Tulaai LEitung ThUthang Tuamtuam UpDates October 17, 2014

·      South Korea gam Seongnam veng Seoul khuapi khanglam ah Pope lasa siam te  in October 17, 2014 ni lasak pawi nasiatak abawl laaitak un Bulpit pi 33 sang  kicim ek a mi 16 si in 11 naakliam uhhi. Lasa en mipi 700 khawng  hi a lau in kiphu naainaai uh ci hi.

·      Italy gam Milam khuapi a EU makaaiteng Ukraine gam vaai kikupkhopna October 17, 2014 ni in neikhawm uha Russia President Vladimir Putin leh Ukraine President Petro Poroshenko te zong kihel uhhi. Tuciangciang kikupna sung ah bangmah Ukraine gam khantoh nading omnaailo ci in akiim apaam aten genkhia uhhi.

·      Syria leh Turkey gamgi khuapi ahi Kobane khuasung pan IS migilo te atamzaw kinawtkhia zota ci in Kurd gaalkaapBu  Baharin Kandal in October 16 ni genkhia hi. October 17, 2014 ni in US leh apawlten Kobane khuakiim a IS phualpi mun 6 sukzansak ci in Pentagon phualpi ten kipsak uhhi. Leh lam khat ah Syria gam sung a IS te Iraq Leikha Mangpi luo Saddam Hussein hunlaai a gaalvanleeng hawllui khat in gaalvanleeng hawl kisinsak in tu in Aleppo vanleeng tual pan leengkhia zel bawhzel  hi cin mittangtawh amuten gen ci in UK gam  bulphuh Syria gam encik SOHR ten October 17, 2014 ni in genkhia uhhi. Agaal vanleeng namte uhpeen MiG-21,23 te hi in pawlkhat neita uh cin genbeh uhhi. Lauhuai seemsem cihding hi.

·      April kha 14,2014 ni a Nigeria gam migilo Bokoharam te sangnaupang numeino 270 amatte uh tawh kisai asuahtaak theihnading in Nigeria kumpi lam leh Boko Haram migilote Saudi Arabia gam ah October 17, 2014 ni in kikumkhawm uh ci in Nigeria gaalkaap maangpi khat ahi Alex Bade  in taangko khia hi.

·      Kawlgam gaalkaap No.66 leh KIA No.6= 666 nasiatk in Phakant kiim teng ah kinuaiding khuami te kiheem un ci in kawlgaalkaap Mangpi Myint Than in athupiak na peen khuasungmi te lau kisa lungkham sinkham in aomlaaitak uh October 17, 2014 ni in kiheemnawnkei unla lungmuang tak in omhithiat un ci in genkik uh ahihman in mipi te dahlokik ci in RFA ten genkhia uhhi.

Cipak ni ei maw

Khialna aom leh ngaihdam bawm ah maw

Thang Khawm Pauzomi  ( naikhat bekbek hun awng deih siing ee maw kagelh ding tamlaai lua )  

Tulaai LEitung Thuthang Tuamtuam Updates October 15, 2014

·      Malaysia gam Shah Alam veeng a om Annsai khat Palik te in October 14 ni in buluh uha, Syria gam a IS migilo te huhding a kithawi mi  numei leh pasal 13 mankhia uhhi. April kha pan kipan hi IS huhding a kithawi Malaysia mi 36 mankhin ta uha, adang akithawi sawm mi 30 kiim omlaai ci in palik ten genkhia uhhi. Tuaban ah akiman manlo numei pawlkhat zong neihsa tawh IS te zan ann vaakding in akuankhia khin zong om ci hi. HIh bang ahoihlo gamtatna te kuateng in seem cih ka encik gige den uh ci in Palik zalian Khalid Abu Bakar  thukante tung ah October 15, 2014 ni in genkhia hi.   HIh amimat te uh peen Sangnaupang leh company nasemte vive hizaw ci uhhi.

·      Kawlgam pan a taai Rohingya kala te naupang kha 11 apha pankhat Australia gam a suak hinapi Australia thukhen te in Refugee status kipia loding ci in October 15, 2014 ni in nial uhhi. Ferouz Myuddin kici kha 11 aphapan naupang peen AU gamhuam sung nungkum September kha in anu gilsung ah omkawm in ongluut hi a, AU thuneiten man in anu gaailaai Nauru Refugee Camp ah kikoih hi. Anu nau asuahding ciang Nauru mikepna thong inn pan Brisbane khuapi a om zato ah kipuak in tuapan asuak ahihi.   Hi naupang thuak bang lian athuak mi 100 bang omkhin ci in Sitni ten gen uhhi.

·      China gam Yunan Province Fuyou khua ah innlam nasep asem mi pawlkhat leh khua sung mite  nasepna hangtawh October 15, 2014 ni in kikamtam uha, Kongfu siam vive ahihman in nasiatak in kivaat ngekngek  ahihman un mi 8  sipah leu in adang  18 naakliam mahmah ci in Xianghua thukizaakna in gelhkhia hi.

·      Kum 7 sung ah akhatveina Korea gam sak le khang pan Gaalkaap zalianpi zawdeuh teng in October 15, 2014 ni in Panmunjom khua ah thukikupna nasiatak in neikhawm ci in Yonhap thukizaakna te in gelhkhia uhhi. Nungkaal sung mahmah in langnih thautang kikheekna abawlbawl laai hinapi hicibang a ongkiheelkikvat uhpeen lamdang kisa mahmah hi.

·      Nepal ham Mustang district sung aom Thorung La Mualtung ah khetawh akah mi 100 kiim aciahlam un Vuuk hualpi in October 15, 2014 ni in vuknelh a mi 12 sipah in 40 kihongkhia zo a adang pawlkhat mangthang laai hi. Amang laai mite Nepal gaalkaap te in Helicopter tawh azon saan laaitak ahihi.

·      Turkey leh Syria gamgi khuapi ahi Kobane khuapi alaaksawm ahi IS migilo te US leh apawlten vanlamtawh adona khanbehding ci in gam 22 pan gaalkaap mangte tawh akimuhkhopna Washington DC kiang Andrew Air Force Base a October 15, 2014 ni in President Obama in genkhia hi. Mon-Tues ninih sung bekbek in Kobane khuakiim teng ah Vanlam tawh 21 khatvei beltung khiat uha, IS te zum innpi te leh mawtaw zatte suksiatsak uh ci hi.  Tuniciangciang US leh pawlten Iraq gam ah 287 vei Syria gam sung ah 171 vei vanlamtawh IS ziakkhinta uhhi.

Lungdam lua

Zomtoto maidi

Khialna aom khaak aleh ngaihdam bawm ah maw

Thang Khawm Pauzomi

Tulaai Leitung Thuthang Tuamtuam Updates October 14, 2014

·      September 3 nipan amangcip leitung in alunghihmawh pih mahmah ahi North Korea Leikhamaangpipa Kim Jong Un mipi muh theiding in October 14, 2014 ni in ongkilangkhia kik a ciangkhut khunkawm baaipian langlang sa in om ahihman in nung amansung teng adamlo a inn omhiding ci in kilam en hi. Ahizong in tutung a ongkilatna zong Korea KCNA thuthang tungtawn in alim bek hi a banghun a kizaih cih gencian tuanlo hi.

·      India gam Andhra Pradesh leh Orissa state sung Cyclone huih le guahpi kithuah in October 12 ni anawkna hang in misi October 14, 2014 niciang 24 cingto ta a inn 6,500 kisia in mipi 400,000 in omnading neilo in cimawh in om uhhi. Adiak in Visakhapatnam khuapi nasiatak in nawk a hih khuapi sung kisiatna lamkikding hileeng kum 100 bang kaaiding ci in kumpi thunei ten gen uhhi. Meikhuam te kipul in mawtaw te tuuk inn te kicim zihziah hi. 1999 kum in Orissa state sung ah hihbang mah in Cyclone pai ngei a mi 10,000 si uhhi.

·      Australia gam Melbourne khuapi sung Chelsea veeng ah October 14, 2014 ni in Vanleeng neukhat inntung ah kia in Inn leh vanleeng kaang a vanleeng hawlpa si in midang bangmah cisamlo hi.

·      USA gam tawlam teng ah October 13 ni in huihpi nasiatak in nung ahihman in mi 2 si a mi 5 liam uhhi. Adiak in Texas, Alabama leh Arkansas state teng nawkpha deuh hi. October 14, 2014 niciang zong nasiatak in nunglaai ding a mi 36 million bang in agimna zakha ding ci in khuahun siamte in genkhol uhhi. Huih nuntheihna mun a om Zomi te kidawm siamtek ni

·      Tuma ni 10 pan IS migilo ten Kobane khuapi nitumna lam ah gaalpan nading ahoih peenpeen ahi Tall Shair   mualtung October 14, 2014 ni in Kurd gaalkaap te in lakikzota  in  IS migilo te dialkhai vomdeeldal paihkhiatsak ta ci in taangkokhia uhhi. October 14, 2014 ni nitaaklaam ciang US President Obama leh Leitung gam 20 pan gaalkaap maangpi te Washington DC khuapi kiang munmuanhuai khat ah Iraq leh Syria gam a IS te nuai ziading nasiatak in kikumkhawmding uhhi. IS ong kilatzawh hih Gaalkaap  mangpite kimuhkhopna amasapeen leh athupi peen hiding ci in thukante genkhia uhhi.

·      Leitung a alauhuai mahmah Ebola natna tawh misi 4,450 phata a natna angahvek pi mi 9,000 vaal ta in atampeen Algeria gampan hi ci in WHO te in taangkokhia uhhi. October 6 ni a Ebola natna angah UN naseemkhat Germany gam ah abawl saanlaaitak uh October 14, 2014 ni in si hi.

Lungdam Zomtoto ni

Khialh na aom khak aleh ngaihdam bawm ah maw

Thang Khawm Pauzomi

Tulaai Leitung Thuthang Tuamtuam Updates October 13, 2014

·      Tulaaitak Leitung  mun tuamtuam ah Zomi kheempeuh in pawi ineih lakpan athupi peen ahi Khuado pawi kibawl ngeingaai a, Lung bang ongleeng hiaihiai in azaksak khaak ciang in  adip bang kua litlit hi. Kentucky Zomi te in zong nasiatak in kanabawl uha, nuam mahmah hi. Khuado icih peen pawlkhat ten dawi tawh akipawlpah latlat sakha in ataktak in hihetlo a piangthak semsem leeng Khuado semsem ding ahihi.

·      Khuado akibawlna thu tampi te lak ah Biakna tawh kisai tawmkhat enpak leeng, Ipu Ipa ten Anungta Pasian teltak in ahilhding aomnaailoh man a atello beh uh hin Pasian khat omcih peen natel mahmah khin uhhi. Banghang  hiam cileh Topa Jesu asihzawh nithum ciang thokik in, To 3 gawm Pasian 1 kabia uh cih etsakna in Khuado pawi peen ni 3 nabawl uh hiding in ka ummawh a, Hih nithum ni lakpan nikhat ni peen dawihawl khiatna, kau betna leh Pasian tung thupha ngetna kisian suahna in nazang uhhi. Tua ahihman in Khuado pawi icih peen Biakna tawphah Ngeina pawi hi a, Zomi Pasian thei kheempeuh in THupi tak a bawkciatding ahihi, Minam meel neilo Pau kician meel neilo leh biakmeel neilo te ading in bel thupi lolel khading hi.

·      Kawlgam sung ah ongtungding 2015 pan kipan in KFC-Kentucky Fried Chicken) tulaaitak katenna kakhuapihte bawl te nasiatak in amunmun ah sai kihong in kizuakziahziah tading ci in saihongding vaai asai Yoma Strategic Holding Limited te in October 13, 2014 ni in genkhia uha tupan kipan akiging khol ziahziah uh ahihna zong genbeh lai uhhi.

·      Japan gam khanglam ahi Kyushu tuikulh Typhoon huihpi in nasiatak in October 12 zan nawkgawp a  mi 36 kiam in 440,000  in meingahnawlo in 100.000 kumpiten kihemkhia ding in thupia uhhi. October 14 ni khat vei nawkgawp laaiding ci in mipil te in aetkholh nadan un genkhia uhhi. Japan gam ah zinling ahihkei leh Huihpi guahpi apai sial in Nipi ni Sunday hinawm citciat se in thulamdang khat in kangaihsun hi.

·      IS migilo te in Iraq gam Anbar state sung Hit khuapi luahding in nasiatak  dona October 13, 2014 nei uh a, Iraq paltan te tawh langnih nasiatak kikap uh ahihman in mipi 180,000  neekding dawnding neilo in cimawh uh ci in UN ten pulaakkhai uhhi. Tuaban ah IS ten hih Hit khuapi lazo leh Baghdad khuapi zong olno tak laaksa a angaihsut uh ahihman lauhuai mahmah ci in gen uhhi. UN leh apawlten valam tawh Hit khuapi kiimteng bomb khiatkhiat sam napin leilam gaaldo pawl thahaat lo ahihman in tam kilamdang lo ci in Iraq thunei ten gen uhhi.Alangkhat lam ah Syria leh Turkey gamgi khuapi ahi Kobane zong IS te laksawm in ihmu lo nasiatak in do uhhi. Saudi leh US vanleengte in tuma 24 sung in 8 vei bomb khiatna pi uh in mipi lak ahihman in muibun taktak lo hi ci uhhi. Azenen in hih Kobane khuapi IS ten lazomawk hileh Syroa gamleh gampua kizopna teng susia zoding uha, adeihdeihna uh laakbehtheiding ci in zantha paai gaaldo ahi Kurd gaalkaap khat in genkhia hi tuaban ah ihmut hunding kangah vetkei uh cin genbeh hi,

·      Egypt gam ASWAN state Edfu khua sung ah Minibus 3 October 13, 2014 ni in thakhat thu in kitaih ek a mi 30 sipah in 24 liamma tawh zato lam nawhtak in kipuak pah hi.  August khasung in himun mah ah mawtaw kitaih mah in mi 33 si in 41 liam uha, Nungkum November kha in 26 si in 28 liam uhhi.

·      Leitung ah akilau mahmah ahi Ebola lungno daalnading in UK gam ah Tuesday October 14 ni pan vanleeng tual luutna leh pusuahna kongpi te ah kisit tading ci in taangkokhia uhhi. Nungdeuh mahmah a Texas pan Ebola natna tawh asi Pasal pa akeem Nurse nu zong Ebola kilawh leuleu a, Nurse te peen kitun sitset siangtho mahmah ban ah kikepzia ding kisin hinapi bang hang in kilawh thei ci in Scientist  buai mahmah uha, atawpna ah zankaal in n akilim don lua mahmah uha neihsa kiciapsakna khawng omkha hiding ci  in kihehneem uhhi. Ebola natna peen khua ulneel, sisan,Sikang, cilui cihtepan bek kilawh thei ci uhhi.

·      Thailand gam Gualnuam khualzinna gunpang khat ahi Koh Tao ah September 15 ni in lawmta kimawl gualnuam a vakhu nupa abang hialhial UK gammi Hannah Witheridge kum 23 leh David Millar kum 24 te luanghawm kimuhna thu telkan khiading in UK  kumpi te in Thailand thuneite October 13, 2014 ni in hanta uhhi. Amasa lam in Palikte in kawlgam mi 2 kiman a tua kawlgam mi nihten ko hi ung ci ci uh hi. anunung lam ah kawlgam mi 2 ten hikei ung cileuleu uh cikik uha athu ala beisak nuam hileh kilawm uhhi. Mitampi te upmawhna ah athat taktak pee gunpang khawlmun thunei te leh palik te kipawlna hizawding in lam en uhhi.

·      Leitung ah atual niam mahmah gamte lak ah kawlgam tawh unaukhat mah ahi Somalia gam ah amasapeen gam azingzing akhenna Country Code leh Laaihawmna Post Office kineitaktak ta ci in October 13, 2014 ni in kumpi thunei te in taangkokhia demdam ta uhhi.Nung kaal sung mah in Siktum sungpan sum ngetna ATC Machine Somalia gamte khuapi Mogadishu ah thuah giapta uhhi.

·      India gam Andhra Pradesh  state leh Orissa state tegel October 12 ni NIpi ni in Cyclone huipi leh guahpi kithuah in nasiatak in nawkgawp ahihman in mi 8 si a   mipi 400,000 bang om nading neilo in gaaltaai uhhi. Huih haatdan peen naikhat km250 tawh nung cizen  hi. Amau vom in avun uh sah ahihman aphadawm hin eipawlpawl hileeng thuakhak mahmah ding dan hi

·      July khasung a Ukraine leh Russia gamgi a kikaap khia Malaysia vanleeng MH17 tawh kisai in Russia President Vladimir Putin ongtung ding November kha a kibawlding G20 khawmpi Brisbane ah maitang kituah in kasuahkik ding hi banghang hiamcih leh  Ukraine gam a Russia deih tapongte tawh kipawl Australia gammi 38 adang akigawm 298 thatlum hi. Na upkei uhleh en unla ongkhaam un Putin kasing nangding ci in Australia Prime Minister Tony Abbott in October 13, 2014 ni in thuthang kaaikhawm mipi te maai ah genkhia giapgiap hi.

Khialna aom leh ngaihdam bawm ah maw

Thang Khawm Pauzomi