Tulaai Leitung Thuthang Tuamtuam Updates April 20, 2015

Tulaai Leitung Thuthang Tuamtuam Updates April 20, 2015

·      Rakhaing gam kumpi langpang ahi AA-Arakan Army te amau leitang ahi Rakhaing gam pan nasep kipantaktak ta uha, April 17-18 ninih sung Kawlgaalkaap tetawh nasiatak in kikaap uhhi. Amau gamsung bek hilo in TNLA, MNDAA tetawh zong kipawl khawm in Sen leh Kawlgam gamgi dung Laukhai kuam teng ah Kawlgaalkaap te dokhawm ziahziah uhhi.RFA

·      India  gamte in tuma siahsiah gamdangbawl gaakvan atawmzaw lei ngiatngiat Leitung ah gaalvan alei peen himah leh tu in US tawh kikop in gaalvan bawl kipan ziahziah tading a, mundang pan leinwanlo in azuakziahziah gamhitading ci in  Galvan bawlzia a encik pawl in April 18, 2015 ni in taangkokhia uhhi.BBC

·      IS migilo te in mawhna neikilkel lo Ethiopia gam mi Christian biakna zui mi 30 abanban athah ngiatngiatna uh video minutes 29 asau khat online tungtawn in April 19 ni in khahkhia leuleu uhhi, Hi thu hang in Ethiopia gambup April 20, 2015 nipan nithum sung asi agammmi te uh zhataakpiakna in daaidide ding ci in taangkokhia uhhi.CNN

·      Taiwan gam leh Japan gam taw lam 6.8 ahaat zinlinna in April 20, 2015 ni in nawkgawp a inn sia lo sia leh asi alia bangmah kumpi lampan taangkokhiat na nei thei naailo uhhi.VOA

·      Egypt gam thukhen zum saangpeen te in Muslim Brotherhood party member mi 22 te thahding in April 20, 2015 ni in thukhenna nei leuleu uhhi. HIh mite peen 2003 Cairo khuapi a palikzum simtetawh kizopna aneih hang uh ci in gen uhhi.VOA

·      Philippine gam leh US gamte kipawl a gaaldodan sinkhopna April 20, 2015 ni in kipan ziahziah ta uhhi. HIh pawipi sung ah Philippine gaalkaap 50,00 leh US gaalkaap 65,000 kihel uhhi. China ten bel engiaugiau in nuihsan hiuhhiau uhhi.VOA

·      Somalia gam Garowe khuakiang ah Naupang te ahuh UN te mawtaw al-Shabab migilo ten April 20, 2015 ni in naphial kaap uha, UN nasem mi 4 leh nautaang 3 si in UN Naseem mi 4 naakpi tak in liam uhhi.VOA

·      Yemen gam khuapi Sanaa khuapi a kumpi langpang te gaalvanlhualpi Saudi leh apawl ten vanlam pan April 20, 2015 ni in Beltung nakhiat ek uha, vut le vaai suak zihziah ahihman in mi 25 simtheih si in 300 liam uhhi. Hih Yemen gam kumpi te huhding in Iran te akithawi khaakleh acingding in US gaalvanleeng pau Tembawpi Tuipi tung ah kakileh saksak uh ci in Pentagon ten April 20, 2015 ni in genkhia ta uhhi.BBC

·      Kawlgam sung kilemna ding bauipih laaitak un Mualtungmi thautawi KIA leh Kokant tetawh kikaapna nasiatektek a, April 18,19 nisung Phakant kuam ah Kawlte leh KIA te nasiatak kikaapna nei uhhi. (Kawl gaalkaap te atha neem laaitak un thautawi kheempeuh in thakhat in dotek ding uha, Chin state panzong Veih tawh doding ziahziah ta ci uhhi-Abehlapna hatah cini ei ) VOA

Lungdam mahmah

Thang Khawm Pauzomi

Tulaai Leitung Thuthang Tuamtuam Updates April 17, 2015

·      Iraq gam Irbil khuapi a om US te Palaai zumpi kiang ah Bomb puakkham a mi 3 si in 5 liam uhhi. Tuni mah in Baghdad khuapi sung mitam mahmah munkhat ah bomb puakkham a, mi 29 si in mi 20 liam uhhi. Hih bomb puakkhamsak peen ko kahi uhhi ci in IS-Islamic State migilote in taangkokhia uhhi.VOA

·      Maaikaal sung ah Australia gam Melbourne khuapi sung a kibawlding Gaalpi masa laai a  gaalkaap te kum 100 cin pahtawina pawi asusia ding IS migilo te khut zat khangno mi 5 AU palik ten April 17, 2015 ni in man uhhi. Tuaban ah adang aomlaai khaakleh ci in Palik 200 in khuasung pheklek ziahziah uhhi.BBC

·      Vietnam gam pan Australia gam ah gambeel ngending a Tembaw tawh apai mi 50 Australia gam atung sa April 17, 2015 ni in agam uh puakkik ci in Fairfax  thuthang te in gen uhhi. Ahizong in kumpi thunei lampan bangmah gencianna neinailo uhhi. Nungkum in Sri Lanka gammi 157 zong agamsung pan un nawtkhia in Naru tuikulh tung ah koih miau uhhi. BBC

·      Saudi Arabia gamte in Innteng naseem Indonesia gammi numei Siti Zainab kum 37 April 15 ni in ngawngtan uha, April 17, 2015 ni in Kami Binti Medi Tersim kici nupi khat ngawngtan leuleu uhhi. Hih Numei geelpeen Naucing Innteeng naseem uh hia, anaucin te uh that ahihman in thukhen zumte thukhen bang athuak uh ahihi ci uhhi. Hih thu hang in Indonesia kumpi te in Jakarta khuapi a Suadi palaaipi te hawlkhia pah lel uhhi. BBC

·      Iraq Avamangpa ahi Saddam Hussein I mimuan mahmah lak ah acianlaai leh US ten adeih valval uh mihingkhat ahi Izzat Ibrahim al-Douri kum72 Baghdad khuapi saklam Salahhuddin province sung ah April 17, 2015 ni in gaalkikaap napan si hi ci in Iraq kumpi te in taangkokhia uhhi. Douri nautang tenbel nial uhhi. Ahizong in DNA sitding in Baghdad khuapi lam ah aluangpuaphot uhhi.Amah peen IS migilo te kipatkhiatna pupi khatzong hi ciin gen uhhi.BBC

·      Afghanistan gam Jalalabad khuapi sung Bank maikhat ah April 17, 2015( April 18 Asia hun ) in migilo khat in Cycle tawh ataaikawm amah le amah kipuakkham sak a, mi 22 si in 50 liam uhhi ci in Afghanistan gam thunei te in taangkokhia uhhi.BBC

·      Ko Kant gaalkaap 250 kiim taw Ko Kant te phualsaatna Gaalphualpi Kawl tuibuah pawi sung in Kawlgaalkaap ten hanciamtak in asimleh April 17, 2015 ni in kalazo uha, kawl gaalkaap 17 si in 110 liam ci in April 18 ni in kawlgaalkaap ten taangkokhia uhhi. Ahizong in Ko Kant leh Ta-aih gaalkaap ten hikei ci in nial uha, Ko Kant phualpi taktak alaakzawh nading uh hanciam mahmah kuullaaiding leh tamkhop beikulding ci in nuihsan uhhi. May 1,2015 Wa gam a kibawlding Mualtungmi khawmpi ah Ko Kant leh Ta-aih te apailohding kawlkumpi in deih himah leh sapna ngah kahihman un kapaiding uh ci in apawlnih un gen uhhi.VOA

·      Latin-American leh American te kikaal ah Palaaipi asem Pope Francis ongtungding September kha sung  USA gam ngaihhawh in ongzinding a, Cuba gamzong luutsuakding geelna nei himah leh luutding luutloding cih khensat zo mahmah naaikei ci in Vatican zumpi ten April 17, 2015 ni in taangkokhia uhhi.VOA

Lungdam

Tukaal sung Busy lua mahmah kahihman thuthang ongsuakzopan ngaihdam bawm ah maw

Thang Khawm Pauzomi

Tulaai Leitung Thuthang Tuamtuam Updates April 12, 2015

Tulaai Leitung Thuthang Tuamtuam Updates April 12, 2015

·      Zomi sung ah Music leh Kawl Laam tawh Pasian ongzatsak mahmah Sia David Sum te Nupa Bowling Green khua ah April 10, 2015 pan April 12,2015 sung MAG te makaihna tawh Phatna leh biakna tawh kisai thusinsakna ongnei a, Tua ban ah nitaak leh kikhop hunte ah “Hih Sung Tung ah Ka Pawlpi kalam ding “Mate 16:18 na bulphuh in thuhilhna ongnei a mipi in tha kingah mahmah hi. BG News

·      US Secretary of State luui, 2008 President dem in Obama alel President Luui Clinton zi Pi Hilary Clinton in 2016 ciang ama Party Democratic party pan President kadem ding ci in April 12,2015 ni in taangkokhia tatak ta hi. Tuni mah in ama Website pan Camping bawl kipan pah ziahziah a, mipi paakta kisa in awngzaihziah bek uhhi.BBC

·      Egypt gam Sinai mualtung  Sheikh  Zuweid khua sung ah April 12,2015 ni in singnuai ten Bomb puakkham sak uha, mi 19 si a, mi 30 liam uhhi. HIh singnuai mite peen IS migilo te tawh kizom kipawlna hi ci in Egypt gam thunei te in genkhia uhhi.BBC

·      America leitang tung a teeng makaaipi te a 7 veina khawmpi Panama gam Panama khuapi ah anithumna nuamtak bawlthei uhhi. HIh mun ah athulamdang mahmah in kum tampi ui le ak abangtawntung  Cuba President Raul Castro., Venezuelan President Nicolas Maduro tetawh lawmta bang in kimukhawm hialhial uha, American leh Latin American huiihnun daan ongman hiauhiau ta hi.VOA

·      Libya gam Tripoli khuapi sung a om South Korea gamte Palaai zumpi sung April 12,2015 ni in mawtaw tungpan thautawi amin kitheilo khat in bankaap a , Libya gammi zumcing mi 2 si in adang pawlkhat liam ci in South Korea gam thunei te in taangkokhia uhhi.BBC

·      Bangladesh gam ah kumpi langpang Islamist makaaipi Mohammad Kamaruzzaman 1971 kum Pakistan gampan suahtaakna alaak laai un asepkhial mawhna tawh April 12,2015 ni in Dhaka khuapi sung a om Central Jail ah khailum geu uhhi. Hih thu hang in amah adeih mipi te kilomcitcit uha, buaina nasiatak piangsakding in kithawi uha ahihman kumpi thunei te kigingmahmah ban ah mipi kidawm ding in thupia uhhi.CNN

·      Saudi Arabia gam leh apawlte in Yemen gam khuapi Taiz khuapi a om Houthis kumpi langpangte Camp pi nasiatak in vanlam pan Nahtang um khiatnapawi pi khat bawl kik leuleu uha, Gal tampi asihban ah khuasungmi 8 zong si uhhi. Saudi leh pawlten Yemen gam vanlam pan anuai uh kaalnih ongcing hita hi.VOA

·      IS migilo pawlzong ongkhauh pai kik leuleu uha, Iraq gam Anbar province te khuapi ahi Ramadi khuapi April 11,2015 nipan busim kipan kik leuleu uha, April 12 Iraq gaalkaap tetawh nasiatak in mikaptuahna nei uh ci in Iraq gaalkaap lamten gen uhhi.VOA

·      Kokant leh Kawlte kidona ni 4 sung tatsatlo in kizomtoto a, langnih tuak in asi aliam tam mahmah ta ban ah Kawlgaal kaap ten gaalkaap, galvan alomalom athuang athuang in behlap uh ahihman in  kidona muhnop to teltek ding ci in Kokant makaai U Htun Myat Lin in April 12 ni in genkhia hi. VOA

Lungdam

Thang Khawm Pauzomi

Khialna aom khak aleh ngaihdam bawm ah maw

Tulaai Leitung Thuthang Tuamtuam Updates April 10, 2015

·      Morocco gam Tan Tan khuapi kiang ah April 10, 2015 ni in Naupang pua Bus pi khat leh Sathau pua mawtawpi khat kiphu kha a, naupang 35 amun ah sipah in mawtaw geel akattum ban ah pawlkhat liam uh ci in Morocco State leh Local Media te in taangkokhia uhhi.CNN

·      2016 US President kiteelna ah Democratic party pan demding maw demlo ding cih Pi Hilary Clinton in April 12,2015 niciang Video Message zang in Online tungpan taangkokhia tading ci in April 10, 2015 ni in White House ten genkhia uhhi. CNN

·      Kawlgam khuampi 6 kici U Thein Sein, Daw Aung San Suu Kyi, Upper Speaker Swe Mann Lower House Speaker Khin Maung Myint, Mualtung mi Party kheempeuh te Makaaipi Dr Aye Maung leh Gaalkaap Mangpi Min Aung Laing teng April 10, 2015 ni in kimukhawm gemgam uhhi. Ngapik bawldanding kikum dinghiam icihleh kawlgam khantoh nang tawmkhat kikum mawkmawk sam uha, Kawl Tuibuah pawipi manciang 2008 thukhun vaai leh 2016 kiteel vaaiding nasiatak kikumding cih uhhi.BBC

·      Kokang leh Kawl Gaalkaap te anunung peen April 8,2015 ni in Laukai kuamteng ah nasiatak kivik uha, Kawl gaalkaap 10 si in 62 liam ci in kumpi lau thuthang te in gen uhhi. Ahizong in Kokang kipawlna MNDAA Secretary Htun Myat Lin inbel kawl gaalkaap 300 bang si ci in gen hi. Tua ban ah Kawl gaalkaap si peen kasimzo nawnkei uh lampai nading zong omkei mithah zong kacimtak mahmah ta uh ci in genbeh hi. Htun Myat Lin peen Kawlte tawh kidona ah asizah leh kidondan cihte thukante tung ah mangenlua ahihman in kawlten matding  a azon uh ahihi. IRRAWADY

Lungdam mahmah

Thang Khawm Pauzomi