Tuesday, September 30, 2014

Tulaai Leitung Thuthang Tuamtuam Updates September 30,2014




·      Zomi ten 1990 kumpan Political party khatbek ineihsun ahi ZNC-ZCD ten ongtungding October kha sung in Tedim ahihkei leh Kawlpi khat zawzaw ah Party suahni phawkna leh Makaai thak kiteelna neiding uha, Leitung a om Zomi kheempeuh ongzawn uhhi. ZCD party hawmthawh a politics leh Zomi vei a akuku te suaktatak a vakihel theih mipi in ongteel leh Makaaipi septheihna hun kihong ahihman in Zomi ka it, kavei, Politics kathei aciten Internet khawn ah hai otot pong lo in vakihelding ahihi.

·      British parliament Iraq gamsung aom IS migilo te doding akhensat zawh anili ni September 30 ni in RAF Tornado Jet gaalvanleeng nih nu ngakno nih in hawl in Mosum Dam kuam IS te gaalvanphualpi vakaap uha, Vantampi tak avasuksiat sak khitciang nui lehleh kawmsa in giahphual ongtungkik uh ci in Defense Secretary Michael Fallon in genkhia hi. Tua kawmkawm mah in Kurdish gaalkaap te in IS te laksaksa Rabia khuapi laakkik zawhnading hanciam in avui atangtawh asun azan in vik ziahziah uhhi.

·      Leitung ah tulaai tak adiak in Nitumna gamlam te in akihtaak mahmah leh abuai pih mahmah IS migilo te hi in lauhuai naciangkhat zong omsam a ahizong in Leitung in IS te sang ilau zawhding leh alauhuai peenpeen in Iran te Nuclear vaai ahihi ci in Israel Prime Minister Benjamin Netanyahu in September 29 ni in UN Assembly sung ah Iran leh Leitung makaaite maaitang pan hangsan tak in genkhia giap hi.

·      Afghanistan gam ah 2014 khitciang US gaalkaap te Afghanistan gamsung ah ataamlaainading thukimna Security Advisor thak ding a akiteelkhia thak ahi Hanif Atmal in September 30 ni in thukimna suaikaai hi. Aluiten ahih leh suai kaai nuamlo in paikhia mengmeng leh aci uh ahihi. Thukimna thak ah 2014 kum khitciang US ten gaalkaap 9,800 koih laiding a adang NATO gampawl ten 3,000 bek koih laai in adangteng 2014 kumbeiciang lakhia mangta ding uhhi.

·      Hong Kong Democracy diktak tawh ki ukna adeih mipi lungphona anei te khawldek suailo in hahkat semsem uh ahihman in September 30 ni in mipi a tulsawmlom asim in buakhuan a palik tenzong acihnading theinawn meello in China gamlam thudong uhhi. Tuni lungphona anei mipi peen hicisehpak in 100,000 vaalphading hi ci in Makaai khat ahi Ed Chin in genkhia hi.

·      India Prime Minister thak liklek Narendra Modi  leh President Obama te September 30 ni in White House ah akimuh khopkhit uhciang thugenkhopna nei uha, India leh US sumzon nalamsang ah athak in nasiatak in kizomding in athukimna uh leh leitung khuahun zui in setvan tuamtuam te ah theihna kihawmsawnding in zong athukimna uh pulaakhia uhhi. Tuaban ah President Obama in “India gamh zawnna hencip mipi tampi nei kahi maw” ci in PM Modi in ongho suausuau ci in gebeh hi.



Cipak ni
Khialhna aom khaak aleh ngaihdam bawm ah maw

Thang Khawm Pauzomi

Saturday, September 27, 2014

Tulaai Leitung Thuthang Tuamtuam Updates September 27,2014



·      

·    

Tulaai Leitung Thuthang Tuamtuam Updates September 27,2014


·      Kumsim akibawl International Festival pawipi ah Zomi Innkuan Kentucky makaihna tawh September 27 ni in vakihel uha, Zomi ngeina, Zomi Puan, Laam cih nasiatak in valak ziahziah uhhi. Leitung muntuamtuam pan gam 40 phial leh aminam in minam 50 bang kihelna pawipi hia, Kawlgam Ai-awh in Zomi, Karen,Kaya leh Burmese cihte bek kihelzo ahihi. Nungkum lam in bel Chin te buuk neukhat akipia sam hi in tun apuan bialbual uhzong nawngkaai ciin kinawlkhin lel ban ah amau zong thaneemna tuamtuam tawh kihelzo nawnlo uhhi.



·      IS migilo te vanlam tawh nasiatak in doding in Britain Parliament ah September 26, 2014 ni in nei uha atamzaw thukim ahihman in tu in Vanlamtawh zialding amasapeen gaalvanleeng tuamdang mahmah 2 paisakphot uhhi. Netherland leh Belgium ten zong F-16s 6 tuak paisakta uhhi. Tu in Arab gam 5, US, Britain,French,Denmark,Nehterland,Australia leh Gelgium gam asu ciatciat uh ahihi. US Army General Dempsey  inbel hite Vanlam bektawh cimang hak leh kilawm in saben a ben ngiatngiat ding hi ci in September 27 ni in genkhia hi.


·      Syria gam leh Turkey gamgi Kobane  khuapi ah Kurdish te mulkim huaitak in bawl in a inn alote uh alaksak ban uhah avui atangtawh a do IS migilote US leh akilawppih US te lawmp teng in September 27 ni in numei vanleeng hawl vive tawh vazialzal in IS migilo te Phualpi pawlkhat leh Mawtaw gaalvan pawlkhat suksiat sak ci in Pentagon Gaalphualpi pan taangkokhia uhhi. Tua ban ah September 27 ni peen Zomi ten Lawm Ann neek icih daankhat in IS te ado ahi Arab gam 5, US, French, Britain, Australia, Denmark,Netherland,Gelgium  tepan Vanleeng hawlte kilawm a Iraq leh Syria gam akituaklian in simkhat in simkhawm ek uh ahihman in IS te munthupi zawdeuh teng leh alubok zawdeuh teng gamp ding in lam en uhhi. Van leeng atamzaw numei zang uha, asiamna tek uh kilak zialzial in vanlaai pan Muvanlaai in Akno atop  lian bang in leilak a IS migilo ataikelkel khawng Vanlaai ah Vanleeng kilumlet sak kawm in muitum kidem in IS gaalkaap te tantop ziauziau uhhi.


·      Japan gam Mount Ontake  ah September 26,27 ni in Meimual puahkhapna nasiatak in piang a meikhu leh suagtum te vanlaai ah kizialto in leitung puakkham zahdong in gin ngaih hi. Mi 30 naakpi in liam uha, mi 10 in khua pawknawn vetlo hi. Bangzah lei in vuk cih kitheilo himah leh mi 7 mangvilvel phot hi. Amang te zongding leh Lei vuk nelh te azong ding in  Prime Minister Shinzo Abe in gaakaap tha tawh vahonkhia ding in thupia hi.

·      Hongkong ah Democracy deih mipi atulsawmlom in tuma ninih pan nasia tak in in lungphona nei uha, Palik te in September 27 ni in siansuah dikdek uha, mi 60 vaal man in palikte zialna hang in mi 30 vaal liamna baaina tawh kidim uhhi.

·      Kawlgam gaalkaap te leh Karen minam Buhdha Biakna thautawi DKBA  te September 26 ni zingsangpan nitaakdong nasiatak in kikap uha, DKBA lampan asi aliam lian omlo in kawl gaalkaap leh palik kigawm 30 DKBA ten athau uhtawh hingmat in keemcip phot uhhi. DKBA gaalkaap lak ah Zomi nihzong in om ahihman in thungetna ah phawkciat ni.

·      Kawlgam Mualtungmi thautawi te palaai ahi NCCT, Kawlkumpi kilemna bawlpawl UPWC leh Mawlgamsung a om party 64 te Yangon khuapi kilamna Innpi ah kimukhawm uha, Kawlgam masuanding kikum khawm uhha, NCCT te Mualtung mi ai-awh in dingsawm vial uha tutung akhawmpi peen nidang pekpan kingenden Tri-party ( Tong point sai ) kimuh khopna suaksakding cih angimdeep uhleh NLD nathei kiau ahihman in Party kum 27 Birth Day bawl ung ciziau in kuamah pailo uhhi. Mualtung mi te peen icihcih sam hang ci pia leeng Bawng abang himawk hang ei



Lungdam
Thang Khawm Pauzomi

Friday, September 26, 2014

Tulaai Leitung Thuthang Tuamtuam Updates September 25, 2014



·      China gam Xinjiang ah September 21 ni in mi hiamgam pawlkhat nasepna hang in palik 4, nautaangmi 6 leh migilo 40 avek in akigawm mi 50 si hi ci in Xianghua thukizakna in September 25, 2014 ni in pulaakhia hi. Banghang in kumpi te in tuni a pulaakkhia sak pan cih ahang kuaman theizolo hi. Hih mun peen Muslim biakna te leh Dawi biakna neite kisuak ciatciat na munkhat zong ahihi.

·      US gam ah Mivom Attorney General masa peen leh kumtam aseempeen ahi Eric Holder kapan  mun kakhawlsan a, kazalaihding akiciat dong bek kaseemding ci in September 25, 2014 ni in taangkokhia hi. Nung Ferguson,MO ah Mivon tangvaalno khat mikang palik khat in akaplupna thu Congress ah adeihbang in thuluutzolo ahihman in tua hang hipipeending in kilam en hi. Mr Eric in Attorney General  kum 6 vilvel semkhinta hi.

·       North Korea gamten The Second Session of the 13th Supreme People’s Assembly kici ulianteng kimuhtuahna khat September 25, 2014 ni in Pyongyang khuapi ah  nei uha, kihelding a kilawm peenpeen North Korea te leikha maangpi ahi Kim Jong Un  meeting kahlo hi. 2011 thuneihna angah pan amasa peen meeting akahlohna zong ahihi. September 3,2014 ni in lasakpawi khat ah anunung peen kilang a tuazawh kimunawn lo ahihman in cina mahmah hikhading ci in kilam en hi. Tu in kum 31 phapan  a khangno mahmah laai hinapi mom kengkang sim ahihman damloh mahmah nakhat nei ahitam cih ki um mawhhi,

·      Iraq Prime Minister Haider al-Abadi’s in IS migilo te in New York Khuapi sung a leinuai lampi teng leh Paris khuapi sung simding in geelna nei uh cih IS gaalkaap kiman khatpa tungpan kiptak in kazakhia uhhi ci in September 25, 2014 ni in pulaakhia hi.  HIh thu hang in September 25 ni zantha paai New York Khuapi sung a om Time Squar innpi kiim teng ah police te kileh pah ziahziah uha, September nizong nasiatak in kiging ding ci uhhi.

·      September 24 ni French khualzi maimai khat IS migilo tetawh kipawl Algeria migilo te in angawntan na hang in gambup dahna lahna in September 25,26 2014 French gam Public zumtuamtuam te ah Dialkhai alangtan ah kikhai ding ci uhhi. Tuaban ah hithu hang in IS migilo te dona azahkhat khanto ding in President Hollande in September 25, 2014 ni in thupia ahihman asun azan cilo in Iraq gamsung teng French Gaalvanleeng ten kimvial zialzial uhhi.

·      Iraq gam leh Syria gam a om IS migilo te September 25-26 zantha paai US gaalvanleeng 10 in 5 tuak in kikhen in zial uhhi. Tutung peen Arab gamteng dayoff pialeuleu uha, US tebek in Overtime vaseemnung ci uhhi. Iraq gamsung ah IS te zat mawtaw 18 kamzan sak uha, Syria gam ah IS te zat Tank 4 kapzan sak uhhi. IS migilo te peen ganhing bang in ngaihsun lel uh ahihman in asi zong simding ngaihsun nawnlo lel uhhi. British te in tuni September 26 ni in Parliament ah  US te vanlam tawh huhding leh huhloh ding Vote khiatna neiding ci in Prime Minister David Cameron in taangkokhia ta hi. Denmark gamte in zong kozong ka gaalvanleeng te uh zatnading mahmah lah omlo ahihman in ci in Iraq gam ah IS migilo te go ding in F-16 Fighter Jet 7 leengkhia sakta ung ci in Prime Minister  Helle Thorning in September 26 ni in taangkokhia hi. Tuaban ah kha 12 sung ahuhding in Vanleengpi 4, galvaanleeng 3 vanleeng naseem honpikhat leh vanleenghawl 250 zong paiding ci uhhi.

·      US gam Chicago khuapi sung a om ahi  O’Hare International vanleeng tualpi leh Midway vanleeng tualpi te vanlamtawh kisai thu le la kaihkhopna innpi meikaang ahihman in September 26 ni zingsang in kikhakphot tadih hi. Vanleeng tual a omkhate zantaam maw sawtngakding cihna ahihi ci in FAA thunei te in taangkokhia uhhi.

·      India Prime Minister Narendra Modi President Obama sapna leh UN Assembly meeting kahkawmding in New York khuapi September 26 ni in ongtungta hi. US gamsung ataamsung in President Obama tawh kihoding uha, gamnih sumzon sumzuakna kikum mahmah ding ci uhhi. Mr Modi peen 2002 kum Muslim tampi that ci a ngawhnatawh US Visa apiaknop loh pa khat zong ahihi. Mr Modi in Mardison Square garden ah September 26 ni in mipi 20,000 vaal mai ah thugenna neiding athugenna peen New York Khuapi sung Time Square innpi maai ah TV tawh Live in paisak ding ci uhhi.


LUngdam ‘
Khialhna aom leh ngaihdam bawm ah maw

Thang Khawm Pauzomi