Tulaai leitung Thuthang Tuamtuam Updates August 10,2014

Israel Paltan te off day lading kithawina

·      Zomi sung ah Lasa siam mahmah ahi V.C Mang ongtungding August 16-17 nisung Bowling Green khua Kentucky gamkee ah ongzinding a kizai ziahziah ding hi. Atlanta khuapi pan Musician E Tuang, Mungta leh alawmte zong ongpai toding uhhi.   Amunding peen ZMBC Biak Inn hiding ahihman anaai aom akuamapeuh nong kihel hamtang ding un kong neek ngaih ngaungau hi.

·      Kawlgam sung kilemna bucing aomtheihnading leh Mualtung mi thautawi te tawh kilemna suaikaih khitciang Political Dialogue  kalsuan theinading in August 11 niciang Yangon khuapi sung a om MPC Hall ah kawlgam sung a om Party 60 vaalte leh Kawlgam kumpi lam thuneite kimukhawm ding uhhi. Tuaban ah Mualtungmi thautawi pawl leh U Aung Myint makaai kilemna bawlpawl August 15-16 sung kimukhawm ding uhhi.  August 18 ni leuleu ciang political Dialogue kaalsuanzia ding Party kheempeuh tawh kikumkhawm leuleu ding ci in MPC zumten August 10, 2014 ni in taankokhia uhhi.

·      Kawlgam ASEAN Lubawk khawmpi avakah ahi US Secretary of State Mr John Kerry in kawlgam kumpi thuneite tawh akimuh khitciang August 10, 2014 ni in The Lake Garden Hotel ah thu kante tawh kimuhkhopna nei uha, Kawlgam peen a upmawh zah a akhantohloh na apulaak ban ah naakpi tak in tha apiakbehna pulaak hi. August 10, 2014 zanlam ciang Pi Suut Cing tawh kikop in thupulaakna khat bawl leuleu ding uhhi.

·      Iran gam Mehrababe  Vanleeng tual pan aleengkhia Iran gamsung teng azin kawikawi khat asset thakhat in mitvat ahihman in aleenzawh asawtlo in August 10, 2014 ni in miteena khuasung ah kia in mi 39 si in mi 9 naakpi tak in liam uhhi. Kumpi thuneite in black box azonsaan laaitak ahihi.

·      Israel leh Hamas kidona Hamas lampan thaneem mahmahta uh ahihman in August 11 nipan kipan in nai 72 sung kikap nawnlo leuleu ding in kangnih thukimna August 10, 2014 ni in ngah leuleu uhhi. Tuniciang Palestine mi asi 1,935 hia mipi 1,408 ahihi. Mipi tezong numei 452 hi anaupang 235 hisawnsawn uhhi. Cileeng Hamas gaalkaap 527 kigozo chiding ahihi. Israel lampan bel 64, nautaang 2 leh Thailand gammi naseem khat si uhhi.

Lungdam

Thang Khawm Pauzomi