Tulaai Leitung Thuthang Tuamtuam Updates Jan 31, 2015

·      IS migilo te in Japan gam thukan athah bang uh ahi Mr Kenji Goto angawngtan na uh Video online pan January 31, 2015 ni in khahkhia leuleu uhhi. Amah peen $200 million tawh tatding in IS ten Japan kumpi tetung ah anget uh ahihi. Hih thu hang in Japan gam sung mipi linglawng mahmah a Japan kumpi thunei ten bangci bang in thukkik ding cih thukin kikupna January 31, 2015 ni in bawlpah saisai uhhi.BBC

·      Bangladesh gam Dhaka khuapi sung a om Plastic Company khat Gas puahkhap nahang in January 31, 2015 ni in  meikaang a mi 13 si in pawlkhat in meikuang kawm ah cimawh in om uhhi. Bangladesh gam Dhaka khuapi ah kumpi thunei te gitnaatlohna hang in Company meikang leh kicim om tawntung hi. 2012 kum in meikang hang in mi 112 si a 2013 kum in inn kicim in mi 1,135 si uhhi.BBC

·      Germany President Lui Richard von Weizsaecker kum 94  Uhaam natna tawh January 31, 2015 ni in leitung nusiata ci in German President zumpi te in taangkokhia uhhi. Mr Richard in 1984-1994 kum 10 sung President seem a, Leitung gaalpi nihna laai in zong gaalkaap sem ngei hi.BBC

·      Ukraine gaalkaap te leh Russia te sawltak thautawi te kikaal kikaapna January 31, 2015 ni in piang a, langnih tuakpan tam simsim tuak asihban ah bangmah theilo mipi 12 sihlawh uhhi. Ukraine gam buaina hang in mi 5,100 sita a 280,000 in  inn le lo nusia  in taaikeek mang uhhi.VOA

Lungdam

Thang Khawm Pauzomi

Tulaai Leitung Thuthang Tuamtuam Updates Jan 30, 2015

·      Nashville., Music City ah January 31 ni kibawlding Naulak Beh pawi simding in mundang pan apainuam ten anuai mun ah napai unla, anuai a makaaite tawh na kithuza ciat ta un. Naulak Beh akua mapeuh paiham tang un Bawng tampi kigoding cihi. Sia Piang@615-6893544, Sia Lampi@504-3143127,Thein Thang@9018461494,Tg Thuamlian@615-4741017,Deih Lian@615-4746107.

Pawi Bawl Nading Mun

3504 Paragon Dr

Nashville,TN37211

Hungeelna

Meeting- 1pm-4pm

Ann neekna-5pm-6pm

Hunbawlna-6pm-8pm

Hun Ukding-Sia Lampi

Hun zangding-Rev Dr Dal Deih Piang

Behthu genna-Pa TL Khup

Meeting ah Chair Person ding- Pa Thein Thang & Pa Thang Sian Tuang

·      Nobel minphatna angah Kawlgam Democracy makaai leh NLD makaaipi Daw Aung San Suu Kyi 1990-2000 kikaal a Inn sung ah kikhum cip theihnading a adaalna a Inn kongpi $200,000 tawh aleinuamte kituh sakziahziah ding ci in Su Kyi  nungzuite in January 30 ni in taangkokhia uhhi. Hih kongkhak peen Kawl kumpi te ado ngam cih hangsanna lahna in anaaipaak leh asan tawh 2007 kumpan aza kizuut ahihi. Akikhot hunhun ah asumte NLD party zumpi a zatding in geelna nei uhhi.BBC

·      IS migilo te gaalvan lauhuai lamsang atheipeen leh amakaaipi uh ahi Abu Malik US leh apawl ten vanlamtawh bomb akhiatna hang in January 24 ni in golum uhhi ci in January 30 ni in taangkokhia uhhi.BBC

·      Pakistan gam neellam a om Shikarpur District sung a om Shia Muslim te Biak innpi ah January 30 ni in thungen kisa tawpung seuseu a aom laaitak un bomb puakkham a mi 59 si in tamkhop khat liam uhhi. Thuneite genna ah misi kibehlap toto laaiding ci uhhi. January 30 ni mah in Sunni Muslim te kipha sak lua mahmah uh ahihman kovik hi ci in taangkokhia uhhi.BBC

·      2012 Kum President Obama  Republican party pan adem a aleldeuh Mitt Romney in bangbang ahizong kateek kaguai tawh kanasep lah tammahmah ahihman in 2016 kum President demkik ning kacih peen demnawnlo maiding in kakhensatta hi ci in January 30 ni in taangkokhia hi.BBC

·      Israel leh Lebanon gam pansan Hezbollah gaalkaap te kikaap buai in Israel gaalkaap 3 leh UN nasem khat asihzawh ciang Isreal gawiding in geelna aneihkawmkaal un Hezbollah makaai Hassan Nasrallah in Israel tawh kakido nuam hetkei uha, ahizong in akuulleh banghun banghun a kisuthei ding in kigingsa in ka om uh ci in January 30 ni in taangkokhia hi. Muhnop to zeekding in ilam en hi.VOA

·      December kha 20,2014 ni a Kachin Siama nih abuanlum ding a upmawh kawlgam gaalkaap mi 25 leh khua sungmi 10 tu khuahun tawh kituak in khial maw khiallo cih DNA kila ding a Siamah nihte DNA tawh sittel khawmding ci in Shangam Palik zalian U San Lwin in January 30 ni in genkhia hi.Hih thu ah thuman apian theihna ding in USA ten huhding ci uhhi.AFP

Lungdam

Tuni zekai kha

Thang Khawm Pauzomi

Tulaai Leitung Thuthang Tuamtuam Updates Jan 28, 2015

·      USA gam sung ah amasa peen Naulak Beh pawipi Music City  ah ongtungding January 31 niciang kibawlding a, USA gam muntuamtuam pan Beh pawi simding in kithawi ziahziah ta uhhi. Nashville, Music City sung bekbek ah Naulak Beh mimal 200 vaaldeuh om uha, Muntuamtuam pan paiteng tawh mi 1,000 bang kipha ding in lam etna nei uhhi.Naulak acih peen Zomi te sung ah khangsimna Beh min khat ahihi. Naulak Beh Tanupawl

·      USA gam ah teen nading mun koiteng hoihpeen hiam ci in mitampi te kibuai mahmah ciat a, pawlkhat ten khuapi sung mah hileh khuata lua peen piangkei acitawh nasep tamna acitawh, sanghoihna acitawh, Zomi tamna acitawh, Pawlpi biakpiakna anopna mun aci tawh atuamtuam in ummawhtek kisansaat in Zomi sung ah kigen ngeingai tek hi. Hih bang muhna bilbial kawmkaal ah keimuhna ahileh US gam peen koikoi khuapi khuata lampi,inn,mei,mawtaw kibang khin a khuapi khuata na omsak leh namit a  “tawta” hiding in ka umzaw hi. Sang leuleu peen koikoi ah nakah zong in napil naak leh sanghoih ah ongkisamding ahihi. Zomi tamna cih leuleu tawh kisai in khatna ah na bill Zomi ten ongpiaksak loding hi. Na omna peuhpeuh ah gina in mimuan misuan in na omnaak leh Zomi ongtamlel ding hi. Pawlpi zong tua bangmah in kamu lel hi. Tun kei ngaihsutna leh athupi peen a kangaihsut in koikoi ah na omzong in sumluut “income” kician naneih peelmawh kisam masa hi. Kaalkhat na nasepna thaman sum paycheck khat tawh na innsaap acin kei leh tua na omna mun pan nakhangto pak keiding a na ading in zong teenna ding mun hoih kici theilo hi.  USA gam ah ataangpi in Kaalmasa-Innsaap, Kaalnihna- Mawtaw leh Insurance, Kaal thumna- Bill tuamtuam leh Innsung zattawm, Kaal 4 na khol khinkhian cihbang danding ahihi. Tua ahihman USA gam ah na teenna ding ahoih peen mun in na kaalkhat nitha Innsaap acinna mun hi cih kei muhna ahihi. Zomipau

·      Lebanon leh Israel gamgi a om Israel gaalkaap phualpi Lebanon pan Hezbollah migilo te in January 27 ni in kaap uha, Israel gaalkaap 4 liam ahihman in Israel ten Aksa mehsang kaduhzawk uh hih hi ei ci in January 28 in Lebanon gam tawlam teng Ngalbu zial in zial kipanpah uh ahihman langnih kikapna piang a Israel gaalkaap 2 leh UN gaalkaap 1  si uhhi. HIhthu hang in Prime Minister Benjamin Netanyahu leh a Cabinet te thukin kikupna January 28 niin neipah uha. Hezbollah ten amawhna thaman kimtak angah theihna ding un piading cihnopna ah umguigam maaiguigam bangsakding in kithukim uhhi. BBC

·      2011 North Korea gam thuneihna kheempeuh a um abeel a atuah khit ciang gampua apail nawn kilkello a Vokno dawng abang mimek  N-Korea Leikha Maangpi Kim Jong Un Russia gam ah May Kha sung pawisiim ding in Russia ten January 21 ni a asapna uh kongpai mahding hi ci in thu ongzasak kik ahihman in kavaai dawn dan ding uh kageel khol zihziah uh ci in  Russia President zum thusapi Dmitry Peskov in January 28 ni in kipaak tak in taangkokhia hi.BBC

·      US gamte bawlsak Vietnam gamte neihsa UH-1 Iroquois Helicopter khat  Ho Chi Minh khuapi vanleeng tualpan aleenkhiat zawh minutes 8 lianciang ahang kitheilo thu khat tawh January 28 ni in kia suk ek a atung atuang  Vietnam gaalkaap 4 atukna mun ah sipah uhhi.VOA

·      Apple Company te in leitung taangthu ah atuah ngeinaailo thukhat uh ahi sum le paai Meetna ngah uha, 2015 ai Quarter masa sumsimna aneih uhleh $18billion meet uh a mipi neihsa Company lak pan ameet peen in kiciamteh hi ci in January 28 ni in taangkokhia uhhi. Kha 3 sung bekbek in iPhone $74.5million zuakkhia ziau uha, iPhone 6, 6plus cihte bang abawl zahzah uh beipahpah ahihman in tuni dong kitaang lah keei uh ci zen hi.  Ahizong in kamsiatna ici diam a CEO pa bel Pasal hina pin papi-husband mah deihkhon mawk ven abangci ahitam maw.BBC

·      Pakistan leh Afghanistan gamgi dung a kibusa migilo te kuapi Pakistan gaalkaap ten Vanlamtawh January 28 ni in zial uha, migilo 76 kigozo ci in taangkokhia uhhi. Pakistan gaalkaap ten June,2014 pan kipan hihkuam aluh uh hi a, migilo 2,000 vaal gokhin in amau zong gaalkaap 200 suplawh khinta uhhi.VOA

·      Kawlgam sung a kumpi te kipsak sa ahi Pilna lamtawh kisai thukhun pi deihlo sangnaupang makaite leh Kawlgam kumpi uliante January 28 ni in kimukhawm uha, Hih thukhun tawh kisai puahphat theihnading in Kumpite,Pilna lam thuneite,Sangnaupang makaaite leh Parliament te kikumkhawm ding in thukimna ngahta uhhi.RFA

Lungdam

Thang Khawm Pauzomi

Tulaai Leitung Thuthang Tuamtuam Updates Jan 26, 2015

·      Spain gam NATO te gaalphualpi khat ahi Los Llano vanleeng tual ah Greek gamte gaalvanleeng F-16 khat Vanlaai ah hui siangtho diik kisin in aleng zialzial khit ciang leilak abawh kikna pan tukhial ahihman puakkham in mi 10 sipah a, 16 liam in zoto lam ah kipuakpah hi. Gaalvenleeng tung a tuangpa silo zaw in atukna mun a mite in sihlawh zaw uhhi.BBC

·      Philippine gam  tawlam Mindanao tuikulh tung aom Mamasapano khua sung a phualsaat Muslim gamnuai mite Philippine palik Commando pawl in  January 26 ni in abusimna pan langnih nasiatak kikap uha, Palik Commando mi 40-50 kikaal si hi ci in Philippine gam thunei te in taangkokhia uhhi. Zanni mah in palik ten Muslim gamnuai mi honkhat nago khin uhhi. BBC

·      India gam ah Carton limsuaih siam mahmah leh mipi te deihmahmah khat ahi RK Narayan kum 94 in India gam Pune khua pi a om Mangeshkar  zato pan January 26 ni in leitung nusia ta hi. Ama Carton suih te peen India gam mipi in iplah mahmah ahihman in The Time Of India thuthang te bang in kum 50 vaa; vilvel laaimaitang patna in nei tawntung uhhi. BBC

·      IS migilo te kha tampi tak amatcip uh Syria gam Kobani khuapi Kurdish gaalkaapte in ngahkik ta uha, hih khuapi pan IS migilo te kihawlkhin mang in khat  tapa zong omnawn kikel lo hi ci in January 26 ni in taangkokhia uhhi. IS pawl bel maw amasuan ding uh bing le taw ei. vOA

·      Malaysia gamte neihsa Vanlam khualzinna ahi Malaysia Air Line te Internet Website pi IS migilo ten January 26 ni in hack sak uh a , buai mahmah laaitak uh ahihi. HIh Website tung ah Ticket  leikhol te, customer te I passport nambat te  akipan thusim tampi tak om hi.Malaysia Airline pen hizah ta kamsia sese a migilo ten a etcik peen ahangkhat omkhading in ki ummawh hi.BBC

·      US gam khunglam mipi 20 million vaal atenna New York, New Jersey ,Connecticut leh Massachustts state 4 teng ah  Tuihkhal hualpi paiding ahihman in kuamah vaakkhia loding in thuneite in January 26 ni in taangkokhia uhhi.Hih thu hang in mipi te neekding neihlohding lau uh ahihman zingtung vanzuakna munte ah neek le dawn leikhol zihziah uh ahihman vanzuakna atamzaw hawmkhinta   hi.CNN

·      Mandalay khuapi pan Yangon khuapi dong Kawlgam kumpite pawl PIlsinna thukhun deihlohna alak Sangnau pangte MinChain-Sakol Huan khuapi January 26 ni in tungta uha, Sakol Huan University sangnaupang te tawh kipawl in University sung a kikhai kawlgam dialkhai paikhia in Sangnaupang kipawlna dialkhai khai ek uhhi. VOA

·      Kawlgam 2015 kawlgam kiteelpi ciang Party kheempeuh in demding in kigingsa in om ahihman in NLD zong takkheh ci in si le naang in kipan giapding in kakhensa uh ci in January 26 ni in taangkokhia uhhi. Ahizong in amautawh akithuah khawm Mualtungmi party te dem nading mun ah kademsawm kei uh ci uhi. Tedim kiim bang ah ZCD omkhin ahihman demlo ding uha, Tedim NLD-Zomi teng bang ZCD te mee tang khawng simsakding ahihkei leh asepding peuh mah uh omtuaklo hi. Irrawaddy

Lungdam na lawmlawm ei laai nongsim sak uh maw

Thang Khawm Pauzomi