Tulaai Leitung Thuthang Tuamtuam Updates Jan 1,2015

·      Sengam Shanghai  khuapi sung Chenyi Square huangsung ah 2015 kumthak dawn aom mipi nasiatak in kitawnggawp uha, ngongtatna tawh kizom tosuak ahihman in mi 35 si in 45 nasiatak in liam ci in Xinhua thukizaakna in genkhia hi. Mipi te kitotna athu thuneiten akan saan laaitak uh ahihi.bbcnews.com

·      Afghanistan gam Helmond Province sung Lashkar Gah khuapi ah 2015 kumthak tawh nuntaakna thak zangding ci Nupa kopkhat in mopawi December 31 ni kham uha, Mo te bansahding in mipi akigualh diudeu laaitak Rocket thautang khat mipi lak ah tu in puakkham a, mi 15 si in naupang 9 mangcip in numei naupang 40 nasiatak in liam uhhi.bbcnews.com

·      Yemen gam IBB khuapi sung ah Houthi migilo te in 2015 kumthak dawnding leh Kamsaang Mohammed suahpawi dawnding in December 31 ni aso litlit laaitak migilo khat bomb tawh amah le amah kipuakkham sak a mi 33 si in pawlkhat liam uha aliam lak ah IBB Governor pa zong kihel hi.bbcnews.com

·      Philippine gam tawlam teng ah December 31 ni huihpi leh guahpi hang in misi 53 cingto ta a, Inn le lo te tui in tuumcip ahihman in mimal 80,000 a inn alo tek uhpan kumpi thunei te in nawnkhia uhhi. Hui huihpi leh guahpi hangmah in Malaysia gam ah mipi 145,000 in inn le lo nusia in kumpi te geelsakna buuk te ah kumthak adawn ding uh ahihi.

·      Greek gam tuipi tung ah gaaltaai mi 970 apua Cargo Tembaw pi khat tembawhawl ten taaisan in tuipi tung ah  December 31 ni in nusia uha, Italy gunpangcing gaalkaapte namu in hotkhiat kipanpah uha, mi 35 zato puakpak in mi adangteng honkhia in Italy gam Gallipoli tembaw khawlna ah koihphot uhhi. Hih gaaltaai te peen Syria minam leh Kurd minamte hi ci in gen uhhi.

·      UN Security Council te in Palestine gam Israel khutnuai pan tuankhia in asuakta gamkhat ding ding in mee khiatna December 30, 2014 ni in nei uha, US leh Australia ten piaklohding in meekhia uh ahihman in ngahzolo uhhi. Hih thu hang in Palestine te lungkimlo uha, Israel te International Criminal Court ah khiat theih nading in Palestine President Mahmoud Abbas in December 31 ni in  ICC member suahnading ngetna suai kaaita hi. Israel Prime Minister Benjamin Netanyahu inbel ICC ten member in saang a Israel ongsuk khak uhleh tangkhatui hawpkhading ci giap hi. Palestine te gamtatdaan peen lungman huai mahmah mai ci in White House thusa Jeff Rathke in December 31 ni in genkhia hi.

·      India leh Pakistan gamgi Jammu leh Kashmir khua sung ah 2014 kum mangpha khakna leh 2015 kumthak muakna in India Border Force te in Pakistan gaalkaap 4 go hi ci in Indian Border Force te in December 31 ni in taangkokhia uhhi.Kum kipat kithahna tawh panpah uh ahihman in 2015 kumsung India leh Pakistan kikaal maban limci mahmah kha ding hi. voanews.com

·      US leh alawm te in kumlui mangpha khakna in Syria gam sung a IS te phualpi mi 7 leh Iraq gamsung a IS te phualpi mun 3 December 31 ni in nasiatak in vanlamtawh bomb khiatsuak uha, mimal asizah kithei lo in IS te inn le lo gaalvan tamsimsim suksiatsak hi ci in US leh apawlten thusuah bawlkhia uhhi. voanews.com

·      Kachin gam Waimaw Township Kanpathi khua a om Kachin mipi gaaltaai te bukna buuk December 29-30 sung zan thapaai meikaang a inn 80 kaangtum ahihman in mipi 500 omnading inn le lo buuk neilo in nahtheltung ah kumthak khittui naptui tawh ngak ngiungeu uhhi.RFA

·      December 22 ni a Letpadaung mual buaina pan kawlgam palik te gawhlup lokhomi Pi Khin Win sihna thu kantel ding in Kawlgam Mihing ngahding hamphatna veeng kipawlna pan ulian 3 te December 31 ni in Saalin Township tungta uhhi. asihnading kikapkha ahihman in si hi cilelding in kilam en a mipi in muaktangtang khollo uhhi. RFA

·      Indonesia gam Java tuipi tung a akia Air Asia 8501 vanleeng zongpawl in ani 4 na December 31 ni in zongto thei uha, Vanleeng tunga  avan pawlkhat leh misi khat muhbeh uhhi. Tu in misi pasal 4 leh numei 3 avek in 7 tawmkhinta uha, US,AU,Malaysia,Indonesia gamte pan Navy Tembaw te kipei ziahziah laaitak uh ahihi. Misi 2 I aluanghawm Surabaya khuapi vanleengtual December 31 ni in tungta a, kuami kuasa cih misite sanggamte DNA leh Misi te DNA asit saanlaaitak uh ahihi. Mi tampi te in 2015 kumthak lungdamna tawh muakziahiziah in aso khengkhang laaitak in misite innkuanpih te ading in nisaukhia mahmah hi.

Lungdam

Thang Khawm Pauzomi

Tulaai Leitung Thuthang Tuamtuam Updates Dec 31, 2014

·      December 28 ni a Indonesia leh Singapore kikaal a mang Malaysia gamte neihsa Air Asia Airbus 320-200 Flight QZ8501 Java tupi tung ah kia hiding in Indonesia mihonkhia pawl in akipsak ban uhah azon zawh uh ani 3 na ni December 30, 2014 ni in Vanleng them pawlkhat leh misi luang 6 mukhia ta uhhi. Misi te lak ah khat peen numei hi in Vanleeng nungak te puan nasilh ahihman in mantaktak ei cithei ta uhhi.  Ni 4 na December 31 ni nasiatak in misi tawm ding leh vanleeng themnen te zong ding in akipat uhleh huihpi leh tuihual khauhlua ahihman limtak zongtheilo uhhi. Misi luangte peen Indonesia gam Surabaya khuapi puakding in lamkaal omlaaitak a misite tanauten khitui mualtuangsa in ngakgige bekthamlo December 30, 2014 zinglam in kihokhialhna hang in misi luang 40 kimu cihthukhat gingkhial ahihman in misi puading Ambulance mawtaw 40 bangkigual diudeu sa in nangak uhhi. bbcnews.com

·      Iraq gam Baghdad khuapi khunglam a om IS migilo ukcip Dhuluiya khuapi  December 30, 2014 ni in Iraq gaalkaap te leh Shia Muslim thautawi te kipawl in nasiatak bumeek uha, IS migilo 300 kiim agawhlup khit uhciang IS te khutsung pan khuapi lakikzo uh ci in Iraq gaalkaapte in taangkokhia uhhi. I raq gamsung ah IS te mun toisemsem ban ah abeikuankuan hita ci in genbeh uhhi. bbcnews.com

·      Canada gam Edmonton khapi munthum ah kithahna om ci in December 30, 2014 ni in Palikten sapna ngah uha, avapai uhleh Ulian mi 7 munkhat ah nasi in adang naupang nih mundangkhat ah asisa in mu uhhi. Milian 7 lak ah khatpa peen amah le amah akithat hi ci in palik ten gen uha, banghang a kithat cihthu kansaan uhhi. Edmonton khua ah 1956 hibang in kilom thahna khatvei omngei ci in genbeh uhhi.bbcnews.com

·      US President luui ahi Mr George Bush Sr kum 90 kaal khat sung Huston Methodist Hospital Texas state ah alup khitciang nuamtuam zawdeuh in inn ah kikhoi ding in December 30, 2014 ni in zatopan tuakkhia ta ci in Bush thu gentheihna anei mimuanhuai ten genkhia uhhi Mr George Bush peen 1989-1993 sung US President aseem ahihi. Bbcnews.com

·      Scotland gam ah amasapeen neihkibang mopawi Glasgow khuapi ah Joe Schofield leh Malcolm Brone te in zusa leh zusa kitenna pawi  nasiatak in khaam uha, ani kibang mah in Susan leh Gerrie Douglas te in aisa leh aisa kitenna nasiatak in khaam uhhi. Mipi tampi tak in amuah ban ah First Minister nangawn in vamuak nong hi. Susan leh Gerrie bang kum 18 vivel akingai cidep sam hi. bbcnews.com

·      US ten Somalia gam a migilo al-Shabab Islamist te thukan makaaipipa  Abdishakur December 29 ni in Vanlaai saben in abenna pan golum ngawngaw ta ci in Somalia gam thunei te in December 30, 2014 ni in taangkokhia uhhi. Hih pa peen al-Shabab migilo ten koi tei susiading cih avankhol denkeei athunei mahmah pa ci uhhi. cnnnews.com

·      Sengam gam khanglam Foshan khuapi sung a om  Fuhua Engineering and Manufacturing Company December 31, 2014 ni in Company sung a kizang Gas puakkham a mi 17 sipah in adangtampi liam ban ah pawlkhat inn in vuknelh thunei te in honkhia saan laaitak uhhi. Southern Metropolis Daily’s website

·      Kum 29 apha nupilaa melhoih mahmah khat atapa kum 2 phapan khat tawh Hayde khua Idaho state,USA gam Wal-mart vanzuakna ah kumthak dawn nading vanleiding December 30, 2014 ni nikaai nai 5 pawl in pai uha, atapa vansawnna leengtung ah tuangsak in bangdeih, bang ongleisakding ci in akinohnoh kawm un atapa in anu sumbawm sung a thautom atang kithunsa lakhia in anukap ek ahihman in sipah hi. Hih nu peen Blackfoot,Idaho a teeng hi a Sisanlam suulkan mipil khat ahihi. Zomi te zong kidop huai mahmah hi.cnnnews.com

·      Philippine gam khanglam lloilo khuapi kiimteng huihpi leh guahpi in December 30, 2014 ni in nasiatak in nawkgawp a mi 21 si in inn le lo tampi asiat ban ah lampi lei cihte kikhakcip hi. Hih huihpi hang in mipi 90,000 bang in cihmawh lawhmawhna tuak uh hi ci in Philippine gam thunei te in genkhia uhhi. voanews.com

·      2015 kum beikuan pan 2016 sung in Europe gam adiak in Poland, Romania leh Baltic state te ah US ten Tanks 150 leh gaalkaap mawtaw alom atang in koihding a gaaldosinna nasiatak in khanding ci in Lieutenant General Ben Hodges  Comander of The US Army in Europe in Reuters  tetawh Phone tungtawn in thudotna pan December 30, 2014 ni in genkhia hi. Tulian in EU gamsung ah US gaalkaap 30,000 leh Gaalvanleeng hawl pawlkhat omlaai cizen hi. voanews.com

·      December 30 ni a kibawl A 69 veina UN khawmpi ah Kawlgam sung aom Rohinya minamte gammi piaknading, minam,biakna kideidanna abeinading kawlkumpi tawsawn ding in thukimna nei uhhi.Tua ban ah kawlgam I kikheelna hoihsa in tha apiakban vuah Kawlgam a zatding sum American Dollar Awn 1.18  thukimna nei uhhi. Hih thu hang in HRW Human Rights Watch kipawlna ten athukim mahmahna uh pulaakkhia uhhi.voanews.com

·      India nisuahnalam leh kawlgam gamgi dung kawlgam sunglam a om singnuai mi thautawi te  gamnih kipawl a ciman sakding in India Foreign Department ten Kawlgam kumpi te kiang ah ngetna bawl ci in India gam a kihawm The Asian Age thuthang in December 30, 2014 ni in gelhkhia hi. India leh Kawlgam gamgi kawlgam sunglam ah NDFB khutnaui mi 150 kiim, ULFA  khutnuaimi 200 kiim leh Manipur bulphuh singnuaimi pawl 1,500 vaal om ci in gen uhhi.FRA

Lungdam

Kumthak Hunnuam

2015 kum ah Zomi kheempeuh Topan ongtonpih ta hen

Thang Khawm Pauzomi

Tulaai Leitung Thuthang Tuamtuam Updates Dec 29-30, 2014

·      Kachin gam  Chikhuah township lagui khuakiang ah KIA gaalkaap te leh Kawlgam gaalkaap te December 28 ni in nasiatak in kikap uha, KIA gaalkaap khat si in KIA te thau khat leh atang tang 20 kawlgam gaalkaap ten matsak uhhi. December 29 ni in langnih pan lasaan uha, gaalgim nam viauviau hi. rfa.kachin news

·      Greece gam Corfu leh a December 28 ni a akang Norman Atlantic tembawpi tungtuang misi 10 December 29 ni in phata a acianlaai mihing 427 te cidamtak in kihonkhia khin zo hi ci in Khualzin gamvaaknalam Minister Maurizio Lupi in December 29 ni in genkhia hi.bbcnews.com

·      Indonesia gam leh Singapore gam kikaal a vanleeng kia peen Tuipi taw kawdok ah omhamtang ding hi cih ninih sung azonkhit uhciang Indonesia vanleeng zong makaaite in December 29 ni in genkhia uha, December 30 niciang abukmun uh khan in zongkikding uha, US kiang ah nonghuhloh uh phamawh hi ci in Indonesia ten ngen uhhi. cnnnews.com

·      Nigeria gam a kibusa Boko Haram migilo te gaalkaap 1,000 in  Cameron leh Nigeria gamgi dung a om khua 5 te December 28 ni in busim uh ahihman in Cameron gaalkaap te Boko Haran te phualpi teng December 29 ni in nasiatak in vanlam pan bomb khiat  uha, Boko Haram migilo 40 si in Cameron gaalkaap 1 si hi. bbcnews.com

·      Liberia gam sung ah Ebola natna khang semsem ahihman in Ebola natna tawh asite vui nading in acre 50 haanthak December 29 ni in honna nei uhhi. Liberia,Sierra, Leone leh Guinea gamte pan misi 20,000 cingta ci in WHO leitung cidamna encik pawl in genkhia uhhi. bbcnews.com

·      Iraq gam khuapi Baghdad  khuapi kiang a om Samarra khuapi IS migilo te in December 28 ni in buluh uha, Khuapi daalzawh nading in Iran gaalkaap ten ahuhna pan Iran gaalkaap mang khat ahi Brigadier General Hamid Taqavi si in pawlkhat liam uhhi ci in Iran kumpi thunei te in December 29 ni in taangkokhia uhhi. voanews.com

Lungdam

Thang Khawm Pauzomi

Tulaai Leitung Thuthang Tuamtuam Updates Dec 29, 2014

·      Greece gam Corfu tembaw khawlna pan Italy gam Ancona tembaw khawlna zuan a apai Tembawpi mi 478 khualzinmi apua khat lamkaal tuipi tung ah December 28 ni in kaang a mikhat alualua in Tembaw tungpan natuak a sipah in adangkhat zong atuahna pan liam hi. Italy gam leh Greece gamte pan Helicopter leh tembaw tawh nasiatak honkhia uha, mi 190 bek honkhia zopan in Khuahun siatluatna hang in mi 280 honkhia zonailo uhhi. Lungdam leh kumthak hunnuam zangding a kiging uh himah leh Tembaw sung ah sihding hinding kitello in mi 280 in kahna leh hagawina tawh taikhua vaal uhhi. Khualzinmi atamzaw peen Greek minam hi in adang Italy,Turkey,Albania,Germany cihte leh adang gamte pan ci uhhi. bbcnews.com

·      December 28 ni a Indonesia gampan Singapore gamlam zuan a aleeng Air Asia AirBus A320-200 Flight Qz8501 khualzinmi 162 tawh amangcip tunidong kimuzonailo a Indonesia ten Tembaw 12,Helicopter 3 leh gaalvanleeng 5 tawh asun azan in zongmah leh muzonaailo in zongsaan laaitak uhhi. Tua ban ah Malaysia ,Singapore leh Australia gamte in zong zonpih ngeingaai uhhi. Vanleeng manzia peen Surabaya ,Indonesia pan Singapore lamzuan lamkim atun laaitak Khuahun sia in meisahlua ahihman in meeipelh ding in pi 38,000 ah kahto ding in abullampan thupia uha, khuahun sia ahihman kahto theipaklo in abullam te adawnnawnloh ban ah kihopih thei nawnlo in vanleeng atun abanna Rader in manthei nawnlo ahihman in akia hiding in lam etna tamzaw hi. Hih vanleeng peen, November 16 ni in asset khat vei kipuah hia, asetpeen French-American centure CFM International te bawl ahihi.Tumahmah lian thuthang kizaakna ah Vanleeng peen Rader in tuipi taw kawdok ah om cihi ci in Indonesia gam thunei te in genkhia uhhi. bbcnews.com

·      Italy gamsung tuipi tung ah December 28 ni in Turkey gamte Tembaw mi 11 apua khat leh Italy te Tembaw khat  kinawkkha a, mi 2 phualsihpah in mi 4 atun abanna kithei zonaailo ci in Italy tuipi paangcing gaalkaap te in genkhia uhhi.

·      Afghanistan gam ah US leh NATO gampawl te in kum 13 si le naaitawh gaaldona tawh kisai mahialna December 28 ni in Babul khuapi kiang NATO phualpi ah pawipi khat khaam uhhi. January 1,2015 nipan US gaalkaap 11,000 te in Afghanistan gaalkaap te siamsinsakbek ding uha gaaldo nawnlo ding uhhi. Hih kum 13 gaaldona peen 2001 kum September 11 ni Osama Binladen in WTC  aphulkhapna pan ongkipan hia, kum 13 sung in US gaalkaap 2,224 in anuntaakna uh beilawh in NATO gampawl paltan 3,500 in anuntaakna uh beilawj uhhi. Hih kum 13 sung gaaldona ah leitung gam 50 in amunmunpan US tetawh naseemkhawm uhhi. Hih pawipi amankhit phet lian in Taliban migilo pawlte Tanupipa Zabihullah Mujahid  in Taliban ten gaaldona khansemsem ding hi ci in taangko hi.

Lungdam

Thang Khawm Pauzomi