Tulaai Leitung Thuthang Tuamtuam Updates July 19, 2014

·      Zomi Innkuan Kentucky Inc. mintawh 2014 ading akhatveina Zomi khawmpi July 19, 2014 ni in nopcitak in kinei a , Kawlpi ZYA I ameeng ahi ZOFA 2014 vaaiding, Zomi Makaaipi khat ahi Pu Gin Kam Lian vaaidawnziading cihte genkhopna nasiatak in kineithei hi. Zomi vive hihnatawh kizui in Zo-ak vive pum 40 kigo a, Zohuan in kihuan lungnuam gilvah tak pawipli kizo thei hi.

·      Zomi lasiam mahmah Pasian leh minam a it mahmah Sianu Cing San July 20 Sunday ni ZMBC Bowling Green ah zingsang kikhop hun ah hunzatna leh Lasak nei in Zomi tetawh biakpiakna neikhawm ding hi.

·      Israel te in Gaza leilamtawh abuluh uh anithumna July 19, 2014 ni in Palestine mi 30 golum uha, tu in Palestine lam misi 340 cingta in Israel mi 3 sita hi. UN Security Council te July 18 ni  in thukin meeting nei uha, UN General Secretary Mr Ban Ki Moon amah ngiat Middle ah paiding in khensat uhhi.

·      China gam Human kual sung agamla khualzinna lampi tungkhat ah July 19, 2014 ni in Bus khat leh Lorry pi khat kitaihkha a mi 30 si in pawlkhat naakliam uh ci in Xinhua thukizakna in genkhia hi.

·      OSCE kici Leitungbup Vanleenglam thukancian pawl in July 19, 2014 ni in Malaysia vanleeng kikaapkhia akiatna mun kancianding in kuankhia uha, Russia deih thautawi tapong te in cingcip in athukannop zah un kikantel theilo hi ci in genkhia uhhi. Tuaban ah thukician akikantheihnading akisam vanpawlkhat zong tapong te in naseel mang ci uhhi. Hih thu hang in nitumna gamlam Ulian te in Russia tekiang ah amanlaang in hih Tapong te thuhilh ding in ngetna bawlciat uhhi.

·      US khuahun siam USGS te in US gam nisuahna lam kuamteng ah Zinlin theihnading lauhuaina omhi ci in athak in taangkokhia uhhi. Alau huaipha deuhna state te ahihleh state 16 hi a tuate in  Alaska, Arkansas, California, Hawaii, Idaho, Illinois, Kentucky, Missouri, Montana, Nevada, Oregon, South Carolina, Tennessee, Utah, Washington, leh Wyoming. Zomi te kiging pian leeng maw

·      Egypt gam Farafra leh Cairo lampi tung ah thautawi migilo pawlkhat in Egypt gaalkaap te gate khat bomb nasiah in  in nasiatak in puahkhapna om ahihman in gaalkaap 20 si in pawlkhat liam uhhi.

·      Iraq gam Bagdad khuapi sung mun 5 aah July 19, 2014 ni in bomb puakkham a mi atawmpeen 26 si in tampi liam hi ci in palik te leh zato lamte in taangkokhia uhhi.

·      Kenya gam Mombasa khuapi pan Lamu kikaal azin Bus pi khat Witu khuapan Km 50 kigamlaatna mun ah July 19, 2014 ni in migilo te in bomb nasiah uha, Bus hawlpa leh mi 6 si in pawlkhat liam uhhi. Kenya gam ah tu summer sungbekbek in migilo te in mi 100 thatta uhhi.

·      Tuni July 19, 2014 nipeen Kawlgam makaai Bu Aung San leh alawmte sihni ciaptehna gaalhaangte ni ciaptehna ni a 67 veina hi a kumdang sang in kawlgam bup khua tuamtuam suaktatak in akibawltheih kum amasa peen hiding in kiciamteh hi. Kawlgam Mangtalte ahi Vice President Dr Sai Mauh Khan, Upper House Speaker Tura U Swe Mann cih Gaalhaangte phawlna innpi ah pai in zahtaakna vapia nong uhhi. Tua ban ah mipi tung ah khaamna omlo in a utut hih Gaalhaang innpi ah zahtaakna vapia thei in Zomi te party ahi ZCD te in zong kawlgam gaalhaangte zahtaakpiakna vanei thei uhhi.

·      South Africa gam ah vun vom vunkaang tankikim nading a naseemkhia Nelson Mandela phawkna in asihkhitzawh akhatveina Nelson Mandela ni ci in July 18 ni South Africa gam in ciamteh in kum 67 minam ading anasepna zahtaakna in gambup ah minutes 67 sung daaidide in omciat uhhi.

Lungdam

Thang Khawm Pauzomi