Tulaai Leitung Thuthang Tuamtuam Updates May 26, 2015

·      Sengam leh akiim apaam a gamneu teng akituhdenkeeina South China Sea tung ah May 25 ni in US ten Gaalvanleeng thukan te leengzialzial ahihman in Sente tangteel sihtan bangpah lian in May 26, 2015 ni in Navy Gaalkaap te athuang athuang in tuipi tung ah lawnkhia pah ziahziah uhhi.US ten Kisik lua mahmah ung ongcihkei uhleh thudang omlo US leh Sen gaalpi piangding ci in Senten gen uha, US tenbel ko nasep aseem hi ung kithum kikut ding theikei ung cihsan uhhi.CNN

·      Kawlgam leh Bangladesh gampan taaikhia  a tuipi tung a cimawh Sapadeh Kala te zongding in Bay of Bangal leh Andaman tuipi tung ah US gaalvaanleeng lengsakzialzial May 24 ni pan zon kakipan ta uh ci in Thailand US Palaaizumpi te in May 26, 2015 ni in taangkokhia uhhi.VOA

·      India gam Andhra Pradesh Leh Telangana State sung ah khualum luamahmah ahihman in mipuul tung a, May 26, 2015 niciang misi 1,118 phata a , alumna peen kahsemsem in 122F ciangtungto ci in thunei te in gen uhhi.BBC

·      US gam tawlam Texas State leh Oklahoma state sung mun pawlkhat   Huihpi leh guahpi in  May 24 nipan tunidong nawkgawp a, mi 10 si in 40 kiim mangthang a, miten na Inn 1000 kiim kisia hi. Mawtaw ahihleh bel aki Baptize zihziah hile hi.BBC

·      Nigeria gam Abuja khuapi sung Boko Haram migilo ten May 25 ni in busim uha, Kumpi neihsa inn 400 bang ahaltum sakkhit uhciang mawhna nei kilkello mi 37 mawkkap lup uhhi.VOA

·       NATO te gaaldo kisinna NATO’s Arctic Challenge Exercise 2015 kici ademding in Russia gam ten Gaalkaap 12,000, Gaalvanleeng 250  leh galvan dangtuamtuam pawlkhat tawh Exercise bawl tukaal sungbup bawlding in kipan ziahziah ta ci in Russia Defense Minister Sergey Shoigu in May 26, 2015 ni  in taangkokhia hi. China+Russia Vs NATO or China Vs US+South East Asia peen asawtlo in piangding in kei mimal in ummawh ing. No nabangci muh uhtam maw

·      Sen gam Pingdingshan  khuapi a om dammawh kepna Kanleyuan Nursing Home May 25 zanlam in meikang citciat a , mi 38 ki emlum kha in, adang mi aliamte lak ah nih suksia mahmah in silaiding in kilam en ci hi.CNN

Lungdam

Khialna aomkhak aleh ngaihdam bawm ah maw

Thang Khawm Pauzomi

Tulaai Leitung Thuthang Tuamtuam Updates May 25, 2015

·      Malaysia leh Thailand gamgi ah Misi alomlom a kiphumna phual 30 Malaysia palikte in May 24, 2015 ni in mukhia uha, Kawlgam leh Bangladesh gampan gaaltaai te hiding in ki ummawh ci in Malaysia Home Minister Zahid Hamidi in May 24, 2015 ni in taangkokhia hi. Zomi te ikihel khatam cin kalung nuamhet kei.VOA

·      Iraq gam Ramadi khuapi peen IS te khutsung atuntheihna Iraq gaalkaap ten thaneem na ahihban ah do nuamnuamtaktak kei le uh kilawm ci in US Defense Secretary Ash Carter in May 24, 2015 ni in genkhia hi. IS migilo te in nungkaal sung in Syria gam Palmyra khuapi kiim ah numei naupang kihel mi 217 ngawntan ci in Syria gam encik pawl in May 24, 2015 ni  in taangkokhia uhhi.BBC

·      Nepal gam nasiatak zinlin zawh sawtnailo May 24, 2015 ni in Myagdi district kuam ah nasiatak in men kicim ahihman in Kali Gandaki gunpi kikhaktan a, nasiatak in tuikhangthei ding ahihman in mipi atulsawmlom asim in inn le lo nusia in taaikeek ziahziah uhhi. Misi lian kizanailo a kumpi thunei ten gaalkaap athuang athuang in mihuhding paisak uhhi. CNN

·      Bangladesh gampan Asia tuipi tung ah Tembaw tawh ataaikhia kheempeuh peuh peen Bangladesh gam maitang beelmang ongnuh hi a, khuak manlohna namkhat hi ci in Bangladesh Prime Minister Sheikh Hasina in May 24, 2015 ni in genkhia hi. BBC

Lungdam

Khialhna aomkhak leh Ngaihdam bawm ah maw

Thang Khawm Pauzomi

Tulaai Leitung Thuthang Tuamtuam Updates May 24, 2015

Tulaai Leitung Thuthang Tuamtuam Updates May 24, 2015

·      May 19,2015 ni nitaak nai 4-6 kikaal Yangon khuapi Parliament House ah Kawl kumpi Thein Sein leh Party 53 oan makaaipi te kimuhkhopna ne uha, 2015 Kawlgam kiteelna vaaiding,Gambup kilem nading cihte kikumkhawm uhhi. Zomi ten Party khat bek ineih ahi ZCD Party pan Pu Chin Sian Thang leh Pu Zam Za Mung te vakihel uhhi. Tuaban ah Immigration Minister U Khin Yi tawhzong kiho kha uha, Kawlgam sung a Code Number nei 135 tengban ah adangkheempeuh zong 2014 Census Result May 29 niciang kitaangkokhia ding a Kawlgambup mimal phazah I 0.1% aphapeuh mah in Minister neitheiding cih gen hi. Hih May 29 niciang Pu Gin Kam Lian vapai ding in ZCD in tungsiah ah thupuak khinzo uhhi.ZCD

·       ZCD Makaaipi khat mah ahi Pu Zam Za Mung ongtungding May 29 ciang Minthang USA gam ah ngaihhawh in minamvei khempeuh tawh kimu kawikawi ding in Kawlgampan ongleengkhia ta ding ci in ZCD Zumpi pan gen uhhi.ZCD

·      Tulsa khuapi a om MCC Pawlpi Soccer Department te vaaihawmna tawh kumsim a kineiden Tukpeeng kimawlna Tulsa khuapi ah May ni 23-25 thupi tak in kipawlding a, akhatna te $1,500 lungdampihna kipiading hi. Hih Tukpeeng kimawlna peen Ngimna lianpi tawh kibawl ahihmah bang in minam kideidanna omlo in Kawlgam mi kheempeuh kihel thei a tutung in Team 12 phading  hi.MCC

·      Ontungding September 6,2015 ni ciang Kumsim a kibawlden ahi Zomi North America Cup Grand-Rapids  khua Michigan state ah kibawlding a, akhatna te $1,500, Medals & Zodaak talk hat, Anihna $750 & Medals  cihbang in kipia ding a Luutman Team khat ciang $300 ta kilading hi. Hih North America Tukpeeng kimawlding te peen Zomi sit tui helloh leh tuitawmtawm akihel te hiding hi. Sia Paupi

·      Tusung teng Myanmar leh Bangladesh gampan gambeel ngending a tuipi tung a taai Kala te Misi deda kawm in angaihsutkhit uhciang Malaysia leh Indonesia ten amau gam atungmasasa keemding in kithukim uhhi. Tuaban ah tuipi tung ah mangthang laaiding aki ummawh mi 7,000 kiim te Vanlam Leilam tawh zong ding in Malaysia Prime Minister Najib Tun Razak May 21, 2015 ni in phalna taangkokhia hi. Hih Kala gaaltaai te vaaitawh kisai in Indonesia,Malaysia leh Kawlgam te tukaal sung in Kawlgam khuapi Naypidaw ah kimuding uha, US Deputy Secretary of State Antony Blinken zong vakihel ding hi.Malaysia sung a Muslim Biakna lam ah athalawp pawlkhat in Malaysia gam pan Kawlgam Palaaizum nawhtak in ataikhiat nading un lungphona May 21, 2015 ni in neiziahziah uhhi.Hih bangdan a Kala te Tembaw tuang a tuipi kantan a ataai ziahziah na thu Bangladesh leh Kawlgam ten kantel ding in UN te May 24, 2015 ni in sawl uhhi.  BBC

·      Sen gam ah May 24, 2015 ni in guahtamluat nahang in men kicim a, Innpi 7 kicim in Sangnaupang apua Bus 2 tui in taai ahihman in mi 52 si in 7 mangthang a, 21 zato ah kipuak hi. Hih peen 1998 kumzawh anasia peen guahtamluatna hang a misihna hi a 1998 kum in mi 4150 si uhhi.ABC

·      Russia gam President Vladimir Putin in Russia gamsung ah gampua pan a naseem NGO tuamtuam kipawlna te zatnawnloh nading thukhunpi kipsakna May 24, 2015 ni in suaikaai ta hi. Hih thu hang in Leitung kipawlna tuamtuam te leh adiak in Human Rights lamte patau uha, US tezong lungngam sak mahmah hi.ABC

·      India gam Andhra Pradesh state ah khualum luatna hang in nungkaal sung in mi 100 si a, Telangana state ah April kha leh tu kikaal mi 130 si hi ci in Chief Minister Chandrababu Naidu in May 24, 2015 ni in thuthang kaaikhawm te kiang ah pulaak khiatna nei hi.VOA

·      Temple University Physics Department ah Chairman asem  Xi Xiaoxing kum 47 US gamte pilna pawlkhat Sen gam ahawpsotna hang in May 22 ni in US kumpi ten thubawl uhhi.Azenzen in amawhna akimuhleh kum 80 thongkia ding a, sumtang Dollar 1million liausum piakhading ci uhhi. Xi peen Sen gammi hi a, US gammi asuak ahihi.VOA

·      Somali gam Mubarak khua ah May 24, 2015 ni in al-Shabab migilo te leh Somali gaalkaap te nasiatak in kikap uha, Somali gaalkaap 19 si in al-Shabab migilo 26 si uhhi. Kumpi lamte genna ah khua sungmi zong pawlkhat liam ci in gen uhhi. VOA

·      Ireland gam te in zahmawh neih kibangte kiteen theih nading gambup mipite tung ah thukimna May 23,2015 ni in Mee tangtawh kaaikhawm uha, mipi vekpi 62% in thukimna nei uhhi. Hih peen leitung ah amasapeen mipi atampeen in zahmawh neihkibang kiteending adeih gam in kiciamteh hi. Gam makaaite akipan mipi mahmah in ka angtang mahmah uhhi cinong uhhi.CNN

·      NATO gaalkaap kipawlna te in Europe gamsung ah gaaldokhop kisinna aneihsung lian uh ahi May 18 nipan May 24, 2015 niciang Sen leh Russia te in zong Mediterranean tuipi tung ah Gaaldokhop kisinna nasiatak  in nei uha, Gaal Tembawpi 10 zang in khuziahziah uhhi. Gaaldolam thukan pawl in hihpeen US te akhengnuam a akipan uhhi ci in ummawh uhhi.BBC

Lungdam

Thang Khawm Pauzomi  

Tulaai Leitung Thuthang Tuamtuam Updates May 16, 2015

·      Syria gamsung a IS te Gaalkaap Maangpi leh Sum le Paai lam ah thuneipi Abu Sayyaf  US Special Force te May 15,16 zantha paai leizon ek uha, thatlum zo in azi ahi Umm Sayyaf hingmat sak uh ci in Pentagon ten taangkokhia uhhi. HIh US Special Force te peen Army’s Delta Force te hia, Blak Hawk Helicopter, V-22 Aircraft te zang in abuluh uh ci in gen uhhi.CNN

·      Germany gam Osnabrueck khua leh Ibbenbueren kikaal ah Khualzin Meileeng khat in Mawtaw khat May 16, 2015 ni in phukha a, mi 3 si in adang mi 20 liam uhhi. BBC

Lungdam

Thang Khawm Pauzomi