatak in kikum uha, Iran lampan makaaiten khensatna piazolo ahihman in agamvuah June 29, 2015 ni kileh kik uha amakaaipi te uh adot khit uhciang June 30,2015 ni paikikding ci uhhi.CNN

·      Greek gam te in aleiba uh alohhun ding naaimahmah ta ban ah lohzolo ding dinmun ah om uha, Europe gamlampan huhna lah kikhaakcip ahihman in June 29, 2015 ni pan ni 6 sung Bank kheempeuh leh sumlaakna set kheempeuh khakcip ta uhhi. Hih Greek gam sum hamsatna hang in Asia sumzonna tuamtuam te zong kiatlam manawh hi. Pension saang kumpi naseemlui te bek khasum ngahding a bangci bang in piading cih June 30 niciang khensatpan ding uhhi. VOA

·      Vanlaaizang khawlmun ah neekthei leh van kisam tuamtuam apuak ding pi 200 asau pond 4,000 agik Vankahna Siktum pi USA gam Cape Canaveral<Fla pan June 28 ni akhahkhiat zawh uh minutes 2 kiim pawl in puakkham in lei ah kiasuk kik hi. Banghang in kia cih thu NASA ten akan laaitak uh ahihi. BBC

·      Kawlgam Rakhaing state sung ah guah tamluatna hang in khua tamsimsim ah tuikhang a inn le lo, lampi tampi tui in atup ban ah June 29, 2015 ni misi  10 vaal phata hi. Tui in munkheempeuh tuum ahihman in neekding neilo micimawh tampi tak om uhhi.RFA

·      US te Gamkee khat ahi Puerto Rico gamten aleiba uh ahi $72bn kiloh zonawnlo ding ah ahihman sum leitawina te tawh kiho kuulding hita tua ahihkei leh igam amitcip ding hita ci in Governor Garcia Padilla  in June 29, 2015 ni in TV pan taangkokhia ta hi. US tezong gamdeihmahmah in avaaklah pianpian hita hi.BBC

Lungdam

Thang Khawm Pauzomi

Tulaai Leitung Thuthang Tuamtuam Updates June 26, 2015

Tulaai Leitung Thuthang Tuamtuam Updates June 26, 2015

·      US gam Alaska state Ella Bual tung ah mihau te nopsakna Tembawpi tung kiimvial a aleeng Helicopter khat June 25,2015 zanlam in kia a atung atuang mi 9 avek in si uhhi. Vanleeng hawlpa leh khuazinmi 8 tuang uhhi. HIh khualzinte peen gualnuam mihau Tembawpi tung ataam acim uhciang Helicopter tawh aleengzeel ci uhhi. Vanleeng kiatna ahang khuahhun siatna hang ci in gen uhhi.CNN

·      Piantit gam taw lam Gas bawlna munkhat ah June 26, 2015 ni in migilo IS namte in Piantit mikhat ngawngtan uha, nih liam sak uhhi. Palik ten atheihphet un delhpah uha, mingawngtan pa hiding a a upmawh khat uh manpah uhhi. Amat pa uh ahihkeh paunuamvetlo ahihman in bangmah kidongthei naailo ci in Piantit President Francois Hollande in genkhia hi.CNN

·      IS migilo te in Syria gam Kobane khuapi alehsim na ah June 25,26 ninih sungbekbek in khuasungmi mawhna neikilkel lo mi 140 thatlum ci in Syria gam encik UK pansan kipawlna te in taangkokhia uhhi. Tuabek thamlo in Kurdish gaalkaap honmaangkhat zong viklum sawnsawn uh cihi.BBC

·      Kuwait gam Kuwait khuapi laaizang a om Shia Muslim te biak inn pi June 26, 2015 ni thungen kisa bungbu seuseu a omlaaitak uh migilo ten bomb tawh deng ahihman in mi 8 asi kilakhia pan in adangbangzah si a liam cih kitel naailo hi. Hih bomb apuahkhap laaitak kihawm mipi 2,000 kiimpha uh ci hi.BBC

·      Somalia gam khanglam Leego acihna mun a phualsaat African Union gaalkaap Camp pi al-Shabab migilo ten June 26, 2015 ni in busim suk uha, African Union gaalkaap 30 si uhhi. Hih Camp ah African Union gaalkaap 20,000 kiim om ci in gen uhhi.BBC

·      NATO ten nasiatak in Russia avauna tawh kizom in June 25,2015 ni in Russia President Vladimir Putin in Ukraine gam leh Middle East tawh kisai kikumding in US President Obama ahaaitawipa vakho sak hi. Obama in Ukraine gamsung a Russia gaalkaap teng nahepkhiat masiah kihothei keini ci in atanu te vagenkiksak hi. VOA

·      Tunisia gam Sousse khuapi sung a om Leitungkiimvial mihau te zintun na Hotel khat June 26, 2015 ni in IS migilo te hiding a upmawh thautawi pawlkhat bankaap uha, Palik ten delhpah in akikaap tuahna pan mi 7 si in tamsimsim liam uh ci in Interior Ministry ten  genkhia hi. Hih misi 7 lak ah khatpeen mikaap thautawi migilo ci uhhi.BBC

Lungdam

Thang Khawm Pauzomi

Tulaai Leitung Thuthang Tuamtuam Updates June 25, 2015

Tulaai Leitung Thuthang Tuamtuam Updates June 25, 2015

·      July 4,2015 ni akibawl ding Zomi Innkuan USA Palaai khawmpi leh Global Zomi Idol lasak kidemna ending siimding kahding in USA gam muntuamtuam a om Zomi te solitlit ta a, amunmun ah nasepna pan tawlngak theihnading kingen ciat in lemat leitawh, mawtaw kawmtawh kisingziahziah kilawp mahmah hi. Global Zomi Idol lasakdem ding Australia gampan khat ongtungta a, gampua pan ongtung masapeen in kiciam the hi.

·      Kawlgam Democracy mantak ahihtheih nading a 2008 Kawlgam thukhunpi sungpan mipi leh kumpi langpang te ngetnatawh kizui in puahphat ding puahphat lohding June 25, 2015 ni in Myanmar Parliament ah Mee tawh khensatna nei uha, Mipi teelcing Palaai 417,Gaalkaap Makaai 166 te kah in Palaai 50 painuamlo uhhi. Atamzaw pai ahihman in khensatna bawlveve uha, Thukhun nambat 59(gah) losiah bawlphatlohding in Meetang tamzaw ahihman in kawlgam I maailam khimkhua azingzing hita hi. Thukhen satna abawl laaitak un Pi Suut Cing in lungleeng khuangai kawm kuan ongthukimpih tam ci in khuadakdak hi. Atom in Daw Aung San Suu Kyi in President seemtheilo ding cihzong khat ah kihel hi. Kamayut

·      Syria gam Kobane khuapi  IS migilo te khutsung pan Kurdish gaalkaap ten alaakkikzawh uh khakhat kiim hipan a lungmuang tak a aom hiuhiau laaitak uh June 25, 2015 ni in IS migilo ten avui atang apum tawh nasiatak in lehdo kik uha, Kurdish gaalkaap 30 si in tampi tak liam uha, khua sung mimawkmawk 20 zong IS ten kaplum uhhi. BBC

·      India gam Gujarat state sung ah June 25, 2015 ni in guahtam lua mahmah ahihman in inn le lo te tui im tuum zihziah a mi 30 sang atamzaw si uhhi. Kumpi thunei te in pawlkhat nawnkhia uha, anawnman loh te uh asaanna lam kahto ding in thupia uhhi.VOA

·      Pakistan gam Sindh Province leh Karachi khuapi te ah tuma nithum pan kipan June 25, 2015 ciang khualum luamahmah ahihman in misi 1,000 cingta a, zato ah 7,000 bang zato ah khoi in om uhhi. Hih khualumna  in numei naupang uhaam kuamah guptuam neihetlo ahihman in adiak in uhaam, khanghaam ten lelpha mahmah uhhi.CNN

·      Mikaang Naaksau gaalkaap kipawlna NATO te in gaalkhat bangkhat aneih uhleh gaaldoding a akiginglinlian sa a aneihden uh gaalkaap 13,000 pan 40,000 ah kakhanto uhhi ci in June 24,2015 ni in taangkokhia uhhi. Tulaai tak a akingimngim pih uh ahih Russia te bel thebekhiat banglian ei. CNN

Lungdam mahmah

Thang Khawm Pauzomi