Tulaai Leitung Thuthang Tuamtuam Updates February 24, 2016

Banghang in Chin deih te leh adiak in Dr Salai Lian Hmung Sakhong in Zomi akicih ding lau hiam?

Feb 20,2016 Ni Dr Salai Lian Hmung Sakhong in athu genna ah Zomi National Day omkei, Laimi Nationa Day zong omkei, Khumi Nationl Day zong omkei Chin National Day bek omhi ci in gen a tuaban ah Zomi peen namkee neukhat hilel a National kici theilo ding ci in gen hi. Hih thu imuh ciang Chin deih ten Zomi peen sawtpekpan ongkhak ta cih kimu hi.

Banghang Dr Lian Hmung leh Chin ten Zomi ikicih ding lau hiam cih leh Zomi National official in kici taktak in Chin peen iminam min maan ahihloh lam leitung in ongtel leh azuau phuahna kilang ding, bekthamlo in aneek adawnna agawlkibotsat in a pakan kitamding, ban ah aneeksa teng kisiik kikding ahihman in teelding lampi dang omlo gawltaak liang mah a Chin kici ni ci a a awngawng phot ahihi.

Bangbang in ongkhak tan zong un Pasian in lemsa ahihman in Zomi vaai thusung ding Minam Party pan Parliament ah mi 4 inei a Chin Minam mintawh kuamah omlo hi. Tu in NLD Makaihna tawh kumpi thak ongkipan ding hita , Kawlkumpi makaihna sung a Mualtung mi kilemna vaaihawmpawl a kihel, Pu Zozaam,Dr Salai Lian Hmung Sakhong cihte puanlom zial a khua tek ah ciah a lokhawh hun ongtung ding cih mukhol uh ahihman in anaak buai khol mahmah uh ahihi.

Tua ban Democracy tawh ikal suan taktak ciang Chin state sung ah zatkhop pau common Language ongkibawl ding a atamzaw zaw akizang ding ahihman in Minam Chin state a minam tampeen ahi Zomi akici te zat Zopau kizang lel ding a Chin deih teng leh Dr Lian Hmung Sakhong tepawl minam neinawnlo in bei mangding ahihman un kuama cial loh a abuai mahmah uh ahihi. Thungetsaksak ni. Kei mimal muhna hi

·      Kawlgam  mihing zaleenna Human Rights tawh kisai thuvaaihawm mi 5 ten amasa peen kimuhkhopna February 24, 2016 ni in Nypidaw ah nei thei uhhi. Hih mi Human Rights Committee ah ZCD Party General Secretary Pu Gin Kam Lian zong kihel a Pu Gin Kam Lian genna ah Kawlgam mahmah Full a Democracy onghih masak phot kei leh Human Rights omloding ci in gen hi.

·      Nepal gam Pokhara  tawlngak na leh Kathmando khuapi azin Vanleeng neu mi 23 apua khat February 24,2016 ni in khuahun hoihlohna hang in kia a , Khualzinmi 20 leh Vanleeng naseem mi 3 avek in sikhin uhhi. Khuazin mi te lak ah Sen gam mi khat leh Kuwait gammi khat kihel a adangteng Nepal gammi ci uhhi.VOA

·      China,Veitnam,Japan,Philippine,Malaysia,Taiwan leh akiim a gamneuneu ten ko citek a abuai khengkhang namu uh ahi South China Sea tung US Gaal Teembaw te leh Bomber vanleeng ten aheemnawl den nahang in China ten Gaal vanleeng 10 kiim khuttawh abawltawm na uh Woody tuikulh tung ah koih tading ci in Feb 24,2016 ni in genkhia uhhi. Nunglam deuh khat in Vanleeng kaapna anaai agamla kaapna Thaupi te zong koih khinta uhhi.VOA

·      US Predsident Candidate-R Mihaupi Donald Trump in Republican can President kidemtheih nading tuni ciangciang mu 4 kidemna ah mu 3 zo ta ahihman in Republican Party pan President demding in amaaipeen ah taai a, Democratic Party pan Pi Hillary Clinton in amaai peen ah taai ahihman in R-Donald Trump Vs D-Clinton khat zawzaw US President ding in lam etna ompian ta hi.BBC

·      IS misok ten khakcipna hang a Syria gam Deir al-Zoul khuapi kiim a cimawh mipi 480,000 vaal te ading in UN Cimawh huh pawl in Neek le dawn leh vanzat tuamtuam Tons 21 vanleeng February 24, 2016 ni in khiat kipan thei ta ci in UN ten gen uhhi.BBC

Lungdam

Thang Khawm Pauzomi

Tulaai Leitung Thuthang Tuamtuam Updates February 17, 2016

Tulaai Leitung Thuthang Tuamtuam Updates February 17, 2016

·      Zogam Zomi te Khuapi ahi Tedim Khuapi ah February 20,2016 niciang Chin tawh Gawlkhadi tawh tui-awm in hawpkhawm ngeingaai ding uha, February 20,2016 Zomi Nam Ni ( Zomi National Day ) ni in Kalyamyo ah Zomi ten Zomi Namni ZBCM Huangsung ah thupi tak in bawlding uhhi.

·      Kawlgam Nypidaw Khuapi a om Gaalkaap Phualpi ah Pi Aung San Suu Kyi leh Gaalkaap Maangpi Min Aung Hlaing te athuveina February 20,2016 ni in kimuhkikna nei leuleu uhhi. NLD lam bel daai khipkhep uha, Gaalkaap lamten bel thukhun tawh kisai leh maailam kalsuan ziading kikum ci in gen uhhi.Tutak abuaina uh ahihleh Suu Kyi in Kumpi asep leh Kawlgam gaalkaap ten Shan,Kachin,Rakhaing,Yangon teng ah Chief Minister seemding cihtawh akikang uh ahihi. VOA

·      Shan gam nitumna lam a kikaap thapaai SSA/RSSA te leh TNLA te akhawlthei nading cih thusunna peen February 17, 2016 ni in Kawlgam Dawlnuainung Parliament in hoihsakna thukimna nei uhhi. Ahizong in bangci sepding cih geelman naailo deuh uhhi. SSA te peen Kumpi tawh kilem khin hi a, TNLA te ahihleh kumpi tawh kilemna lanaailo ahi uhhi. Ngapik ten khat lam khat lam amei uh nasiik zeel ahihman in kikaap niloh uhhi.VOA

·      South China Sea kici kumtawn kha tawn a kibuai pih khenkhang Tuipi tung a om Woody Tuikulh (China te bawltawm ) tung ah Nidang in Gaal Tembaw cihte bek akhawl hinapi February 17, 2016 ni in China te in Thaupi Tang-8 atutna 2 leh gaalte husa matna te  ongtung timtem mawk uhhi.Acihnop na uh peen Akiim a gamneu 7 leh USA tetawh kituak le cinuam pian uh hileh kilawm hi.Hih thu tawh ki zawitawn in USA te Gaalvanleeng minthang mahmah aneih uh F-22 Raptor te 4 Osan Vanleeng tualpi South Korea gam February 17, 2016 ni in  ongbawh sak diamdiam  pah uhhi. Tuaban ah Korea gaalvanleeng F-15 te leh US Gaalvanleeng F-16 te zong North Korea gam lam mitheem piakawmsa in Vanlaai ah Phialphiah nupa bang in leengsak zialzial uhhi.BBC

·      Russia gam te  neihsa Bomber Gaalvanleeng 2 in February 17, 2016 ni in UK te Vantung lampi nehsim ahihman in RAF Typhoon Gaalvanleeng  nih sulzuihpah in encik pah ciatciat a akhenkhaak leh muutkhia pahding in nungzuihzuih hi. NATO leh Russia zong Cold War kheekleh nuam a adiangdiang laaitak uh a hihi.CNN

·      Turkey gam Ankara khuapi sung Parliament Innpi kuam leh Gaalkaap huangpi kiim teng ah February 17, 2016 ni in Bomb puakkham zikzeeka, mi 28 sipah vel in mi 61 sitawh naaitawh kidim ci in Turkey thunei te in taangkokhia uhhi. Bomb puakkham sak peen Khamul chiapchuap misok tem ah ki ummawh phot tadih hi. BBC

·      Pope Francis Innpan azinkhiat zawh anitawpna February 17, 2016 ni in Mexico gam Cereso thongpi vahawh a thupha piakna vanei hi. February 17, 2016 ni mah in USA tawh gamgi ah thuhlihna neiding a mipi 200,000 bang paiding in kilam en hi.CNN

·      Tupeeng kimawl hahkat Pu MU & England Captain Wayne Rooney nungkaal weekend sung in akhukbuk liamsak ahihman  in kaal 6 sung Bawhlung tual nawlpan enkha bekding a kimawlna puai 8 kihelkhaloding ci uhhi.BBC

Lungdam ei

Thang Khawm Pauzomi

Tulaai Leitung Thuthang Tuamtuam Updates February 15, 2016

Tulaai Leitung Thuthang Tuamtuam Updates February 15, 2016

·      Syria gam khunglam Idlib province sung Maaret al-Numan khua sung a om MSF gamgi neilo Siavuan kipawlna te zato khat leh Saang Inn khat Syria galkaap ten February 15,2016 ni in Betung limkhiat lua uh ahihman in numei naupang akihel misi 50 kiimpha hi ci in UN Secretary Mr Ban Ki Moon in dik asaklohna thu pulaak khia hi. VOA

·      ASEANkiciIndonesia,Malaysia,Myanmar,Combodia,Philippine,Singapore,Brunei,Thailand,Vietnam,Laos gam 10 pan makaai te leh US President Obama ongtungding Feb 22,2016 niciang USA gam California state Rancho Mirage khua ah ninih sung kimukhawm ding uhhi. Thutuamtuam kikumding uh agenda kaaikhawm in buai mahmah saan uhhi.VOA

·      Somalia gam taw lam a om Shan-da’ar khua kiang ah US gamte neihsa thautang golpi 5 apua Gaal vanleeng ahawl kisamlo te khat February 15,2016 ni in kia a Kaman uh ci in al-shabab migilo pawl in  pulaakkhia uha, Feb 15,2016 nimah in hilo hi c kia kil kel kei ci in US Gaalphualpi Pentagon ten thukkikpah uhhi.VOA

·      US thukhen saangpeen mi9 te lakpan khat ahi Antonin Scalia Nung sani ni in asisa in kimu bengbaang mawk ahihman in tu in Sangpeen thukhen te mi 8 bek pha uha, thukhenna khat om in kidin leh mi 4 tuak hiding ahihman in buai mahmah in omlaita uhhi. President Obama in February khabeima teitei in adeih khat amin pulaakkhia ding ci in February 15,2016 ni in genkhia hi, BBC

·      US Air force ten ongtungding khuakhaal ciang in Finland gam ah F-16s Gaalvanleeng namte 6 leh gaalkaap hon maangkhat puakding uha, Gaaldo kisinna nasiatak in Russia gam tawh tai 100 akigamlaatna mun ah bawlziahziahding ci in February 15,2016 ni in taangkokhia uhhi. Russia Prime Minister Dmitry Medvedev inbel Cold War akipan ki ihita ve, kaci mah ve ci phiauphiau ta hi. President Obama in Syria gamsung a kumpi langpang Tapong te Russia in ado nawnloh nading in Russia President Putin tung ah February 15,2016 ni in thuumna nei hi. US leh Nitum na gam teng in Syria Kumpi mudah in Kumpi langpang IS loteng panpih uha, Russia ten Syria kumpi huh in Kumpi langpang kheempeuh IS tawh bangtawh aphial mang uh ahihi. CNN

·      Kawlgam Parliament atung anuai kigawm avekpi un UNDP leh IPU te kipawl in February 15,2016 ni in thusin na Sunday School kahna kipan sak uha, Nipi kaalkhat sung sawtding ci uhhi. Ka upmawh sim ah Hlutdaw thu kikup laaitak  ihmu nawnlo ding, thu ngaiding hi isakloh te kiseelding kidongding cih khawng a hitam ci ing.VOA

Lungdam

Thang Khawm Pauzomi

Tulaai Leitung Thuthang Tuamtuam Updates February 11, 2016

Tulaai Leitung Thuthang Tuamtuam Updates February 11, 2016

·      Mexico gam Monterrey khua kiang a om Topo Chico tong inn sung ah February 11, 2016 ni in naakpi tak in kilai piang in tua ban ah thong inn kaang sawnsawn ahih man in mi 52 si in  mi 12 liam uhhi. Palik te thakhat in luut pah uh ahihman in daaiki zaw deuh ta hi.  Pope Francis asawtlo in hih thongsung te ah zinkha theiding cihthu zong agen laaitak ahihi.BBC

·      Mikaang Naaksau gaalkaap kipawlna ahi NATO  te in Iraq gam leh Syria gam sung a US leh apawlpih te IS migilo te ado na uh pawmkha theiding hi ci in US Secretary of State Ash Carter in February 11, 2016 ni in genkhia hi. NATO beelbawl sung pan gam 8 pang in asun azan a anadodo khin uh zong ahihi.VOA

·      Korea gam sak le khang in asepkhop uh gamnih kikaal aom Kaesong nasepna phualpi leh sak le khang kizopna kongpi khakcip ding in South Korea ten February 11, 2016 ni in akhensat ban vuah avante uh tuah kipan pah zangzang uh ahihman in North Korea ten hihbang gamtatna peen gaal ikikaapta ding ci a kitona namkhat hi ci in dawngkik uhhi.VOA

·      Syria gam tual gaal kipat March 2011 kumpan kipan tuni ciang gaalkikaap nahang a misi 400,000 cingta in Ann ngawl damlo asi mipi 70,000 cingta hi ci in UN te February 11, 2016 ni in taangkokhia uhhi. Misi vekpi 470,000 cingta a Gambup  milip i  11.5% sikhin ta ahihman in ngaihsut huaisimpian ta ci in gen uhhi.CNN

·      EU gamsung ah Mizuakna atawm theihnading in Turkey leh Greek gam kikaal Mizuak Mipua puaisa te abeng ding in NATO Gaal Tembaw pi 3 February 11, 2016 ni in kikuan khiasak hi ci in NATO Secretary Jens in genkhia hi. BBC

·      US gam sung sumluut tawmte a ding in tulaaitak peen Tuuktunhun (Harvest Time)  hi a atamzaw lungdam hun ahihi.  Kumkhat sung kumpi tung ah siah ipiak teng enphatna kinei in sumluut tawmte kumpi ong ongleh huh uh ahihi. Hih siahpiakna Tax peen I utut na ah kituatsak thei a,  Ei le ei inzong kituat thei hi. Atamzaw in $100 pan atungsiah ngen uha, munkhat khat te ah $200,$300 ngen uhhi. Laaithei te ading in ei le ei in tuat lel le hang sumbeilo a ngahdan kibang lel peuh tamzaw thei laai hi. Alungluut ten hiha anuai a link ongkhak ing.

https://taxactonline.com

https://apps.irs.gov/app/freeFile/jsp/index.jsp?ck

Lungdam

Thang Khawm Pauzomi