Tulaai Leitung Thuthang Tuamtuam Updates July 31, 2014

·      India gam Maharashtra state Pune khuapi ah tuma ni 4 pan kipan nasiatak in guahzu ahihman in July 30, 2014 ni in men kicim a inn 40 vuknelh in mihing 150-200 kikaal vuklum hi. Kumpi lam mihonkhia te  in July 30, 2014 ni inluang 21 khat lakhia zopan uha, adangeng zongsan uhhi. Hihmun peen Mumbai khuapi pan tai 90 na ah oma, tuhun tuukhun pawlta in mencim zeuhzeuh den himah leh tukum huaisia phadeuh hi.

·      US President Obama in Obama Care, Kum 5 sung Taliban te matsa US gaalkaap Bowe leh Taliban thongkia te akheekna, US gamsung ah Illegal aom khangno te agam uh apuakkikna cihte leh thu dangdang pawlkhat ah thuneihna khengvaal lua in zanghi ci in Republican Party (Ka-Party) te ngawhna US House Of Representative 225 thukhen zum tunding leh tunlohding mee tang khiatna July 30, 2014 ni in nei uha, 201 khat te  in thukim uh ahihman in President Obama thukhenzum ah atungding hita hi. Tu in Innpi Lawyer te in laaiphamawh teng kaaikhawm in apapai ding uh hita hi.

·      New York khuapi leh New Jersey kizopna leipi ahi George Washington Leipi tung ah 2014 kumsung bekbek in tuak a asi mi 13 phata in 2013 kum sung in mi 16 tuak in si ahihman in kuamah atuahtheih nawnloh nading in akiimteng dalbit tading ci in thunei te in July 30, 2014 ni in taangkokhia ta uhhi.

·      US gam I sum le paai zonna economics khathum ah khatveita etcianna aneihna uhah April-June khasung in 4% kahto a, July khasung bekbek inzong nasep 218,000 kipuangthak hi ci in US Department of Commerce te in July 30, 2014 ni in taangkokhia uhhi. US gam alungluut te ading in limci mahmah laai chiding hi.

·        July 17 ni a kikap khia Malaysia vanleeng MH17 kiatna mun ah Leitung thukan siamte aluut theihnading in Ukraine kumpi te in Tapong tetawh kido na nikhat khawl uha, July 31, 2014 ni in  Thukan siamte luut theita uhhi. Misi luang 80 bang cianlaaiding in ki ummawh ahihi.

·      Israel Hamas kidona nasia tektek a, tuma 24 sung in Palestien mimal 173 si uhhi. UN leh gamtuamtuam te in Israel te mawhsak in khaam uh himah leh Israel PM Benjamin Netanyahu in Gaza pan Hamas te Israel gamsung ongluutsimna kuahawm ( zusakua hilo deuh in Khamulkhua) teng suksiat khit lo in kuakua apauzong in kikhawllo ding a kizo nuammengmeng ahihman Gaza simding Israel gaalkaap 16,000 kibehlapding ci in July 31, 2014 niin genkhia hi. July 8 nipan tuni tan kidona ah Paestine mi 1,400 sita a hih 1,400 lak ah 400 Hamas migilo te hi in 1,000 mipi ahihi. Israel lam bek 58 sipan uhhi.

·      Israel gam te neihsa ahi Iron Dome kici thautang bengkhia ziauziau bawlna company nihte computer sungpan China te in laaithupi pawlkhat gukhia uhhi ci in July 31, 2014 ni in Israel thunei te in taangkokhia uhhi. Leitung ah guta a minthang zum zong azumthei lo Sendawi himai ta uh ei

Lungdam ei

Thang Khawm Pauzomi

Tulaai Leitung Thuthang Tuamtuam Updates July 30, 2014

Zomi te Tuanglam sau laaisin teh maw….

·      Laiza khuapi a kibawl Mualtungmi thautawi te thukikupna July 29 ni in zosiangta uha, Pawidawi mah in Zomi te abumzel hiam thupaipi 10 thukimna aneihna lak uhah Kawl kumpi tawh kilemna suaikaih abawl uhciang Suaikaai theiding tepeen Kawlkumpi do Mualtungmi thautawi pawl hiding, Kawlkumpi tawh kilemna abawlsa ahih ban ah Kawlgam sung a phualsaat hiding cisese uh ei. Zomi sung ah ongluut theikhading a kilam en ZRA hiven Pawidawi in ongheemkhia hiau ei. 2000 kumpawl in Pu Zo Khup (Former ZRA) in Kawlgam ading ZRA HQ pan phalna ongpia un vakipan nung acih hia phalna ngahlo hi.

·      Azenzen in tuahun in phalna nangah uh hileh CNF sang ki innteek zawtham ban ah akiseemtakpi ahihman makaailam hilai ding hihang.  Naakpi tak in na iseem zong in tutung Kawlgam Mualtungmi thautawi te leh Kawlkumpi kihona ah satan angahzolo phot ihihi. Lam et na nengkhat bel omlaai banghiam cihleh Mualtung thautawi teng leh kawlten kilemna suai ongkaaikhin leh political dialogue ongbawlding uha, tuamun ah gamsung mualtungmi politics semtaktak ahi UNA lotawh vaai onghawm theilo ding uh ahihman UNA innteek mahmah ahi ZCD ineilaai hi. Tua ahihman in maailam saupi bel theikhang in tutadih in kawlgam politics tawh akinahvawh nuam Zomi ten ZCD lo panpihding inei kei hi. Hih kawlte leh Mualtungmi thautawi teng ongkithu hual leh ataktak in KIO losiah gilkial a puuksi dekdek vive ahihman kawlten ann tawh akam uh onghulelding a kawlgam thautawi teng ongmeekneen lel ding ahihman Zomi te ading ilampi sau mahmah laai kasa hi.

·      Anui aom mahbang in adah akap om akicih mahbang in Gaza khuapi ah kahna leh hagawina tawh kidim ban ah khimkhua zing in si le naai meikuang tawh kidim zihziah hi. July 30 zingsang lam in Israel ten vanlam leh leilam tawh zial Palestine mi 20 si  uhhi. Nikaai lamciang khawllo in zialsuak uh ahihman in mi 32 si in Gaza khuapi sung mei piakna phualpi suksiatsak uh ahihman in khimkhua zingta hi. July ni 8 nipan tuni ciang Israel leh Hamas kidona ah Palestine te 1,200 sita in 6,700 liam uhhi. Gaza khuapi vut le vaai asuakphial ta cileeng kikhiallo ding hi. Israel lam a hihleh paltan 53 si in Israel nautaangmi 2 leh Thailand gammi naseem khat tawh akigawmvekpi 56 sita uhhi. Kuakua apau zong in Gaza pan Hamas te Israel sung aluutsimna kuahawm leh akizopna teng susia lo in gaaldo khawlloding ci in PM Benjamin Netanyahu in July 28 ni in gaalkaap te thupia hi. Hici bang in misitam in supna baaina tam himah leh kilemding a utlo zaw peen Hamas te hilailai hi.

·      1945 kum August ni 6 ni  leitung gaalpi nihna laai a Japan gam  Hiroshima Bomb khia in mipi  140,000 asisak Enola Gay Vanleeng  naseem lakpan khatbek adamlaai ahi Theodore Van Kirk  kum 93  atenna Georgia state pan July 29 ni in leitung nusia ta hi. Van ah bangtha man ngah in na umvua ahihkeh hell ah maw ???

·      UK kumpi te in ongtungding 2015 kumciang ahawl kisamlo or hawl akuullo mawtaw te lampi tung kheempeuh ah paithei ding in phalna piatading ci in July 30 ni in taangkokhia ta uhhi. Tulaai tak in hih ahawl kisamlo  mawtawte amau aituam lampi tungbek ah akipaisak phot ahihi.

·      Guinea gam Conakry khuapi ah Muslim biakna zuite in Ramadan antanpawi zawhna pawipi leh lasakna lamna pawikhat July 30 ni in nasiatak in bawl uha, mipi te thakhat in lauvat in taaikeek in kiphu gawp ahihman in mihing 24 kiphuullum in 30 vaal husam in naakzolo uhhi.Mipi te lauvatna thu ahaang kithei naailo phot hi.

·      Canada gamte I National Research Council te I computer teng China thukan te in July 30 ni in nasuakbuai sak gawp uha, Canada gambup phial kumpi zumteng buai khengkhang uhhi. Canada Foreign Minister John Baird China gam Beijing ah sum le paai vaaitawh azinlaaitak ahihman in China Foreign Minister Wang Yi tawh akimuh khitteh China ten Zo zuu naluup in kilem kikthei bilbel uhhi.

·      India gam saklam Himachai Pradesh state sung Shimla District sung khualzinna lampi khat ah khualzin mi 36 apua Bus pi khat mualtung lampi pan kibung in saukhop khat kikhuuk ahihman mi 21 numei 10 leh naupang  2 akihel sipah in 15 te naakpi in liam uhhi. Kawlgamte bang in India gam lampi hoih mahmah icihdep cileeng 2013 kum sung bekbek in lampitung accident tawh mi 138,000-simawk uhhi.

·      Russia te in tusung asawtnaailo khat in agamla kaapna thaupi khat lawnkhia hi ci in New York times te in pulaakkhia uha, Tuatawh kisai in 1987 kum a US leh Russia te thukimna Russia ten palsat hi ci in President Obama in July 29 ni in taangkokhia hi. HIh 1987 kum US Russia thukimna ah thaupi tai 300-3,400 ciang kapna te mawklot loding cih thukimna hi a, President Ronald Reagan leh Mikhail Gorbachev te in suaikaai uhhi. Hih tawh kisai kawm Ukraine gam vaai a Russia ten gaalvan ahuhna , Malaysia Vanleeng kikaapkhiatna cihte kigawmkhawm in President Obama leh EU kumpi teng  July 30 ni in Teleconference nei uha  Russia ahitheizah a gaakcipding in kithukim  uhhi. Russia te bel azalo bang in daaididee zawzen phot uhhi. EU leh US te khaktancip Mihaute sum akisap zahzah uh Russia Central Bank in huhding ci in July 30 ni in taangkokhia uhhi.

·      Libya gam ah mihing zong omlaai mahmahding hiam cihnop huai kawmkaal ah July 30 ni in Islamist tapong te in kumpi te khutsung pan Benghazi khuapi sutkhia ek uhhi. Tripoli khuapi  a om nagimtui khawlna huangpi zong hite kidona hangmah in tuma ninih laaipan meikaang a tudong kiphelh zonaailo ahihman Italy ten kongphelhsak uhdiam ci in July 29 ni in heelbawl uhhi. July 28 ni in tapong te leh kumpi te kidona hang mi 38 si a Nungkaal sung bekbek in mi 97 si uhhi.

·        Afghanistan gam khanglam Kandahar khapi a teeng President Hamid Karzai I innlak tanau pa ahi Mr Hashmat Karzai in a inn ah Ramadan antanpawi zawh lungdamkoh inn thungetna eilampau leh Home cell July 29 ni in bawl a alengla pa khat in alutuunna puankawmpan bomb khat lakhia in kitamsak ahihman Hashmat Karzai leh midang nih si uhhi. Mr Hashmat Karzai peen President tuh ahi Mr Ashraf Ghani I meetangzong mimuan huai mahmah khat ahihban ah A U President Hamid Karzai khitciang President asemtosuak ding a kilam en mahmah mi khatzong ahihi.

·      Kawlgam Minister of Information U Aung Kyi leh Minister Health Dr Phe That Khin te kei le kei khensatna tawh kanaseppan ongkhawlsak un ci in angetna uh President U Thein Sein in July 30 ni in Suaikaai a khawlsakna taangkokhia ta hi. U Aung Kyi peen Thein Sein leh Daw Aung San Suu Kyi kikaal a palaai seempa hia, tutung akhawlding in zong Suu Kyi tawh kiho masa ci hi. Dr Phe That Khin bel Thein Sein kumpi term sung ah mipi pan ateeltoh uh hidep hi. Hih panmun khawlsan Minister tegel taangding in Information Minister huh U Yee Htut leh Cidamna Minister huh te President U Thein Sein sehsa in July 30 Upper House meeting ah pualuut hi.

Lungdam

Thang Khawm Pauzomi

Tulaai Leitung Thuthang Tuamtuam Updates July 29, 2014

·      Israel te leh  Hamas te kidona ni 21 cingta in mipi tamsi lua mahmah ahihman in ahanggengen nawnlo kido khawl un ci in UN Security council te in July 28 ni in thusuah bawl in Israel mawhsakpian uhhi. Ahizong in Hamas te in Israel Rocket tawh kaap teitei ahihman in ko le ko kidaal theihna kanei uha, ongdote dotheihna kanei uhhi hihtawh kisai in kuaman ongmawhsak theilo hi ci in Israel te in genkhia uhhi. July 29 ni in Israel Prime Minister Benjamin Netanyahu in itupna tungnaailo Hamas te phualpi suksiatzahding iciangtan zah kizonaailo a, agawhnopzah zong kigo naailo ahihman inasep atawpdong semding ihihman Gaza simna kaailaai ding zomtoto ding hihang ci in mipi tung ah genkhia hi. Palestine lam 1,1200 sita a, Israel gaalkaap 53, Israel mipi 2 leh Thailand gammi nasem khat  avek akigawm 55 sita uhhi. Tuni July 29 ni in Gaza khuapi sung a Hams te mun 60 Israel gaalvanleeng ahawl palo pawl in zialcip a UN nasem akihel mi 100 si uhhi.

·      North Korea gamte in South Korea gamtawh kidotawp kum 61 cinna pawipi July 27 ni  in nasiatak in khaam uha, Korea nih ongtawknawi den leh ong ukcipsawm ahi USA gaalkaap phualpi ahi Pacific tuipi dung teng  leh White House Nuclear tawh kaapding ci in Gaalkaap Mangpi nihna Hwang Pyong So mipi te maai ah genkhia ta hi. Mipil te etcing na ah ahihleh N Korea in Japan leh South Korea ciangbek kaptheihnading thau neipan uha, US tuzoding thau neinaailo ci uhhi. Ahizong in US thukante Meitungpan a etsimna ah North Korea te agamla munkhat doding dan in kithawi hileh kilawm ci uhhi.

·      Iraq gam nitumna lam aom Islamic state kici sung aom Mosul khuapi sung ah Christian te Muslim suaknuam zawmaw ahihkeh Siah tampi pianuam , sinuamzaw cih kiteelsak in haksatna lianpi tuak uh ahihman in French (Piantit )  kumpi te in hibang hamsatna athuak Christian te agamvuah tentheihna piading akiging sa in ka om uhhi ci in  kumpi thuneite in July 28 ni in genkhia uhhi.

·      Malaysia Airline tuahsiat daan pawlkhat

 Dec 4,1977 kum in Penang pan KL bawhding migiloten mancip uha, Singapore tusakding acih uhleh Johor ah kia in atung a tuang mi 100 si,

December 18,1983 kum in Singapore pan Subang tuding  khuahun siatna hang in kia a mipawlkhat liam in asi omlo, Vanleeng kisia in kibawl kik,

1995  kum September 15 ni  in Kotakinabaru pan Tawau vanleeng tual bawhding tukhial a mi 34 si , Vanleeng hawlpa ginaatlohna ci

2000 kum March 15 ni leuleu in China gam Beijing khuapi pan Sepang, Kualalumpur tuding avansia in Vanleengsia a mi aliam abai bel omlo sam ,

August 1,2005 kum in Australia gam Perth khuapi vanleeng tual ah cimawh a , miteng kinawkhia man in asi aliam kuamah omsam lo

Decmber 17,2013 kum in Sepang,Kulalumpur vanleeng tual mah ah kisai leuleu a mi 6 liam in asi kuamah omlo vanleeng kibawl pha kik thei..

March 8,2014 ni in Kualalumpur pan Beijing tuding  Malaysia Airline mi 239 tawh hingman,

July 18,2014 ni in Netherland gampan Kulalumpur tuding migilo ten mihing 298 tawh kapkhia in mikheempeuh simang,

Hibang a tuahsiat kawmkaal ah tuam Kum 3 sung 2011 pan tunidong $1.3 billion sum ahihman in Malaysia Airline amin mahmah zong hinteh cih ummawh uha, Amin a color cihte laihmangding in July 29 ni in Malaysia Airline thunei te in genkhia uhhi.

·      July 18 ni a Ukraine leh Russia kikaal a kikaapkhia Malaysia vanleeng I thuciaptehna Black Box Netherland kumpi thuneite in asittelna uh ah Thautang in kha hi cih mukhia ci in July 29 ni in taangkokhia uhhi. Adang thei huai aomlaai te August 1 niciang taangkokhia kikding ci uhhi.

. China gam Xinjiang huamsung ah Pikte leh Han minamte nasiatak kisual uha, mipiten Tem zang in Palik ten thau zang himah leh Palik hongkhat asih ban ah Palik mawtaw 30 zancip in mipi 13 thau ma tawh si uhhi. 

. Kawlgam mualtung mi thautawi khawmpi ahi KIO phualpi Laiza a kibawl  khawmpi ni 4 khitciang July 29 ni in nuamtak zosiang thei uha, thukimna nam 10 neikhia thei uhhi. Hih kimuhna tungtawn in Mualmi thau thautawi leh Kawlkumpi te August khasung kimu kik ding ci uhhi. 

Lungdam 

Thang Khawm Pauzomi 

Tulaai Leitung Thuthang Tuamtuam Updates July 28, 2014

Tulaai Leitung Thuthang Tuamtuam Updates July 28, 2014

·      Kawlgam Mualtungmi thautawi kilemna vaaihawmpawl ahi NCCT te khawmpi Laiza khuapi ah July 28 niciang kikupding thulu nam 7 lakpan nam 5 zokhin ta uha, nam 2 bek cianlaai in zing July 29 niciang zosiangding ci in makaai U Khun Oh Ka in genkhia hi.Hih khawmpi ah UN,China pan palaai te zong vakah uha, UN General Secretary Mr Ban Ki Moon in zong laaikhaak khat puasak in kilem mengmeng nading in hanthawn hi. Zomi thau tawi pawlzong hih khawmpi te ah kongcing bek ngahzo leeng lunggulh huai kasa hi.

·      Malaysia vanleeng I black box in thautang in kha in vanleeng kitam zihlalkhia hi ci in Ukraine gam thuneite in July 28 ni in genkhia uhhi. Hih vanleeng I Black box nihte peen UK mipil te in asit Phpan palik thukan ten luut asawmlaaitak hia , Tapongp pam pan kuamah aluut theihloh nading in Ukraine galkaapte nasiatak in do uhhi. UN High Commissioner for Human Rights Boss Ms Navi Pillay in hihpeen War Crime hitheiding hi ci in July 28 ni  in genkhia hi.

·      Israel leh Palestine te kikaal nai 24 sung kilemding thukimna ngah himah le uh langnih tuak in kidona khawltuanlo a july 28 ni in Gaza khuapi sung a om Zao lianpeen khat thautang in kha in naupang 8 leh ulian 2 akigawm 10 si uhhi. Hamas te in Israel gaalvanleeng ahawlpalo ten bomb khiat hi ci uha, Israel ten Hamas ten Rocket lawn theilo in puakkhamsak kha uhhi ci in kingah tuak uhhi. UN Security Council in thakhat thu a kikap na akawlnading un hantawn niloh uhhi.

·      Philippine gam khanglam Jolo tuikulh tung Talipao khuakiang ah migilo thautawi pawlkhat in khualzin mawtaw nih July 28 ni in naban kap uha, mi 18 sipah in adang pawlkhat zong liam uhhi. Hih munteng peen Abu Sayyaf  migilo 300 kiim I phualsaatna mun zong ahihi.

·      Libya gam Tripoli khuapi sung aom Namgimtui kholna phualpi tapong te leh gaalkaap te kidona hang in  July 28 ni in nasiatak in meikaang  akiphelh zolo hi ci in kumpi thunei te in genkhia uhhi. Tusung bekbek kidona sung ah mi 97 bang sikhinzo uhhi.

Lungdam

Thang Khawm Pauzomi

Tulaai Leitung Thuthang Tuamtuam Updates July 27, 2014

·      Zomi Innkuan Kentucky Inc. Makaihna tawh ZIUSA 2014 Zin maangpi ahi Pu Gin Kam Lian (ZCD General Secretary) Dawnna leh Real Political Talk show August 2,2014 zanlam nai 7pm-10pm dong kinei khawmding hi. Tuamun ah aneu alian Zomi kheempeuh kipaithei ding a thudotna zong akiciangtan bang in kidong thei ding hi. Video ahileh mikim in ut bang in kizaih theilo ding a akiseh mite bek in ziah thei ding ban ah Zomi Innkuan Kentucky Inc active member lobuang kiluut saklo ding hi. August 3 ni leuleu ciang in Lasiam VC Mang leh Tuatuang te tawh Pasian biakpiak khopna nasia tak in kineiding a Video Record kician tak in kibawl ding hi. 

·      Yangon khuapi NLD zumpi ah UNA, NLD leh mualtungmi party tuamtuam pan party 16 te in Kawlgam kiteelzia ding party te zuihding thukhat peuhpeuh Kawlgam Kiteelna commission te in asuahsak uhciang, party tuamtuam te tawh kikumhithiat masa a vaaihawmding ngetna bawlding in July 27,2014 ni in thukimna nei uhhi. Hih thu tawh kisai in Democracy taktak ipainop leh tu a te akipan kalsuanzia akisam ahihi ci in Party 16 te lak ah Taltaak leh makaaipi ahi ZCD President Pu Chin Sian Thang in genkhia hi. Akizom in ZCD Palaai pawl leh UNA te Korea gampan pai Law Lam siamtetawh July 27 ni mah in kimukhawm thei uhhi.

·      UN Human Rights tawh kisai kawlgam Palaai thak Ms Yanghee Lee July 27,2014 Yangon Vanleengtual pan kawlgam anusiatmadeuh in thukang tetawh holimna tawmveisung neikhawm uha, Kawlgam nazin sung kawlgam I Politics paizia nabangci muhiam ci in dotna abawl uhleh , “ Democracy diktak asuahtheih nading in amaai nawtlo in gaalkaap ki ukna lam ah nungtolh kikta” ci ek ahihman in kawlgam sung a politician apawlpawl te in paak mahmah ciat  uhhi.

·      Philippine gam ah milip buppi 100 million acinna nau ngeek Chonalyn kici July 27 ni zankim 12:6am lian in suak ahihman Manila khuapi sung a om Jose Fabella zato pi ah suakkhia hi. Million 100 acinlian naupang ahihna tawh kizui in uliante leh khuanu khuapa akuakua in angtanpih letsong te tawh vadelh ngeingai uhhi.

·       Israel leh Hamas kidona hang in Palestinian mipi te cihmawh lua  mahmahta uh ahihman misiphum hunding in UN te ngetnatawh July 26 ni in 12 sung langnih kikaaploding in thukimna angahsa uh hinapi in Gaza pan Hamas ten Israel lam thaupi tawh nakap kik uh ahihman Israel zialkik uhhi. Leitung makaaituamtuam te leh UN ngetna tawh July 27 ni in nai 24 sung kikaap khawlding in thukimna neileuleu uha, Khamul migolo lampan mah in Rocket tang 100 vaaltawh Israel kaap leuleu uh ahihman in tu in Israel ten khamul meet ding in atung anuai pan banzial leuleu uhhi. Tuni ciang Palestinian misi 10,30 phata in Israel te 43 sita uhhi.

·      Libya gam Benghazi khuapi leh Tripoli khuapi migilo thautawi te in nasiatak in simtha paai uh ahihman in US leh Turkey ten amau gamciat I palaaipi zum july 26 ni in tuahkhia uha, July 27 niciang migilo te leh gaalkaap te  naisiatak kidona Benghazi ah piangtakpi a hihman in  mi 38 si in pawlkhat liam uhhi. Tukaal sung bekbek kidona hang in mi 97 si in 404 liam ci in Libya kumpi thunei te in genkhia uhhi.

·      Florida Beach kici gunpaang tawlngakna munkhat ahi USA am Florida state sung ah July 27 ni in Papi kum 36 khat leh atanu kum 9 dingkhat kimawl kawm nipi ni  gualnuamtak in gunpang ah zang in adiandian laaitak un Vanleeng neukhat lamsam cimawh in gunpang ah ongkiavat mawk ahihman in apa thakhat in sipah a atanu naakliam mahmah ahihman in zato ah kipuak hi.

·      Ukraine gamsung a Russia deih thautawi te Russia kumpi in thau hoihnono pia in huh ahihman in kisinna hoihtak neingaplo Thautawi te in Malaysia Vanleeng kapkhial hilel hi ci in US kumpi genna Russia te in US tekiang ah himah hi cihtheiding van,laai, thu le la kicing in onglak un ci in ngen ek uh ahihman US kumpi te in July 27 ni in Vaanlaai huihlakpan Russia ten Ukraine gam a Russia deih tapongte Russia kumpi in ahuhzia, Gaalvan apuakna cihte man azaihna te uh taangpi taangta muhding in khahkhia zihziah uh ahihman in Russia te keel luphum kidawk  ahihman Seitei cipong in paungamlo in aimitdeh bang in daaidide uhhi.

Lungdam ei

Thang Khawm Pauzomi