Tulaai Leitung Thuthang Tuamtuam Updates October 10,2014

·      Kawlkumpi te in Mualmi thautawi tetawh kilemna ci n a otot laaitak tuma ni 5 pan kipan in ni 5 sung Shan state khunglam teng ah Shan Gaalkaap sak le khang kipawl in Kawlgaalkaap tetawh nasiatak in kikaap ngeekngeek uhhi. October 10 niciang Shan lampan galphualpi khat sum in mipi 4 si uha, Kawlgam gaalkaap honmang khat si ci hi. October 10 nibel thauging daaizaw deuh samven ahizong kawlgaalkaap ten gaalkaap behlaplap in kiheemnuam lo ahihman kikaap kik mah kuul inten ci in Bumu Sai Hlah in genkhia hi.

·      Akizon phial mah in DKBA kici Karen Buhdha gaalkaap te leh Kawlgaalkaap te October 10 ni in Kawkreh khuakim teng ah nai lang sung kikaap uha, Laibuai khuakim ah zong kikaap uhhi. Lam etna daan ah kikaap kaap laaiding in lam et huai ci in DKBA makaai ten genkhia uhhi.

·      2014 Nobel Peace Prize Pakistan gammi numeino Malala Yousafzai leh India gammi Kailash Satyarthi te in akibang in ngahtuak uhhi ci in Nobel  prize ngahding ateelkhia pawl in October 10 niin taangkokhia uhhi. Adang Nobel minphatna tampi tak omnapin in hih Nobel Peace Prize teen Nobel Prize kiciphadiak se hi. Amau geel pee naupang te alaamsaang nuam ngiatnasemte in kiciamteh hi. Malala bang 2012 kum Pakistan gam ah laaisin khuan angahlo numei le naupang te laai ahilh ngiatngiat napan Taliban te alutang thautawh nakapsak in Britain gam ah ki at ahihi.

·      North Korea gam a thuneihna  ala ahi Worker’s Party kum 69 cinphawkna thupitak October 10 ni in bawl uha, Leikha Mangpi Kim Jong Un kilang tuanlo ahihman in mi atamzaw in gilbeemlam khawng kikhumta  maw cin lunghi mawh mahmah uhhi. North lampan Souht Korea gam ataaisuk pawlkhat leh South Korea mipi pawlkhat in North tawh gamgi ah North lam tuding in Muutpuak golpipi tung ah North Korea leh Kim Jong Un gensiatna laaite gelh in vanlam ah khah ahihman in North Korea ten thautawh nakaapkhia ngekngek uha, Sout Korea gamsung athautawng tu ahihman in South Korea tenzong nakap tokik pahpah uh ahihman in October 10 nitha paai sak le khang meikuang kikheek ngekngek uhhi.

·      Turkey leh Syria gamgi a om Kobane khuapi sung ah IS migilo te leh Kurd minam thautawi te nasiatak in October 10 ni omkik leuleu a, IS thahaat kik mahmah ahiman in Kurd te gaalpanna phualpi khat lakik zo uhhi. Azenzen in IS zo lian bang hileh piteek puteek ataizolo Kurd minam 700 bang om a IS ten gawltan mang lianding ahihman dipngeek na mahmah ci in UN teng tangkokhia uhhi.

·      LEitung ah akilau mahmah natna khat ahi Ebola natna hang in Africa gamsung leh mun tuamtuam ah mi 4,000 cingta a beilam sang kizelh lam manawh in pungmahmah ahihman in lauhuai ci in WHO ten October 10 ni in taangkokhia uhhi.  US gam vanleeng tual kheempeuh bang ah tu in sit kipan ziahziah ta uha, EU pawlkhat ah zong kipan ta uhhi.

Lungdam

Khialh aom leh ngaih dam bawm ah maw

Thang Khawm Pauzomi