Tulaai leitung Thuthang Tuamtuam Updates October 29, 2014

·      Sri Lanka gam Badulla district sungteng ah October 29 ni in nasiatak in khuapi guah zu a tuikhang in men kicim ahihman mi 10 si in mi 300 mangcip uhhi. Inn  140 bang maaimang a pawlkhat te pi 30 asah mencim in vuknelh mang hi. Palik,gaalkaap te in micimawh huh in mimang te zong uh a abuai mahmah saan laaitak uh ahihi. June kha sung in hibang mah khat tuakngei khin uha, mi 22 si uhhi.

·       Bangladesh gam Islamist party makaaipi ahi Motiur Rahman Nizami kum 71 mithat,mibuan, mibawlsia cihte akipan mawhna  nam 16 tawh thahlup ding in Bangladesh thukhen zumte in October 29 ni in thukhen sat uhhi. Amah peen 1971 Bangladesh in Pakistan gampan suahtaakna angahnading a kha 9 sung gaalkido na ah mitampi bawlsia in that in buancih te tawh mawhmatna angah ahihi.

·      New Zealand gamte in  adialkhai flag uh athaktawh laih theihnading in 2015 kumsung khatvei, 2016 kumsung khatvei mipi I deihna kaaikhawmding ci in Prime Minister John Key in October 29 ni in taangkokhia hi. Avom tung a silver tawh laai kigelh dialkhai Flag thak kamuhding kaal kangaklah mahmah ci in Mr Key in genbeh hi.

·      Leitung ah sumbawlnading in banggam hoih pending ci in kum 9 ah khatveita World Bank te aetkaakden na uhah 2014 ading in ahoihpeen gam Singapore, anihna New Zealand leh athumna Hong Kong gamte hi ci in October 28 ni in taangkokhia uhhi. Leitung ah sumzon nading a ahoihpeen leh alempeen gam peen Dr Hau Za Cin leh Pu Hang Khan Lian te khua Singapore na himawk ei guai …

·      US gam Virginia state  pan Vanlaaizang Leitungbup khawlkhopna mun ah van apuakding Orbital Sciences Corp te bawl  Pound 5,000 agik Rocket pi khat October 28 ni akhahkhiat zawh uh asawtlo in ginneihloh pi in puakkham  a misi miliam bel kuamah omsamlo napin Rocket pi peen kaang hi. Banghang bangthu cihpeen thunei lamten akansaan laaitak uh ahihi. US te apuahkhap ciang Russia ten October 29 ni in van kisamteng tawh khat lawnto ziau uha, bangmah buaina omlo in leengto sak viauviau zo uhhi.

·      South Africa gamkhen Zambia gam I President ahi Michael Sata kum 77 England gam London khuapi sung a om London’s King Edward II zatopi pan October 28 zanlam in leitung nusia in Apa kiang ah ciahta hi. Amahpeen damloh mahmah nakhat tawh agampan zato ava kilak ahihi. Kua in amamun ah President seemding cih Zambia Cabinet ten October 29 ni nasiatak in thukin kikupna khat neipah uhhi.

·      Australia gam ah IS migilo makaaipi khat ahi  Mohammad Ali Baryalei  Syria gam ah October 29 ni in si hi cihthu kiza a ahimah cih telciantak in kakan laaitak uhhi ci in Australia kumpi thunei te in taangkokhia uhhi. Mr Baryalei peen Australia gampan Syria gam ah IS gaalkaap nasemding in avapai ci in genkhia uhhi.

·      Nipi Kaal 6 sung IS migilo te leh Kurdish gaalkaap te akinawk ziahziah na Syria leh Turkey gamgi a om Kobani khuapi ah Kurdish gaalkaap te huhding in Iraq gampan Kurdish gaalkaap 150 leh gaalvan mawtaw 80 tawh Turkey gam October 29 ni in tungta uha, zing le thai ah Kobani luhtading ci uhhi. October 29 ni mah in Syria gamsung a kumpi tawh akido ngiatngiat mipi gaalkaap 200 te Kurdish gaalkaap te huuding in Kobane khuapi luh kipan ziahziah ta uha, asawtlo in IS migilo te Kobane khuapi pan hawlkhia mangzoding in kilam en uhhi.

·      South Korea te in North Korea te kiang ah Unau khat Tuun sungkhat pan piangkhawm ihihna suutkhawm ding October 30 niciang kam kikum khawm tapeuh ni ci a athuum ngeetnguut na uh North Korea te in asanzawhloh nathu uh October 29 ni in zasak uhhi.

Lungdam

Thang Khawm Pauzomi

Khialna aom khaak aleh ngaihdam bawm ah maw

Tulaai leitung Thuthang Tuamtuam Updates October 28, 2014

·      Zomi te kimawlna lam ah gualtawh tanbang kimtheihna ding a malaakna nasiatak a anei ZOFA te Tukpeeng kimawl a (9) veina October 27 ni in kipan ta hi.Tukum peen Kentucky State buppi a om Zomi teng pia khat pianih tek kipawlkhawm a $1,600 tawh Sponsor kipia hi ci in ZIKY makaaite in gen uhhi. Muhtheih  nahoih sepna khat peuhpeuh ah Zomi-KY te bang in ma ilaakding thupi mahmah hi. Ivek in ikigawm khawm theikei zong in alom omkhawm te vaaihawm khawmleeng  I Zogam,Zomi ading nalianpi kisemzo ding ahihi. Gentehna in Tulsa bang ah Zomi 6,000 kiim om ahihman mikhat ciang khakhat 50cens piakhia kiau leeng kuamah lah zawnlawh tuamlo ding $3,000 tawh nalianpi khat khasim akiseemthei tawntung ding ahihi. Tulsa ten seemkei cihna hilo zaw in gentehna in nasaansak zaw un.

·      Vietnam gam ah mihau peen ahi Mr Ha Van Tham sum leitawi piak nasep asepna ah thumanlohna om cih muanmawhna tawh Vietnam kumpi thuneite in October 25 ni in Hanoi khuapi pan kiman hi ci in kumpi thunei te in taangkokhia uhhi.

·      British gammi IS migilo te mat John Cantlies  Syria leh Turley gamgi Kobani khuapipan thu agenna video khat IS migilo te in October 28 ni in khahkhia uha, Kobani khuapi peen IS te khutsung hi kuakuan akuanzong in lakhia zongeiloding ci in genkhia sak uhhi.

·      April kha sung a sangnau pang numei 219  agumang Nigeria gam migilo Boko Haram te in October 26 ni in naupang numei leh pasal kigawm mi 30 Nigeria gam nitumna lam Borno state sung khuano te pan mancip leuleu uhhi. Tuabek hilo in aneekding uh Bawng 300 zong sut laailaai uhhi.

·      Malaysia kumpi khauhtak a anawlngam masa peen leh atawpna zong ahi pah kumpi langpang Anwar Ibrahim in 2008 kum a kumpi thuneite mawhmatna tawh kisai lungkimlo in thukhenphatding angetna thu Malaysia gam saangpeen thukhenzum te in October 28 ni in kikupna kipan ta uhhi.  Anwar peen 2008 kum in Pasal daaileenna vang ah anana nakhum cihmawhmatna tawh kum 5 ama lamsa Sungai Buluh thong Innpi ah akikhum ahihi. 2012 kumciang himah hi cihtheihnading lahtheih kician mulo uh ahihman in athu Malaysia thukhen te beiska uhhi. 2014 March kha ciang kumpi lampan thukhenphat ding in Saangpeen thukhen zum puakto uha, Anwar lungkimlo in amalampan zong nialna thusunna neikik hi. Tuni Putrajaya saangpeen thukhen zumpi maai ah amami te a 100 asim in thapiakna vanei uhhi. Azenzen saangpeen thukhen zumten Anwar mawhmah acih teitei leh thong ah kikhumding a kum sung zumhongtheiloding cih ahihman 2018 kiteelna ah luutkhalo theiding ahihman in Malaysia gam buai maitheiding in kilam en hi. Anwar thuakna atom in., 1993-1998 kikaal Prime Minister Mahathir khutnuai ah Deputy Prime Minister seem hi. 1999 kumciang apanmun zangkhial cih mawhmatna tawh thong ah khum uhhi. 2000 kumciang azi mawtaw hawlpa tawh mawhhi ci in mawhmat uhhi. 2004 kumciang thong inn pan khahkhia uha, kumpi langpang makaai dinmun ah ongpang hi. Mp kiteelding ongnaaita ahihman in 2008 kumciang mankik uhhi. 2012 ciang mawhna neilo ci in suahtaakna pia uhhi. 2013 kum in kumpi langpan party makaai ongseem in gualzawhna ongngah dekpeetmah hi. 2014 ciang kitamahmah ta ban ah 2018 kum ah gualzo taktak ding cih ummawh uh ahihman in amawh ngeina te enphading in sangpeen thukhenzumte samkik uhhi.

·      1970-80 sung a Japan gammi 13  North Korea ten aguukmang nathu tawh kisai in telcian tak akanding leh N Korea tetawh kihoding in Japan gampan maakaai te Pyongyang khuapi October 28 ni in tungta uhhi. Japan Foreign Ministry Junichi Ihara in Japan makaaite makiah to hi.  HIh Japan gami kiman 13 te lah mi 5 peen 2002 kum in Japan tungkik uha adang 6 te peen North Korea ten sikhin ci in Japan te umlo uhhi.

·      Ukraine gam nisuahna lamteng ah buaina abawltawntung ahi Russia deih thautawi kumpi langpang pawl in November 2,2014 niciang kiteelna kabawlding uh ci in October 28 ni in taangkokhia uhhi. Hih thutawh kisai in Ukraine tebel kengsalian uha, Russia te leuleu in kathukim pih phamahmah uh ci in taangkokhia bilbel uhhi.

·      Iraq gam Baghdad khuapi pan tai 30 na mun ah amah le amah asingam migilo ten munnih ah October 28 ni in Bomb puakkham sak uha mi 34 sipah a dang tampi tak aliam aom ban ah inn le lo nusia a taaikeek zong pawlkhat mah om uhhi.

·      North Korea Leikha Maangpi Kim Jong Un zong nungsung teng  mangdildel in akilat kiciang puteek vunkhu mahmah bang in ciangkhut tawh ongkilang khia a leitung  mihingte zong angaihsut ngamloh  UN mihing zaleenna vaisaite kiang ah North Korea gam ah bang kiseem cih nakan thei uh ongpai tapeuh un ci in samkeeita ci in UN te October 28 ni in taangkokhia uhhi.

·      Kurdish thautawite mat IS migilo thautawi te CNN ten October 28 ni in thudotna bawl uha, atamzaw te genna ah amaupeen IS gaalkaap piannading in $2,000-3,600 kipia a, IS gaalkaap asuahphet in hangsan nading zatui nesakpah uh in tuazatui aneekkhit uhciang sihding launa lungsimbei ci in gen uhhi. Tua ban ah atamzaw genna ah IS gaalkaap te peen atamzaw gamdang mi hi in Chinese nangan om ci in genkhia uhhi.

Lungdam

Thang Khawm Pauzomi

Tulaai leitung Thuthang Tuamtuam Updates October 24, 2014

·      US gam Marysville khua , Washington state a om Marysville high school ann neekna mun pan kipan in thautawh kikapna October 24,2014 den mahmah in piang a sangnau pang nih aliam kimu phot in thau ahihleh lawngtampi ging ahihman sangnau pang tamsim liamkhading in kilam en hi. Palik leh sangsiate kikop in sangnaupang te sangpualam ah anawnkhiat saan laaitak uh ahihi.

·      US gam Dallas khuapi Texas state a Ebola natna vei pasalkhat a khoi nurse nihte atung uh ah Ebola kici lungno tawh kisai bangkilkel nawnlo a zong kinaih nawn kilkel lo uhhi ci in zato te in taangkokhia uh, Ebola natna pan asuaka ahi Nina Pham zatopan atuahzawh ciang White House ah President Obama tawh vakimu a Nina peen Asia mi ahihman in President zong nuamtuam mahmah in napom tentan hi. Ahizong in Nina Pham in thuthak kante tung a genciang leuleu in thunget sakteng tung ah lungdam akohkhit ciang President pa aphawk ding isak leh Ka Uital ngaihno tawh kimu kikkhading kahihman kalungdam lei cimawk hi.

·      Egypt gam Sinai Mualtung a om gaalkaap phualpi ah Biakna haipih gaaldo pawl hiding a upmawh pawlkhat in October 24 ni in bomb na sukham uh a Egypt gaalkaap mi 26 sihkhat in si hi ci in Egypt kumpi thunei te in taangkokhia uhhi. HIhbang danlian mah in September khasung khatvei tuakngei khin uha gaalkap 11 in sihlawh khin ngei hi.

·      Nungkha sung in IS migilo te in Iraq palik khat akap na vuah Sarin Gas kici daatnamkhat zang uha hihpeen leitung bup thukhun palsatna khat ahihman in hih IS te bangzah nei a koiteng ah zang cihte telciantak in US suulzuih ding hi ci in Secretary of state John Kerry in October 24 ni in genkhia hi.

·      Ongtung ding November 8 niciang Kawlgam Democracy makaaipi nu ahi Daw Aung San Suu Kyi Kaya state Luaikaw khuapi ah paiding a mipi tetawh kimuhkhopna nei ding ci in Kaya state NLD zum te in October 24 ni in taangkokhia uhhi. Hih thu hang Kaya minam te lawp mahmah uha, pawlkhat bang in ann neekding mangngilh zaw uhhi. Ahizong Aung San Suu Kyi icih peen Bawngtal asa khawng zong pawlkhat na om lai veve uhhi.

·      September kha pan amangthang Kawlgam thuthang kaaikhawm Ko Aung Kyaw Naing peen kawlgam gaalkaap ten keem in October 4 ni in gaalkaap te thau sut in taaisawm ahihman kikaaplum khin ci in kawlgam gaalkaapte in athusuahna uh October  24 ni in kawlgam laaihawmlam saite tung ah puak uhhi. Hih Ko Aung Nai kicipa peen Mualtung thautawi te leh Kawlgam gaalkaapte kikaal thu manlangtak a leitung bup theih ding a a ongpuakpahpah pa khat zong ahihi.

Lungdam lei ei

Khialna te ngaihdam bawm ah maw

Thang Khawm Pauzomi

Tulaai leitung Thuthang Tuamtuam Updates October 23, 2014

·      Syria gam sung a om IS migilo te US leh apawlpih gam ten adozel na uh ah September kha pan kipan October 23, 2014 niciang mimal 553 golum khinta uha tuate peen IS migilo pawlpimi 461, Adang thautawi migilo 57 taangpi taangta te mi 32 ci in UK gamsung bulphuh Syria gam ensimden The Syrian Observatory for Human Rights te in October 23, 2014 ni in tangkokhia uhhi. Tuaban ah October 23, 2014 ni mahma in zong Kurd minamte ahizong in US leh apawlpih te ahizong IS te dodo laai uh a misi kibehlapding ci in genbeh uhhi.

·      Zanni October 22 ni a Jerusalem khuapi ah Palestinian khat in mipi lak ah mawtaw hawl in  naupang khat si a migiatna aliamna peen  Palestinian President ahi Mahmoud Abbas I vaaihawm nahi ciin Israel Prime Minister Benjamin Netanyahu October 23, 2014 ni in genkhia hi. Hih thu tawh kisai in limpha kikan telcian ding a avaaihawm akitheih hunhun ah tuamun peen haaltumding ci hi. Israel leh Palestine ongbuai kik leh kilawm cin mipawlkhat ten ummawh uhhi.

·      Pakistan gam I khuapi khat ahi Quetta khuapi sung ah October 23, 2014 Mini Bus khat muitum kawm in migilo te in  te in thau leh bomb tawh mipi lak kap uha, mi 13 sipah in 29 liam uhhi. Hih thu hang in Pakistan gaalkaap te kitheh thaangpah ziah in migilo pawl zong in kilek zialzial ngen uhhi.

·      Bangladesh Islamist makaaipi lui Ghulam Azam kum 91  lungtang natna tawh October 23, 2014 ni in thong sung ah sita ci in Bangladesh thunei te in taangko khia uhhi. Mr Azam peen 1971 Pakistan gam pan Bangladesh suahtaakna laak kum in ngongtatluatna pawlkhat nei ahihman  July 15,2013 ni in kum 90 sung thong ah khiatding in thukhen mangten thu akhen uh ahihi.

·      Zanni October 22 ni a Canada gam Ottawa khuapi sung War Memorial leh Parliament House te atokbuai gawp a gaalkaap khat akap lum peen amin Michael Zehaf-Bibeau  hi in kum 32 phata a, US gamsuak Lybia gammi ci uhhi. Tuaban ah tukum sung in Syria gam vazin ding in Passport kumpi ah ngenngei ci in Canada kumpi thunei te in October 23, 2014 ni in taangkokhia uhhi. Amah peen War Memorial ah gaalkaap khat athah khit ciang Parliament Innpi ah ataaikawm mi bankaap a palik te tawh akikap tuahna pan Sergeant-at-Arms Kevin Vickers acih palik pa in sialtal kaap in nakaap ahihman in sipah hi. Canada gamte in milauhuai IS migilo te tawh kizomding a upmawh 90 neilaai ci uhhi.

·       NATO pawlpi mi khat mah ahi Estonia gamte vanlam ziikpi tung ah Russia gamte gaalvanleeng nih aleeng NATO gamcing gaalvanleeng te in October 22 ni in naman uh ahihman in Estonia gam ten Russia palaaipi pa October 23, 2014 ni in leengla nakhah pah uhhi. Russia ten hibang in migam tung ah gaalvanleeng aleenna tamsimsim ta a khialnuam lo den uhhi.

Lungdam

Khialha aomkhaak aleh ngaihdam bawm ah  maw