Tulaai leitung Thuthang Tuamtuam Updates August 29,2014

Zomi-Chin ah kei mimal dinpih:

Ipu Ipa khangpan Zomi kici hihang cihpeen kuama onghilh sawn hilo in Kapi Kapu in ciantak onghilh ahihman in Zomi ka hihi ci in kapom hi. Chin peen mite ongpiak min hi a min Chin ongcih leh zong kakhialsak tuankei a, ahizong in kahihtheih zah in Zomi hizaw ung cih hilhcian kasawm zaw hi. Kei le kei Chin kakici nuamhet kei a, Zomi higegu Chin kicizel, Zomi akici zeltetawh zong nasepkhop ding kasawm vetkei hi. Tawm man tamman leh kiim le paam, kumpi leh Media tetung ah kaki ngakei a, Zomi peen minam min ahihman Zomi kicihding tawmcik zong kalau kei hi. Zomi akici nuamlo leh adeihlo te kagaal ahipah lohhang kalungtang kapiaksawm naaikei phot hi. Zomi lo minam mindang kuakua apau zong in saan leh deih kanei kikkel kei hi. Tua hang in ongnusia Dr Chin Do Kham in 2009 kum in Nashville khuapi sung mipi maaikhat ah Lawm Khawmpau peen Zomi bek acitilteel pawl hi ci in ongpulaakkhia hi.

Ø Tukum sung atuahsia mun mahmah Malaysia Airline te in anaseem vekpi sungpan 30% ahi nasemmi 6,000 khiamding uha, makaaipi thak zong koih in kiciantak in puahphatna bawlding ci in August 29, 2014  Malaysia khualzin tawh kisai Uliante in taangkokhia uhhi. Malaysia Airline peen mimal tungpan kumpi tung ah ki ap hi a tu in Malaysia kumpi te neihsa hita hi.

Ø 2014 kum Kawlgambup milip kisimna ah kumpi te upawkna saang 9 million tawmzaw a, kawlgam milip 2014 kisimna ah mimal 51 million bekpha hi ci in thuneite in August 29, 2014 ni in taangkokhia uhhi. Kawlgam Rohingya te 800,000 peen Rohingya kici saknuamlo in Bangali in kiciam tehsak cihzong hel uhhi. Mualtungmi nam bangzah, mimal bangzah cih kician tak in 2015 kumciang taangkokhia ding ci in genthuah uhhi. Source: BBC.com

Ø  Russia Defense Minister Sergei Shoigu  Poland gamte vanleeng lampi nawk in  Slovakia gam Bratislava khuapi ngaih hawhding  in August 29, 2014 ni in aleen laaitak Poland gamten hawl mang in vanlaai ah tawlkhat abuai khit ciang Slovakia  gam Bratislava khuapi si le naang in tungsam hi. Vanleeng mawkmawk tawh hilo in Gaalvanleeng tawh hisese ban ah 72 athu zasakkhol leh hih Sergei peen EU te black list ah kihelkhat ahihman ci in Poland ten gen uhhi.

Ø Israel te leh Hamas te kaal 7 sung kidonapan tu in kilemna kongtung ta uha, thuhoih mahmah khat zong kicithei hi. Ahizong in hih gaalsimna mission tungtaang ah Israel te in gualzawhna lianpi ngah ihihman in gualzawhna thu ka taangkokhia hi ci in Israel Prime Minister Benjamin Netanyahu in August 27 ni in Israel mipi te tung ah taangkokhia hi. News kimang ngilh kha hi ei

Ø Leitung a Terrorism kici  hiamgamptatna tawh kisai in UK gam leh agammi te ading in alauhuaina sehnga suah sehli tungta ahihman in mipi te leh igam abitding kitaangsam hi ci in British  Prime Minister  David Cameron in August 29, 2014 ni in genkhia hi. Tuaban ah tulaai tak agilo khia mahmah IS te huhding in British pan mi 500 kiim pan uha, US pan 300 kiim pai himawk ahihman in lauhuai khia mahmah cih behlap hi.

Ø Ukraine leh Russia gam kikaal ah Russia gaalkaap 20,000 akiging in omkhinkhian a, Russia gaalkaap 5,000-6,000 Ukraine gamsung luutkhin ci in UK te in August 29, 2014 ni in taangkikhia uhhi. NATO te in Russia te in Ukraine gam la in nidang laaidan a Soviet gamkhat phuhsawm ci in angawh ban uh ah Russia te kidawmding in August 29, 2014 ni in vau uhhi.

Lungdam

Thang Khawm Pauzomi  

ulaai leitung Thuthang Tuamtuam Updates August 28,2014

T

v Ukraine gam sung Russia gaalkaaap te August 21 luut ta hi ci in President Obama leh NATO uliante in August 28, 2014 ni in genkhia uha, UN security council inzong thukin kikupna khat nei uhhi. NATO leh US te genna ah Russia gaalkaap 1,000 Ukraine gamsung ah tulian in om in Ukraine kumpido tapongte huh uha, 20,000 kiim gamgi ah akigingsa in omhi ci in gen uhhi. Aman mahmahtawh muhtheih ding in lakkhia uh himah leh Russia ten thal nial teitei uhhi.

v Iraq gamsaklam a  migilo mahmah mihingsa anelo bek Muslim migilo tea hi IS te in Kurdish gaalkaap khat agawltanna uh Video August 28, 2014 ni in khah khia leuleu uhhi. Tua ban ah thahding a akoih uh amimat te uh tampi tak zong lak uhhi.

v Syria gam leh Israel kikaal Golan Height kuam sungteng a kilemna naseem a om UN gaalkaap 43 te  amin apuam kitheilo maaituam khamul gaalkaap te tawh tawlkhat akido khitciang khamul ten man hi ci in UN ten August 28, 2014 ni in taangkokhia uhhi. Tua ban ah hi kidona hang in Israel gammi pawlkhat liam uh ahihman Lungdamkohna in Israel ten Syria gaalkaapphual munnih khawng beltung khiatsawm uhhi.

v Ni zangpan meitha ngahtheih nading Mandalay kuam teng ah Dollar Awn 480 bei in phualpi nih saat in USA gamte nasep kipanding in Kawlgam kupitawh thukimna suai August 28, 2014 ni in kaaithei ta uhhi. Kawlgam khualum mahmah ahihman in banglokhat suahding uh hita hi. Zanlam ciang Zogam Thaangmual dung a huihpi teng zong banglokhat suahding hanciam ding ahihi.

v Lukhat tawh buai luamahmah kahihman in Leitung Thuthang Tuamtuam nisim asuahzawh nading in ahanciam nuam I om hiam? Bangdan in ma ongpan pih nuam na hi hiam?  Tpau0001@kctcs.edu  September 20 ma ongzasak un. Ongpanpih zoding kuamah aomkei leh, Inn ma lo ma sah mahmah kahihman in Thuthang kikhawlbawl tading hi. Abeisa kum 1 leh kha 8 sungbang kei  mimal hanciamna bek ahihman in inn ma loma tampi kisot to in hamsatna lianpi om hi.

Lungdam

Thang Khawm Pauzomi

Tulaai leitung Thuthang Tuamtuam Updates August 27,2014

ü Kawlgam sung Mualmi thautawi pawl 12 kipawlna UNFC te in akhatveina khawmpi Thailand gam Chin Mai khua ah August 25-26, 2014 ni in neikhawm uha, O minam UWSA leh Maihlah minam NSAA-ESS te kahnuam lo uhhi. Ongtungding August 29-30 sung NLD, UNFC, UNA, 8888 leh CRPP te kimukhawm ding a, September 6 niciang Mualmi Party kheempeuh leh NLD kimukhawm ding uhhi. PR system deihlona signature kaaikhawmding cihzong kikupding khat in geelkhol uhhi.

ü  Israel leh Palestine gam a kibusa Hamas te in kaal 7 sung nasiatak kido in Palestine mi 2,138 si in Israel lam 67 asihkhit ciang August 26, 2014 ni in Egypt gamte palaai sepna tawh Cairo khuapi pan asauveipi kimangding kilemna bawlding in thukimna ngahta uhhi. Ahizong in hihkilemna ding nitaak 7:00pm ah kipanding hipan ahihman in zinglam in kinawh kaap mahmah uha, Palestine lam 6 si uhhi.

ü South Sudan gam  a  Tapong leh kumpi te kikaal Mission seem aom UN te zat vanleeng MI-8 Helicopter khat August 26, 2014 ni in amin kitheilo thautawi pawlkhat in kapkhia uha, atung a tuang mi 3 si in vanleeng kangtum hi.

ü China gam te in Gaalvan leengtawh Hainan tuikhulh kiang ah US te tembawpi anawlkhit asawtlo August 25 ni in Taiwan gamsung Taiwan te vanleenglampi tung China Y-8 kici gaalvanleeng nih in Taiwan te tophei leuleu ahihman gaal naai hi ci in Taiwan ten August 26 ni in taangkokhia uhhi.

ü Ukraine President Petro Poroshenko leh Russia President Vladimir Putin te August 26 ni in kumukhawm uha, akimuhtuung un Bawngtal kisiding mahmah bang in kipang thetha himah leh Ukraine gamsung a buaina aventheihna ding in naseemkhawmding in kiciamtuak uhhi. Ahizong in Mr Putin inbel gaven nading konghuhtheih bang un konghuhding uha, ahizong in akhawlding peen Ukraine te nahi uhhi ci veve hi.

ü Iraq gam saklam Kurd minam te uknasung a mulkim huaitak a Christian te abawlsia ahi IS kici Islamic state migilo te Kurd minam gaalkaapte in azialtum mang theihnading in US<Italy<Canada<Britain<Albania<Croatia<French <Denmark gamte in avui atang akisam bangbangh nawhtak puakding in thukim hi ci in US Secretary of Defense Mr Chuck Hagel  August 26, 2014 ni in genkhia hi.

Lungdam

Thang Khawm Pauzomi

Tulaai leitung Thuthang Tuamtuam Updates August 26,2014

·      Nigeria gam sung saklam teng Boko Haram kici migilo singnuai thautawite in khuapi le khuata kheempeuh peen ISIS kici Islamic State hita hi ci in August 25 ni in taangkokhia uhhi.Hi ni mah in Nigeria gaalkaap te tawh nasiatak in kikaap uha Nigeria gaalkaapte guallel in Cameron gam ah gaalkaap 500 gaaltaaikeek uhhi.  Syria, Iraq, Nigeria leh Britain hihgamteng bang ah Islamic state kici Christian te agawltan ziahziah te om hita a ongkhangkhang le uh ei Anungta Pasian biate ading in vaaisah thei khading hi.

·      Thai King in Thai ki ukna buluah  Gaalkaap Maangpi General Prayuth Chan-ocha Thailand gam I Kaallak Prime Minister aseemding in August 25, 2014 ni in phalna piakhia ta hi. Mr Prayuth in zong mipi tung ah Democracy ilam khawmding ci zawtna bawlkhia hi.

·      US Kumpi te in IS-Islamic state kici migilo te sahawl in hawl in zialtumding akithawi laaitak in Syria gampeen hih IS te I phualpi khat hi ahihman in US te in Syria huhna kisam mahmah hi huhna o ngngen le uh kahuhnuam uhhi. Tua ban ah Syria gamsung a IS te US ten azialno uhleh Syria kumpi thu ongzaksak kuul hi ci in Syria Foreign Minister Walid Muallem  in August 25, 2014 ni in genkhia hi.

·      Piantit gam I President Francois  Hollande  President hihna pan August 25, 2014 ni in khawl a, amakumpi innkuan sumit in thuneihna kheempeuh Prime Minister Manuel Valls tung ah apkhia hi. August 26 niciang in President cabinet athak honkhiatna neikik ding uhhi.

·      Mexico gam Oaxaca state  huamteng ah Hurricane  huihpi Pacific tuipi lampan guahtawh kithuah August 24-25 nisung nasiatak in nung a lampi te sia in tuikhang ahihman in ngabeng mi 3 mang in innkuan 10,000 in hamsatna lianpi tuak uhhi. Hih huih le guahpi in USA gam California state sung zong tukaal sung in nawkding khuahun siamte in gen uhhi.

·      Australian Airline te in August 25, 2014 nipan kipan Venleeng tung ah aleen laaitak leh atuahsuk laaitak in phone leh electronics tuamtuam te zattheih ta hi ci in taangkokhia uhhi. Nidang in Vanleeng aleending ciang lauhuai ci in kikhak sak a, tu in vanleeng sette electronics tawh akinawngkaai nawnlo ding kibawlpha ta ci uhhi. US leh EU gam Vanleeng pawlkhat te ah zong kiphal khin ta ahihi. 

·      South Korea gam khanglam a om  Changwon khuapi  ah August 26 ni in guahtam lua mahmah in tuikhang a hihman in Bus pi khat  tui in  taai a, mi khat si in mi 4 mangthang a, adangteng mihonsiam ten hongkhia man uhhi. Tuikhan na hang in Nuclear Power Plan nangawn khakcip uhhi.

·      Kum 6 sung akikhaakcip India gam Mumbai khuapi sung a om  Jew Center amun mah ah kihong kiktading hi ci in August 26 ni in taangkokhia uhhi. Hih Jew Center peen 2008 November kha in migilo te in sim uha, Jew te mi 6 si in migilo 11 India gaalkaap te in kaplum uhhi.

·      Russia te in Ukraine gam a Russia deih thautawi te kahuhkei uhhi ci in zuau agengen laaitak August 26 ni in Ukraine gaalkaap te in Russia gaalkaap 10 Ukraine gamsung nisuahna lam ah man uhhi. HIh thupoi mawh hang in August 26 ni nitumman in Russia President Vladimir Putin leh Ukraine Petro Poroshenko  te leengla kikhah ta ding uhhi.

·      Libya gam Tripoli khuapi a Internationa vanleeng tual Islamist Militia te in sim in Libya kumpi tetung pan sutkhia ta uh ahihman in US,French,UK,Germay, Italy te in thukin kikupna aneihkhit uhciang August 25, 2014 ni in nasiatak vauna nei uha, Vanlamtawh asawtlo in zialkik ding ci uhhi.

·      USA gam Virginia state sung aom Fort Lee gaalkaap leenpi a seem gaalkaap numei khat amah le amah azum sung ah athautawh August 25, 2014 ni in kikap ahihman in gaalkaap leen sung tawlkhat kikhak ban ah US kumpi buai man mahmah uhhi. Gaalkaap nu zato kipuakpah a zato pan si hi.

·      Ukraine President Petro Poroshenko in Ukraine Parliament thukhun tawh kizui in August 25, 2014 ni in beisakta hi. Parliament athakding tawh kisai in ongtungding October 26 niciang gambup kiteelna kibawlding hi ci in taangkokhia hi.

·      Syria gamsung a Islamic state migilote encikding in Gaalvanleeng thukan leengsak diadia tading in President Obama in August 26 ni in phalna piata hi.  Ahizong in Syria kumpi huh in IS te do ding cihlampang hilo in Syria leh Iraq gam a om IS te kop in doding lam hi ci in Pentagon ten genkhia uhhi. Ahizong in Syria Foreign Minister pa in ko ongzasaklo a IS doding a ongleeng gaalvanleeng te kikaap khiading cimawh ahihman in muhnop maithei tak maw

Lungdam

Thang Khawm Pauzomi