Tulaai LEitung Thuthang TUamtuam Updates JUne 30,2014

·      Kachin gam ah sung ah June 9 nipan kipan tunidong Kawlgam gaalkaap te leh KIA te kikap tawntung uh ahihman in 2014-15 pilna sinkum sung ading sang 39 kihong theilo a, gaaltaai vekpi Saang 1 vaal bang kibehlap hi ci in NDF party taangmi Daw Pauh Cia in June 29, 2014 ni in genkhia hi.

·      China gam ngaihhaw Kawlgam President U Thein Sein avazui kawlgam Foreign minister U Wa Nah Maung leh Chin Foreign Minister Mr Wang Yi te June 29, 2014 ni in China gam Beijing Khuapi ah kimukhawm uhhi. China gam ataamsung uh June 27-30 sung in gamnih makaaite thukimna sa te semkhia taktak ding uhhi ci in Xinhua thukizakna in genkhia hi.

·      India gam tawlam a Chennai khuapi  sung ah Inn dawl 12 khat June 28 ni in guah naakzuklua ahihman in kicim a mi 9 sipah in pawlkhat aliam ban ah tunidong 100 inn in vuknelh in kimu zonailo hi. Chennai a akicip zawh naikhat pawlciang Delhi khuapi Inn dawl 4 khat kicim leuleu in mi naupang 5 leh ulian 5 si uhhi.

·      North Korea gam te in South Korea tawh kikaal tuipi sung ah tai 310 ciang akikaap theihna Thaupi tangnih June 28 ni zan in lawnkhia uhhi ci in South Korea gaalkaap maangpi te in genkhia uhhi. China President Xi Jinping  South Korea tawh North te Nuclear vaai kikumding in June 29, 2014 ni in tung ahihman vaimuakna dan ahitam ci in ki ummawh ci uhhi.

·      Kawlgam kumpi U Thei Sein in China gampeen kawlgam ading athupi mahmah gamkhat ahihnatawh kizui in ASIAN gampawl makaaipi asepsung in China gamte lunghihmawhna kahuhding ci in kamcian kiciantak in pia hi ci in June 30, 2014 ni in Xinhua thukizakna ah China Foreign Minister Dept ten genkhia uhhi.

·      Rakhaing state Chief Minister ding in Gaalkaap Bu Maung Maung Ong Rakhaing state Parliament pan anial kuamah omlo ahih man in June 30, 2014 ni in kipasakna kinei ta hi. Kawlgam sung State 7 te ah gaalkaap Minister aseem anihna zong ahihi.

·      Australia Foreign Minister  Julie Bishop Kawlgam ah July 1 pan ninih sung taamding in ngaihhawhding a, Daw Suu,Thein Sein leh makaai tuamtuam tawh kimukhawm ding hi ci in AU Foreign Department ten June 30, 2014 ni in taangkokhia uhhi. Australia a omten ZOgam ading gataam beek nakhaksak un maw

·      Kawlgam sung daaikhipkhep a kilemna apiantheih naang in gambup thukimna Suaikaihna pawipi lunggulhna tawh Mualmi thautawi leh Kawl te kikla thukimna laaipi ngaih theihnading in July kha sung ah langnih makaai te kimukhawm ding a KIO te phualpi Laiza khuapi ah kibawl ding hi ci in Kawl kilemna vaaihawmpi U Aung Myint in June 30, 2014 ni  in genkhia hi.

·      Pakistan gaalkaap te in Pakistan North Waziristan kuam akibusa Taliban migilo te vanlam ah ni 10 sung azial khit uhciang June 30, 2014 ni in leilam pan zialto leuleu ding in avui atang Tanks tetawh nasia tak in kuankhia ta uhhi. NI 10 sung vanlam mission ah migilo 300 kiim si ci in genkhia uhhi. Hih mun a migilo te zialtum nading in US kumpi in Pakistan kumpi te $ Awn tampi piakhia khin zong ahihi.

·      Gaza gun pang kuampan Palestinian migilo te in Israel gamsung ah Thaupi tang 60 vaal June 27-28 sung in lotphei uh ahihman in Israel nupi nih lauhtawivat in zato tung  a inn nih tawmsia bek ci hi. Israel gaalkaap ten leiba lohlohding hisathei mahmahlo uh ahihman in Gaza gunpang suk vanlamtawh June 29 ni in zialsuk uh a migilo khat si in 1 lian cin gen uhhi.

·      Columbia gam Arauca state sung aom Sathau tawhna phualpi khat singnuai miten June 30, 2014 ni in vasim uh ahihman in Sathau khuk nasem mi 13 nasiatak in liam uha asi zong pawlkhat om ci in kumpi thunei te in genkhia uhhi.

·      Iraq gam abuaisak khia mahmah ISIS migilo te leh Sunni Muslim thautawi te in Iraq gamsung ah Asuakta Islamic gam kaphutkhia ta uhhi  ci in June 29 ni in Tikrit  khuapi pan taangkikhia uh ahihman Iraq gaalkaap ten zadah mahmah in hih migilo teng anuai mang ding in June 30, 2014 ni in Tikrit khuapi sung ah Helicopter tawh athuangthuang in tuakdetdet ta uhhi.

Lai ongsim sak mimal kimtung ah kalungdam

Thang Khawm Pauzomi

Tulaai Leitung Thuthang Tuamtuam Updates June 28, 2014

·      Tutung ka US Citizenship ngahna online Groups pan hitaleh Facebook pan hita leh onglungdampih Zomi mipih akuamaciat tung ah kalungdam mahmah hi cihthu kongtaangkokhia hi. Like Ongpia leh Lungdampihna onggen khia Zomi 3,000 bangpha a, gamdangmi 10 bang pha ahihman in khat khat in ongthukik ding hileng thubaihlo ding ahihman in ithuthang tungtawn in lungdamthu ongko kahihna ongtelsiamciat ding in konglam en hi. Zomi Zogam ading in tangzai tektek in nakisemthei ta ahihman in keizong kalungdam mahmah hi.

·      Leitung a Electronic company minthang  mahmah khat ahi Apple Company te in asawtlo in iPhone athak khat hawmkhia tading ci in June 28, 2014 ni in taangkokhia uhhi. Alui iPhone5 peen 4 inc kiim hi a tu a athak ding ahihleh 5.5 inc hiding zaihzaw zatnuam zawding ci uhhi.

·      Thailand gam I thuneihna alakhia ahi Galkaap kumpi te in Thailand gamsung Democracy system tawh kalsuan a mipi deih makaai kiteelna taktak aom theihnading in kahan ciam mahmah uha, 2015 kum sung in kiteelnapi kapiang sak hamtangding uhhi ci in June 28, 2014 ni  in taangkokhia uhhi.

·      US leh Philippine gamte in gamnih thukimna omsa mahbang in Philippine leh China gamte buaidenkeeina ahi South China Sea sung ah Gaal kimawlna June 27 nipan kipanta uhhi. TUtung a peen kumdang ate tawh kibanglo ding a nisia mahmah phadeuh ding in cin langnih pan taangkokhia uhhi. China te bel kiim le paam teng ah vaakkawikawi in buaisim mahmah uhi.

·      Iraq gam Sunni Muslim thautawi te laksa ahi Tikrik khuapi Sunni Muslim te khutsung ngahkik nading in Iraq gaalkaap tampi tak Vanlam leilam pan June 28, 2014 ni kuan khengkhang uh a nitum ma teitei in lakhia kikding ci in taangkokhia uhhi.

Lungdam

Thang Khawm Pauzomi  

Tulaai Leitung Thuthang Tuamtuam Updates June 27, 2014

·      Zomi sung ah Pasian zat mahmah Rev Dr Kam Cin Hau in Atlanta khuapi ah Crusade bawl mankhin ta  a  July kha sung in Nasville khuapi ah kawlkam leh Zokam tawh Crusade bawl leuleu ding hi. Pasian mizat mahmah ahi Rev Pau Khan Khai zong Norway gam tungta a Norway gam a om Zomi te hunnuam azatlaaitak ahihi. Pasian in La lam leh khalam ah ongzatsak mahmah ahi Sia David Kham zong Chicago Crusade manta a Zomi te omna khuate ah ong vaak kawikawiding ci hi. Asawtlo khat mah in Pasian mizat mahmah ahi Sia Pau Lian Mung zong US gam ongtungding a, Columbus Zomi tetawh hunnuam azatkhit ciang ongvaak kawikawi ding hi.

·      Taksa lam Zomi te makaaipi Pu Gin Kam Lian tenu zong USA gam leitang ongtung khinta uha, San Francisco khuapi a om anau pa Pu Thein Swe kiang ah tawlnga laai hi. Kawlgam Siam sin makaaipi Sia Bia Mung leh Zolengthe Lasiam, minam it Sianu Cingsan te on the way cih thu kiza hi.

·      Zomi Khawmpi USA 2014 ading amunmun ah aneu alian Sia le Nautaang te kiliing litlit  ta a , Kentucky state pan zong Zolia,Idol demding Liapaal nihte kising lehleh ta …..Tukpeeng kimawl dingpawl zong Final a kisukdanding kikum litlit ta uh ahihman in State dangte na kigin mahmah uh ongkuul khading hi.

·      Ongtungding September kha sung ah Gamdang Bank te in kawlgam sung ah suaktatak a sumzong a Bank ahontheih nading License piakding kawlgam kumpi in geelna nei hi ci in Kawlgam Central Bank ten June 27, 2014 ni in taangkokhia uhhi. Hih bang hileh munkheempeuh ah ATM Machine kizang ding a sum neite ading in nop mahmah ding ahihi.

·       Kawlgam Maguai Division sung a Taangmi tutna awng munnih ah ongtungding by-election ciang dem asawm Taangmi palaai te Kawlgam gaalkaap lam leh thukan lamte  in nasiatak in athu uh kan in sittel uhhi ci in political parties te in June 27, 2014 ni in taangkokhia uhhi. Zogam sung a kithawiding te zong pilvaang pianding kisam khading hi.

·      Yangon khuapi kilemna Innpi ah Rakhaing state Chief Minister ding a President U Thein Sein sehkholh Bu Maung Maung Ong leh Rakhaing minam makaaite,UN naseem pawlkhat te June 27, 2014 ni in kimukhawm uhhi. Bu Maung Maung Ong in Sittwe khuapi leh Pongna khuapi te mei nasiatak angah theihnading in kavaaihawm sakding ci in genpah phuapphuap zel hi.

·      Kawlgam President U Thein Sein China gam ngaihhawhna khualzin June 27, 2014 ni kipanta a Beijing khuapi tungta hi. Atun phetphet in China President Xi jingPing  leh ulian pawlkhat tawh kimu pah saisai uha, China gam kong ngaihhawhna athu in gamnih kilawmtaatna akhantohding deihna lianpeen hi ci in President U Thein Sein in genkhia hi. Pu Thein Sein China gam sung ah ni 4 tung taam pikpeek ding a China Zozu khum mahmah zong teepding in kilim thawi mahmah hi.

·      KNU makaaipi  Liangko Aksi dim Bu Saw Tama La Haw Hah kum 94  puteek natna tawh June 26,2014 ni  zingsang lam in atenna Thai gamgi Meshan khuapi pan leitung nusia in apa kiang ah ciahta hi. Bu Saw peen gaallam thulam ah thuthei mahmah leh Karen minamte pa khat ahihna tawh mipi in nasa tek mahmah uhhi.

·      India gam Andhra Pradesh state nisuahna lam Godavari acihna mun a India Gas company te pipe puakkham ahihman in akiimnaai a inn le lo te kaangmang a, mi 14 si in mi 15 liam uhhi. Tukha kipat lam in zong Chhattisgarh state aom kumpi neihsa kahpa siik company khatpan gu kihel tuipawlkhat kehkhia in mi 6 si ahihman in akahthak Prime Minister pa ading in vaaisah mahmah khat ongsuak tadih hi.

·      Japan gamte neihsa tuipi sung North Korea te in anaaikaapna thaupi tangthum tawh June 26,2014 ni in kap ek uhhi ci in South Korea Defense Minister zumpi te in pulaak khia uhhi. Japan lampan bangmah dawnkikna nei naailo uha, ahizong in Japan gam in Gaallam tawh kisai atha angal avui atang nasiatak in behlapding in June 26 ni in khensat ci in Japan PM Shinzo Abe in genkhia hi.

·      Uruguay leh Italy World Cup kisuih napan a Ha ato mahmah lam alak khapak kimawlsiam Louis Suraez leitung tukpeen kimawlna puai 9 kimawltheilo ding leh kha 4 sung tukpeeng tawh kisai kinahvawh kilkel loding in FIFA June 26 ni in gimpia uha hih tukpeeng kimawlna sung ah a Ha ongtaangko dihdih na hang in liausum $112,000 pia sak uhhi. Akimawl niding uh nitaak lam in Bawngsa ne kha a aha thak ahitam ci simsim pong ing

·      Iraq gam ukcip asawm Sunni Muslim thautawi te doding in Iraq kumpi te Syria leh Iran te onghuh ta uhhi ci in Iraq  Prime minister pan June 27, 2014 ni in genkhia hi. Syria te in Iraq tawh gamgi dung a om Sunni Muslim thautawi te phualpi teng June 26 ni pan vanlam tawh nawk uha, Iran te in Iraq gamsung teng a encik kawikawi zoding gaalvanleeng thukan te ongpia ci in genbeh hi. US te tung Vanlam tawh ongzial pihpak un ci a athacialna Obama kumpi in gaallam hilh mi 300 bek tawh huh ahihman in hihlampi atawn ci in kigen hi. Ahizong in US te omthei mahmah lo ahihman in agaalkaap 300 avengding cih paulap in June 27, 2014 ni in Iraq gamtung teng ah ahawlpalo tuithe vanleeng Drone te lengsak diaidiai ta uhhi.

·      USA gam California state San Francisco khuapi a om Leitung ah aminthang mahmah ahi Golden Gate leipi tung ah amah le amah tuaksuk a kithat mi aom nawnloh nading in akiim teng $76 million bei in daalding in Lei thuneite in June 27, 2014 ni in khensat ta uhhi. Hih lei akibawl kum 1937 kumpan tunitan leitung pan tuaksuk a asi mi 1,400 vaalta a 2013 kum bekbek in mi 46 tuaksuk in si cizen hi.

·      Paraguay gam ah June 27, 2014 ni in nasiatak guahzu ahihman in tuikhang zihziah a veng khat le khat kizopna leite tui in taai in Inn t etui in tummang ahihman in mipi 200,000 vaal inn le lo nusia in muanhuaina mun zuan in taai ngeingat uhhi.

·      China leh Japan gam kikaal a gamnih akituh lunglung denkeina uh ahi China ten Senkaku ci in Japan ten Diaoyu acihna tuikulh kiang tiktek ah June 27, 2014 ni in China te neihsa Ngabeng tembaw khat kibung a  mi 5 China Navy ten hongkhia man in mi 5 mangthang ci in Xinhua thukizaakna in genkhia hi. Tembaw kibut na ahang kithei naailo ci uhhi.

Tamlua kha leh hihzah tawh hialbawl phot ni

Khialhna aomkhaak aleh ngaihdam bawm ah maw

Laai ongsim sak mimal kimtung ah Lungdam mahmah

Thang Khawm Pauzomi

Tulaai Leitung Thuthang Tuamtuam Updates June 25, 2014

·      Zomi sung ah imuanmahmah makaai khat leh Pasian ongzatsak mahmah ahi Rev Pau Khan Khai ( PhD student USA ) Summer sangkhaak sung azi ata tawh tawlnga hithiat nuam mahmah hita leh EU gam a om Zomi veina tawh US gamsung muntuamtuam ah Gospel apaikhit ciang June 25, 2014 ni in Louisville Khuapi vanleeng tualpan EU gamlam zuan in leengkhia ta hi.

·      Rakhiang State Chief Minister pa dinkhawlna hang in Rakhaing state Parliament in June 25, 2014 ni in thukin thukikupkhopna Sittwe khuapi ah zingsang nai 10-10:30 ciang nei uha, President Thein Sein Chief Minister thak ding in Gaalkaap Bu Maung Maung Ong asehna thu Parliament makaaipipa in genziau in anial nuamte June 27 anunungpeen hiding a, June 30 niciang thukikupna leh kisakne neiding ciziau ahihman in meeting manbaih mahmah hi. Rakhaing minam te leh Rakhaing Party ten Rakhaing minam deih himah leh 2008 thukhunpi ah President in adeihdeih teelthei a adeihlohte Veto tawh nialthei ahihman kuamah taangtheilo ci in genciat uhhi. Gaalkaap Bu Seemlaai State Chief Minister a uk state peen Karen state hi a Rakhaing state ah akikipsak aleh anihna hiding hi.

·      Kawlgam sung daaitak leh suaktatak a lungpho theihna tawh kisai thukhunpi puahphatna President U Thein Sein in June 24 ni in suaikaai a kipsakna nei hi. Akiman te thong ah akikhiat leh kumkhat sang tamzaw loding cih nengneng bek bawlpha ahihman in aluitawh kilawmdanglo mipi onggaak veve ci in kawlgam politician te in gen uhhi.

·      Kawlgam kumpi in amat uh ahi Biakna lam tawh kisai Minister zalaih ding in anuai a Minister huh ahi U Soe Win June 25, 2014 ni in Upper Parliament in  zakhansak na leh kipsakna nei uhhi. Hih zong President U Thein Sein in adeihkawk mah hazel hi.

·      India gam Imphal khuapi pan Kawlgam Mandalay kikaal Highway kician tak in ziik in Bus gamnih kawm a taaizialzial theih nading gamnih thukimna asawtlo in gamnih makaaite in suaikaai tading hi ci in The Economic Time thuthang in June 24 in suaksak hi.

·      June 24 ni a World Cup Tukpeeng suihna ah Italy leh Uruguay akimawl laaitak Uruguay maaikah Luis Suarez in Italy nungdaal Giorgio Chiellini I aliang napet mawkmawk ahihman in lawmpan zong akiutawh khawnggiap in ahatu nasa mahmah hi. HIhtawh kisai in Surez bangcibang in gimpiading cih FIFA in akansaan laaitak ahihi.

·      Hollywood Video zaihte in kineih siam James Franco leh Seth Rogen  te zang in North Korea  Uiphuk maangpa ahi Kim Jong-Un American CIA te panpihna tawh akithah na cih Video bawlkhin uha, October kha ah US kumpi phalna tawh leitung bup ah hawmkhia ding ci in June 25, 2014 ni in taangkokhia uhhi. Azenzen in US kumpi phalna pia in hih Video ong kihawmkhiat a leh US ten North Korea ongdo bang in kangaih sun uha, Nasia tak in kathukkik pahding uhhi ci in North Korea Foreign Minister zumte in June 25, 2014 nimah in thukkik saisai uhhi.

·      South Korea gam ah April 16 ni Tembaw kibung in mi 300 vaal asihna ang in apanmun pan khawl ing ci in ataangkokhia ahi Prime Minister Chong Hong-won khawllo in azamah semsuakding hi I in President Park Geun-hye in June 25, 2014 ni in taangkokhia hi. Alaih theipak ding omloteng ban ah President nu in ama mawhna hilo in keimawhna hi ci in mipi tung ah nasiatak in athum ciang mipiten zong akhawlding in phallo uhhi ci in genbeh hi.

·      US gam a Party lianpeen nih lak ah khat ahi Republican te in President Obama thuneihna Congress tawnlo in avaal in zangzel ahihman thubawl ding ci in Republican party The Speaker of the House John Boehner in June 25, 2014 ni in genkhia hi. Innpi Palaai House of Representatives teng in July khasung thu bawlding leh bawlloh ding Vote bawlding hi ci in genbeh hi.

·      Nigeria gamte khuapi ahi Abuja khualaaizang Vanzuakna phualpi sungkhat ah apawlmin kitheinaailo migilo pawl in Bomb puakkhamsak uh ahihman in mi 21 si in 52 naakliam mahmah uhhi. Boko Haram migilo te hiding in kumpi thunei te in upmawhna nei uhhi.

·      Ui leh Ak abang ahi China leh Taiwan gamnih kikaal sumzon sumzuak vaai hawmkhia ding in China te in amasapeen Palaapi Zhang Zhijun Taiwan gam paisak uhhi. Mipi te bel nuamkhol uh hiding hiven amunmun ah Mr Zhang lim tawikawikawi in lungphona laakzihziah uhhi.

·      1995 kumpan kipan mi 60 vaalbang thatlum in abuan kawikawi Russia Mafia  migilo te makaaipipa ahi Alexander Matusov  Thailand gam Bangkok khuapi I nisuahna lam aom Chonburi veeng Vanzuakna market pi sung ah June 25, 2014 ni in Thailand palikten mankhia ta ci in taangkokhia uhhi. Amah peen Russia kumpi te I kisap mahmah icidiam matnop icidiam the most wanted paerson in Russia ahihman in Russia gam puakding in Thailand thuneiten khensat uhhi.

·      Iraq gamsung adaih theina ding in minamneu minority ahi Sunni leh Kurdish minam te kihel kumpi thuvaaihawmpawl phuhkhiat ding US Secretary of State Mr John Kerry I ngaihsutpiakna Iraq Prime Minister Nouri Maliki in asanzawhlohna June 25, 2014 ni TVpan genkhia hi. President Obama kamciam mahbang in Iraq gaalkaap te ahuhding US gaalkaap madawk 300 June 25, 2014 ni in Iraq  gam tungta uhhi ci in Pentagon ten taangkokhia uhhi.

·      2011 kum NATO ten asukkhap Libya gam Uk Muammar Gaddafi kumpi I parliament athak leh ahoih zaw in dinkik sakding ngimnatawh Mipi teel Taangmi kiteelna June 25, 2014 ni in kipanta a mipi te in Mee piaziahziah uhhi. Mipi 630,000 in meepiakhin a upmawh nazah I alangbek in gamsung daihlohna hang in mee khia ci in kumpi thuneite in genkhia uhhi.

Tamlua kha leh tu azah cipak ni ei

Lai ongsim sak khempeuh tung ah Lungdam

Khialna aom khaak aleh ngaihdam bawm ah maw

Thang Khawm Pauzomi