Tulaai Leitung Thuthang Tuamtuam Updates August 28, 2015

·      Austrian gam leh Hungary gamgi Highway tung lamnawl ah Mawtawpi sung a asisa a kikoih Refugee mi 71 Austrian kumpi thunei te in August 28, 2015 ni in mukhia uhhi.Hih misi te peen Europe gamlam a gambeel ngending puaisa ten lamgei a anusiat ziau hiding in lam en uhhi.VOA

·      Libya gam pan Italy gam lamzuan in gambeel ngeending cih ngaihsutna tawh apai mi 500 apua tembaw khat August 27 ni zanlam in Tuipi tung ah kibung a misiluang a theihsa 200 tawmkhia khin uha, 20 taang ahing in honkhia zo in adangteng mangcip lai hi. Tukum sung bekbek hibang gambeel Tembaw kibung asi mi 2,400 cingta cizen uhhi. Tutung amisi te peen Pakistan,Bangladesh,Syria leh Morocco gamte pan ci uhhi.VOA

·      Ongtungding September 4,2015  niciang Saudi Arabia kumpipa ahi King Salman Washington DC Khuapi ongzinding a President Obama tawh Middle East lamtawh kisai thucin thutang kikumkhawmding ci in White House thusapi Josh Earnest in August 27,2015 ni in taangkokhia hi.CNN

·      India leh Pakistan gamgi khua khat ahi Kashmir kuamteng ah India leh Pakistan gaalkaap ten thautang kikheekna bawl uh ahihman in nautaang mi 6 thatlum kha in 46 liamsak kha uhhi. BBC\

·      Zomi,Zogam giabang zuun nading in Zomi ten ineihsun Zomi Congress for Democracy party in 2015 November 8 ni kiteelkhit ciang gualzawhna ngah le uh Zomi,Zogam a ding koicibang mapangnuam, koici makaih saw cih te September 24 niciang Eima pau ngiat tawh MRTV pan leh Radio pan thugenna nei ding uhhi. Hih ni mah in minamdang te party tenzong thugenna neiciat ding uhhi. CPP, CNDP, cih party ten “ka si ko, ka si ko” ongci lamlam lel ding uha, Kawlpau tawh genlel ding uhhi. Tua ahihman in limtak nangai inla pau natel penpen party ah Mee nakhia ziau in. ZCD

·      South Korea leh North Korea te kilemding kipan pan ta icih leh South Korea leh US te kipawl in North Korea tawh gamgi Pocheon  khua kiang ah gamnih gaaldo khop kisinna August 28, 2015 ni in nasiatak bawlmawk uh ahihman in North Korea Leikha Maangpi Kim Jong Un in zong thukin meeting khat August 28, 2015 ni in sampah a Nuclear thautang kinei hiven maw cihsan hi.VOA

·      Vietnam gamte in ongtungding September 2 a 70^th veina Vietnam Independent day phawkna in Vietnam gamsung a thongkia gamdang mi 34 tawh kigawm thongkia vekpi 18,000 suahtaakna piading ci in August 28, 2015 ni in taangkokhia uhhi.  CNN

·      Malaysia gam mipi ten in Tulaaitak a Prime Minister aseem Najib Razak apan mun pan tuankhia in gilbeem a atawlngak thei ding ngetna amun mun aciangciang ah August 28, 2015 ni in kipanta uhhi. Pu Najib peen Mipi neihsa sum $7 million kiim ama anglam ah nakaai mawk ahihman in athuakthuak ding hita hi.The Star

Lungdam mahmah

Thang Khawm Pauzomi

Tulaai Leitung Thuthang Tuamtuam Updates August 16 , 2015

·      Khualzinmi  Ulian 44 leh Naupang 5 apua Indonesia gamte neihsah Vanleeng khat August 16, 2015 ni in Jayapura khuapi leh Oksibil khuapi kikaal  ah kia in Vanleeng tung a tuang mi vekpi 54 sikhin uhhi. Hih Vanleeng peen August 16, 2015 ni zinglam a mang hia Jayapura leh Oksibil khuapi kikaal Bintang mualtung ah kimu hi. BBC

·      Sengam  Tianjin khuapi sung a Innpi khat puahkhapna hang in August 16, 2015 niciang misi 112 phato ta a misi te lak ah meiphelh kumpi naseem 21 zong kihel uhhi. Aliam ahih leh 600 bangcing to ta a mi 95 bang hingmanta ahihman in kumpi thunei ten Inn puahkhapna pan KM3 sang kuamah kinaizawlo ding in thupiakna bawlkhia ta uhhi. Ahang peen hih puahkhapna mun ah Sodium cyanide toxic chemical Ton 100 kiim agikding 2 om mawk a tuate hang in huaisia hi ci uhhi.   VOA

·      Libya gam khunglam Mediterranean tuipi tung ah Gaaltaai te tuanna tembawpi khat August 16, 2015 ni in kibung a, misi 40 kitawmkhin pan in mihing  320 kihonkhia zo ci in Italay tuipi kiang cing gaalkaap te in genkhia uhhi.VOA

·       IS misok te in US kumpi naseem leh Gaalkaap zalian zawdeuh mi 1,400  te I email, password, phone nambat cih te kipan theihuam tuamtuam te ut hunhun a suklup theihpahpah nading in kakeem khinkhian khinta uhhi ci in August 16, 2015 ni in taangkokhia uhhi.CNN

·      USA gamsung ah Phone leh Internet lamsang Company lian mahmah thum te lakpan khat ahi AT&T company te in amau Line  tawh Email zangkheempeuh USA thukante kiang ah puak pahpah hi ci in New York Time thukizaakna te in August 16, 2015 ni in taangkokhia uhhi.VOA

·      Syria gam  Douma khuapi sung a Vanzuakna phualpi sung Syria gaalkaap te in Vantung pan nasiatak in August 16, 2015 ni in beltung khiat uh ahihman in mi 80 sipah in 200 vaal liam uhhi. Hihmun teng peen Syria kumpi langpang Tapong te kiphualna ahihman in kumpi lamten beltung akhiat ci uhhi.BBC

Lungdam

Thang Khawm Pauzomi

Tulaai Leitung Thuthang Tuamtuam Updates August 13, 2015

Tulaai Leitung Thuthang Tuamtuam Updates August 13, 2015

·      Zogam sung ah  2015 kum Kawlgam Kiteelna ademding ZCD Party Makai te in Mee kuang luiding ten gamin te kiteelna thunei te kiang ah August 13, 2015 ni in apkhin ta uhhi. Zomi te maainawt ding ci akalsuan laaitak in alanglam khat ah Dawi Mangpa Vompi halungvei bang in kipeipei zel ahihman in thungetna ah phawkciat ni.

·      Sen gam ah Khuapi alianpeen 4 na ahi Tianjin khuapi mipi 7 million ateenna mun Khualaaizang ah August 13, 2015  ahang kitheilo khat in Puahkhapna lianpi khat om a mi 44 sipah in 500 vaaltak liam uhhi. BBC

·      Iraq gam Baghdad khuapi sung mitam mahmahna Vanzuakna phualpi khat ah IS misok ten August 13, 2015 ni in Bomb puakkham sak uha, mukheempeuh misi them kitheh zihziah in cikziat huai mahmah hi.  Misi akisim thei 62 pha a tam simsim liam uh hi.VOA

·      Nungkha sung a Turkey leh US te thukimna sa ombang in August 12,2015 ni in Turkey te gam Vanleeng tualpi te zang in US gaalvanleeng F-16 kigual diudeu sa in Syria gam a kibusa IS misok Bomb khiat kipan ziahziahta uhhi ci in Pentagon gaalphualpi te in taangkokhia uhhi.VOA

·      A 39 na US President Jimmy Carter  kum 90  asin aki atsak napan Cancer natna nei cih kimukhia hi ci in August 13, 2015 ni in pulaakkhia hi. Amah peen ama utthu tawh August  3,2015 nipan Atlanta khuapi aom Emory zatopi ah asin ki atding a zato lum ahihi. Aneihsa tawh Carter Foundation ci in Damlo natna neite huh kawikawi in Kawlgam akipan gamtampi tak ah huhna apia ngei zong ahihi.VOA

·      Sengam nitumnalam pang Shanyang county sung teng men kicim a, Wuzhou  Suangmeihol laaknak khuk a nasem mi 44 te mencin August 13, 2015 ni in vuknelh a mi 4 bek kihonkhia zo in adangteng mangthang laai ci in Xinhua thukizaakna in pulaakkhia hi. CNN

Lungdam mahmah

Thang Khawm Pauzomi

Tulaai Leitung Thuthang Tuamtuam Updates August9, 2015

·      Kawlgam Tuikhan nahang in August 8, 2015 niciang akisam huhna sum $47 million kisam mawk ahihman in UN ten $9 million piakhia uha, US ten  $600,000, Japan ten $150,000, Vietnam ten $20,000 man tuisiang leh India ten Buhtang Ip 1,000 cihdan teng piakhia uhhi. Apia nuam gamtuamtuam leh NGO tuamtuam naaktam lua mahmah lai ahihman in azen zen in acimawh ten angahtakpi leh hauzo tangial ding in kilam en hi.VOA

·      Singapore gam atuama Beeltuam asuan zawh kum 50 cinna phawkna August 9, 2015 ni in nasiatak in bawlding in geelna nei uha, Agaalkaap neihsunsun teng mah diangsak phangphang in mipi atul sawmlo in nasiatak in muakding ci in taangkokhia uhhi.BBC

·      Afghanistan gam Kabul khuapi kiang ah August 8, 2015 ni in Taliban ten Bomb sukham uh ahihman in mi 22 si in pawlkhat liam uhhi. August 7,2015 ni mah in Kabul khuapi sung ah Taliban te in Bomb puakkhamsak uha, mi 50 si hi.CNN

·      Kawlgam Zogam nasiatak in Guahpi huihpi ongvaat zihziah khitciang August 8, 2015 ni in Taiwan vazial leuleu a  mi 5 si in pawlkhat aliam ban ah inn le lo nusia in pawlkhat kituah uhhi. Khawlsawmllo Sengam Fujian kuam teng August 9,2015 ni  nawkto leuleu a, mi 163,000 in inn le lo nusia in misi bangzah cih kitel nailo hi.BBC

Lungdam

Thang Khawm Pauzomi