Tulaai Leitung Thuthang Tuamtuam Updates December 29,2015

Tulaai Leitung Thuthang Tuamtuam Updates December 29,2015

·      Pakistan gam khunglam a om Mardan khuapi ah December 29, 2015 ni in atha haat mahmah Bomb tawh mikhat mihon lak ah kipuakkham sak a, mi 26 sipah in mi 45 liam uhhi. Hih peen IS migilo ten kosephi a Asia gamlam ah nasep kipatnading a asinna hi ciin genkhia uhhi. Hih Bomb puahkhapna tawh kizom ding a upmawh mi 13 Pakistan thunei ten manpah uhhi.BBC

·      Kumthak nuamtak leh kipaak tak in dawn ziahziahding ci in mikheempeuh akigin litlit laaitak in December 28,29 sung USA gam Missouri State sung ah  mi 13 si  in Lampi tampi tak kikhak a Inn le lo neihsa Mawtaw tampi tui in tumcip ci in MO Governor Jay Nixon in December 29, 2015  ni in genkhia hi. Tuaban ah muntam simsim akizopna St Louis Khuapi kiang a om Tai 5 azai  Mississippi Gunpi peen khanglua ahihma in kikhakphot ci uhhi.BBC

·      North Korea Leikha Maangpi khat ahihban ah Worker’s Party I Secretary asem laaitak ahi Bu Kim Yang-gon  kum 73 in December 29, 2015 ni zingsang nai 6:15Am in Mawtaw kitaihna pan leitung nusia hi. Amah peen South Korea tawh kizopna lam ah zong zalian khat ci uhhi. December 31,2015 niciang Leikha Maangpipa Kim Yong Un in sihvuina neiding hi.CNN

·      Israel Prime Minister luui  Ehud Olmert kum 70 February 15,2016 pan asim kha 18 sung thongpi sung ah nasemding in Israel sangpeen thukhenzum ten December 29, 2015 ni in khensat uhhi. Amah peen $130,000  thumanlo a neeksimna tawh 2004 kum a Thukhenzum nuainung pan kum 4 thongkia ding a akhensatsa uh tu in akikhiam ahihi. Israel kumpi zalian lakpan thongsung atung masapeen in kiciam teh hi. BBC

·      Iraq gaalkaap te in IS misok te khut sungpan Ramadi khuapi alaakzawh uh nikhat ni December 29, 2015 ni in Prime Minister Haider al- Abadi Ramadi khuapi vatung a gualzo  Iraq gaalkaap ten zahtaakna avapiak ban ah 2016 sung in Iraq gamsung pan IS beisak kiuhkeuh ding cihthu genkhia hi.VOA

·      November 13,2015 ni Piantit gam Paris khuapi sung a mi tampi IS ten athahna thu avaaihawm pa Charaffe al-Muadan December 24,2015 ni in US leh apawlte bomb khiatna pan Syria gam sung ah sikhin ci in US Gaalkaap Bu Steve Warren in December 29, 2015 ni in genkhia  a, Iraq leh Syria gam sung bekbek ah IS Makaai mi 10 kigozo hi ci in genkhia hi.VOA

Lungdam

Khialhna aom khaak aleh ngaihdam bawm ah maw

Thang Khawm Pauzomi

Tulaai Leitung Thuthang Tuamtuam Updates December 28,2015

Tulaai Leitung Thuthang Tuamtuam Updates December 28,2015

·      Iraq gam sung IS misok ten tukum May kha pan a ukcip uh Ramadi khuapi Iraq gaalkaap ten Tuma kaal khat pan atung anuai tawh asual ngeekngeek uh zo taktak ta uha, IS migilo tekhut sungpan kilakik taktak ta hi ci in December 28,2015 ni in taangkokhia uhhi. Hih gualzawhna peen anaaklungdam huai mahmah ahi ci in Prime Minister Haider al-Abadi in TV pan lawptak in genbuakbuak hi. Tuaban ah 2016 kum peen IS te zawhgawp kum Iraq gamte gualzawh taktak kumding hi ci in genbeh hi.BBC

·      Nigeria gam Adamawa state Madagali khuapi sung Vanzuakna phualpi leh Borno state Maiduguri khuapi sung ah December 28,2015 ni in ahun kibang in Boko Haram migilo ten Bomb puakkham sak uha, mi 50 vaal si in 100 vaal liam uhhi.BBC

·      Thailand gam Sumkuang Tuikulh tung a England gammi 2 that na tawh kisai a thahding a kikoih Kawlgam Tangvalno nih tetawh kisai in Kawlgam mi te in gamsung gampua ah lungkim lohna akilah zihziah ciang Thai Prime Minister Prayut Chan-ocha in dawnkikna Demcember 28,2015 ni in nei a, Hih bang ah khah un cih a mawk otot pongtawh thu apiangtheiding hinawnlo a thu peen thumah tawh sepding cih Thailand gamte thukhun ahihman in asangzaw thukhen zum pan Kawlgam kumpi ten in thu mahtawh adokikding ahihi ci in gen hi. Thu kizaakna nunung na ciang ah naupang nih peen Thailand Lawyer numei 2 leh kawl Numei khat in December 28,2015 ni in vamu uha, akiatna uh thong inn ah upmawhsang nuamzaw aci uh dam cihciang kiza hi.VOA

·      Shan gam sung adaih didee theih nading in huhtheihna aomdiam ci in gamveng Sen te Kawlgam Palaai pipa ahi Mr Hong Liang December 28, 2015 ni in Yangon khuapi sung a om SNLD zumpi va hawh a, SNLD makaaipi U Khun Tun Oo leh apawlte tawh vakimu uhhi. U Khun Tun Oo inzong nidang a zong onghawh ngei ngaplo tutung bang ongzong nahi uhhiam cigiap a Mr Hong Liang in zong ka policy uh kilaihta cipong ci hi.VOA

·      December 2-6,2015 sung Gallup poll kici leitung a mi pahtaak huaipeen kiteelna ah President Obama in 17% tawh akhatna ngah in Numei lampan Hillary Clinton in 13% tawh akideih peen ngah hi. President Obama peen hibang in akideihpeen mun ah 8 vei kiteel ngei khin a Hillary Clinton ahihleh 20 vei kiteel khinta hi. Gallup Poll peen USA gam State 50 sung leh Wasington DC sung a teeng mimal 824 te Phone tawh sam in akidong ahihi. Top 10 sung ah bel Pope Francis, Bill Gate,Dalai Lama, George W Bush, Bill Clinton,Donald Trump te kihel liamliam uhhi.CNN

·      Zeisu suah lungdam pawi sung December 22-27 kikaal sung in Mun khatkhat te ah lungnuamtak in zanhak in Zeisu suahdawn in lam in idian ziahziah laaitak in Texas, Oklahoma, Arkansas, Tennessee, Mississippi State sung teng Huihpi leh guahpi in nasiatak in nawkgawp ahihman in mi 43 si in Inn le lo Mawtaw Lampi tampi tak kisia hi.BBC

·      Philippine leh China te akituh nilohna uh ahi South China Sea tung ah December 26,2015 ni in Philippine sangnaupang mi   50 lungphona lakding in Pagasa tuikulh tung ah vatu ngiau uhhi. Hih thu hang in China te heh khia mahmah uha, Gampua tawh kizopna Tanu pi Pu Lu Kang in Philippine te aw ongthuum ngeetngut ung hih sangnau pang 50 te lakhia kik pan un nahtang um kakhiat ma un ci in December 28,2015 ni in kam nunung vaaikhakna neita hi.BBC

·      Leitung Tukpeeng siam gampian teng ahi Paraguay, Brazil,Agentina,Uruguay  gam teng ah Lungdam pawikhit lian December 26 nipan kipan nasiatak in guahzu ahihman in tuikhang a, December 28,2015 niciang mi 10 sita in mipi 150,000 vaal in inn le lo te nusia in tuigaal taaikeek mang uhhi. Hih peen tuma kum 50 pan ahuaisia peen hiding in gen uha, donghu pakding in 3=$3.5million kisam ci uhhi.BBC

Lungdam

Thang Khawm Pauzomi

Tulaai Leitung Thuthang Tuamtuam Updates December 24,2015

Tulaai Leitung Thuthang Tuamtuam Updates December 24,2015

·      UK gammi  David Miller kum 24 leh Hannah  Witheridge  kum 23 te Thailand gam Koh Tao tuikulh tung ah September 15,2014  ni in akithahna tawh kisai in Kawlgam mi Zaw Lin leh Wai Phyo te mithat hiding in aki upmawhna pan amawhna uh kimuta ahihman in December 24, 2015 ni in Thailand gam Koh Samui thukhen zumpi te hih kawlgam mi geel zong thahding in thukhenta uhhi. Hih peen misi Nu DNA leh Kawl pasal I DNA asit ban ah misi nihlak ah a Numei zawpeen kibuan ahihman in ( Asaval tuamna) condom te, zasum tawng leh amithahna uh tupeek tetung tawn a kikipsak ci in thukhen zum ten gen uhhi. Kawlgam mi 2 lampan apang thusuutsiam (Lawyer) pan bel ni 7 sung in appeal kikding DNA te kibanglo ci in gen hi.  BBC

·      USA gam ko teenna khangdeuh Tennessee state sung leh Mississippi gundung ten gah Tornado huih leh guahpi in December 23, 2015 ni in nasiatak in nawk ahihman in mi 6 si in mi 24 liam uhhi. Tua ban ah kumpi thunei te in Tennessee sung  kidawm ding in mipi thupiakna Level 3, state emergency bawl uhhi. BuzzfeesStorm.com

·      Saudi Arabia gam Jazan khuapi sung a om Zato pi khat December 23, 2015 n in meikaang a mi 25 si in 107 liam ci in General Directorate of Civil Defense ten Twitter pan  taangkokhia uhhi.KSA_998

·      Tunaai Russia te in Syria gam sung a gamsung mite Bomb akhiatna hang  un Homs,Adllib leh Aleppo kuam sungteng Nautangmi civilians mi 200 si ahihman in leitungbup thukhun pi Russia ten palsat uhhi ci in December 23, 2015 ni in Amnesty International te in taangkokhia uhhi. Hih thu tawh kisai in Russia ten nawhsatak in thalnial pah uha, pilvaang tak a singnuaimi te bek kikaap hi ci uhhi. Tua ban ah Mr Putin in akuul leh Gaalvan hoih nono zatsawmlaai ung cihsan hi. CNN

·      December 21,2015 ni in Afghanistan gam  US te gaalphualpi khat ah Taliban misok te khat bomb tawh puakkham khawm a, US gaalkaap  mi 6 si uhhi. Tua asi mi 6 te lak ah athulam dang mahmah khat ah suakta tak a neihkibang pipi kiteenna abawlmasa gaalkaap khat kihel hi. BBC

·      Russia President Vladimir Putin leh  Israel Prime Minister Benjamin Netanyahu December 22,2015 ni in Phone tawh nasiatak in thukikupna nei uha, Syria gam vik danding leh Middle East sung a mi ngongtat te lampi tuamtuam zang in Russia leh Israel ten vikhuan ding in kithukimna nei uhhi.VOA

·      South Korea gam te thusiamna tawh amasa peen Thai leh Kawlgam gamgi gaaltaai buk pan Karen Innkuan 4 mimal 22 South Korea gam cidam in tungta uha, F-2 kici omtheihna tawh omsak phot uhhi. Hih peen tuma kha 5 laai UNHCR leh Korea te kithukimna hi a 2017 ciang Kawlgam mite asinna dan in ongla zeuhzeuh ding dan ci uhhi.VOA

·      Rakhaing gam sung a Rakhaing minam kipawlna tuamtuam pan makaaipi 100 vaal kimuhkhopna December 24,2015 ni in neikhawm uha, Rakhaing gam sung ah Chief Minister aseemding peen Rakhaing gamsung a mun tam azo peente sepsakding in ngetna bawl uhhi. Rakhaing gam sung ah 2015 kiteelna ah Rakhaing party ahi ANP ten mun 23 , NLD ten mun 9 leh USDP ten mun 3 ah gualzo uhhi.VOA

Lungdam

Khialna aom leh ngaihdam bawm ah maw

Happy Christmas & Happy New Year  

Tulaai Leitung Thuthang Tuamtuam Updates December 5,2015

Tulaai Leitung Thuthang Tuamtuam Updates December 5,2015

·      Thailand gam azin Russia gammi te asuamding in Syria gam pan IS migilo mi 10 October khansung in zinkhia uha, Khuapi zawdeuh Russia gammi te tamna munte ah lauhuaiding hi cihthu Russia thukante in Thailand Palikte tung ah December 4,2015 zasak hi. Bangkok khawng ah Zomi a omkhaak leh kidop huai mahmah ding hi. Kumkhat Thailand gam azin Russia gammi peen 1.5million bang pha thei cimawk hi.CNN

·      Russia, US leh Piantit gamte asuam khit uhciang azom ah UK ten thuakding ci in IS ten December 4,2015 ni in taangkokhia leuleu uhhi. Hih peen British Parliament in IS te nasia tak a Bomb khiatding athukim na uh athuhkikna zong ahihi. UK Galvanleeng RAF Tornadoes 4 tawh amasa peen Syria gamsung a IS te namgimtui phualpi teng December 3,2015 ni in ban phialsak a IS te zawmzo ding in lam en uhhi. Anihveina December 5,2015 ni in Tornado Gaalvanleeng 2 tawh cimphawng in Omar Namgimtui phualpi banzial phei leuleu ci in Defense Secretary Michael Fallon in genkhia hi. BBC

·      IS abuaipih masa peenpeen leh amakaai ahi US ten Kha 15 sung IS migilo te adona vuah Bomb tang 20,000 zangkhin uha, zonaai dello uh ahihman in tuta abatleh US Bomb tang beithei ding a tampi order kuulding ci in US Vanlam gaalkaap ten December 4,2015 ni in genkhia uhhi.CNN

·      US gam California state San Bernardino khuapi December 2,2015 ni  a mikap te peen Muslim biakna zui Syed Rizwan Farook kum 28 leh azi Tashfeen Malik kum 27 te hi uha, Terrorist- Ngongtatna hi ci in FBI ten December 4,2015 ni in taangkokhia uhhi.  HIh Nupa te peen upmawh huaideklo Ata uhzong kha 6 phapan a a Pi tawh Inn ah koihliang a mi avakap cizen uhhi.IS migilo ten Hih Salpha nihpeen ko ongpanpih Salpha te hi ci in December 5,2015 ni in taangkokhia uhhi. US gam a om Zomi ten I Innveeng ah zong IS omgige cih mangngilh kei tapeuh ni.CNN

·      India gam Chennai khuapi sung tuicin tun nahang in mi 18 si a khuapi sung tui in tumdipdep mawk ahihman in kumpi thunei ten gaaltaai phual 25 saatsak in mipi 7,000 December 5,2015 in honkhia khinzo uhhi. Tuma kum 100 pan tutung a guah peen atampeen in gen uhhi. Tamil Nadu state sung ah tuicin hang in misi 269 phata hi. India Prime Minister Naredra Modi inbel $150m tawh huhding in kamciam piapongphot hi.BBC

·      Germany te zong omthei nawn mahmahlo IS vuih le vaai suaksak ding kua teng thukim ci in Parliament ah December 4,2015 ni in Meekhiatna nei uha, 445deih-146deihlo tawh vikding in thukimna ngah uhhi. Gaalkaap zanei mi 1,200, avui atang kicing Tornado Gaalvanleeng te leh Meituipuak vanleengpi te paisakpahding in solitlit ta uhhi.  Germany in bel Piantit,Britain,US,Russia tetawh kipawlselo in atuam in amau utnakhat sualding ci in gen uhhi.VOA

·      Nigeria gam Abuja khuapi sung a om USA te Palaai zum-Embassy misok pawl in simding cihthu December 5,2015 ni in thukan ten mukhol uh ahihman in US gammi akiim naai a omte kidawmding in kumpi thunei ten taangkopah uhhi.VOA

Lungdam mahmah

Khialhna aom khaak aleh ngaihdam bawm ah maw

Thang Khawm Pauzomi