Tulaai leitung Thuthang Tuamtuam Updates August 25,2014

·      USA gam sung Zomi Innkuan kipawlna tuamtuam pan makaaipi 10-200 kikaal New York Khuapi sung a om UN zumpi ah Zomi te vaai valeel khia ding in August 25, 2014 nipan aomnaciat pan un, New York khuapi lamzuan in vakuan ziahziah tading uhhi.Hih UN khawmpi ah athupi phadiak in ZIUSA & LZI President Pu Go Sawm Khup leh Pu Gin Kam Lian ( General Secretary ZCD ) tenupa vakihel theiding ahihman in Leitungbup Zomi vaai akihawmhawm hita ahihman lungdam huai pha diak hi.

·      USA gam California state San Francisco Base Area sungteng 6.0 Magnitude haat in August 24 sun in zinliing a mi 80 liamna tawh zato kipuak in Inn 33 sia in mimal 150,000 in meingahlo in cimawh uhhi. Mipi kuamah vaakkhia ngam meello in adip un pukpuk citek ahihman in pawlkhat bang kikhawmlo liang uhhi.

·      India gam Madhya Pradesh district sung a om  Hindu Biakna zuite Biak inkhat ah pawibawl ding mi atulsawmlom a sim aomlaaitak August 25, 2014 nizing in  athukithei khat hang in mipi lauvat in kiphulgawp uha, mi 10 si in tamsimsim liam uhhi.

·      Iran gam Natanz Nuclear bawlna phualpi neh aleeng Israel te Drone ahawlpalo gaalvanleeng khat August 24 ni in Iran ten in kapkhiat sak uhhi. Hih mun peen Tehran khuapi pan 300km kigamlaatna mun aom ahihi. Israel te tumadeuh khawng in Iran te Nuclear bawlna phualpi teng simding cihthu khawng agin saksak uhtawh Iran te zong ihmu ngamnawnlo in khamul zuutzuut in thapaai uhhi.

·      Libya gampan gaal hang a lau a ataai mi 170 apua tembaw khat Libya gamgi ah August 25, 2014 ni in kibung a gamgi cingte in mi 17 honkhia zopan uha, adangeng asi aw tuisung a tum aw cihbang in mangthang zihziah laai uhhi.

·      Hamas migilo te in Israel gamsung Rocket tang 50 tawh August 24 niin kapphei uh ahihman in Israel 27 vei zialphei uha, minautang 11 leh Hamas te sum keempipa khat ziallum ci in Israel lamten taangkokhia uhhi. Israel lambel Rocket neen te khaakna hang in mi nautang 3 liam liangluang uhhi.

Lungdam

Thang Khawm Pauzomi

Tulaai leitung Thuthang Tuamtuam Updates August 24,2014

·      Zomi te mabanding bangcihding cihtawh kisai in Zomi Forum Yangon khuapi ah August 23, 2014 ni in nasiatak in kibawl a, alamdang tak in kawlgambup media te bekthamlo, kumpi te Media ahi MRTV tengiat nasiatak in delh in thuthak la uhhi. Mipawlkhat te bang in Media te hahsap keei cihbang hilo in khoh zawhloh liang in Media te thudong nuam kiphutlum dektak uha, Imakaipi tea hi Pu Chin Sian Thang, Rev Dr Simon Pau Khan En te bang husam dektak uhhi. Media kheempeuh ah Zomi minampi ahihna kipulaak zihziah in kawlgambup linglawng sak hi.

·      Kawlgam ah akhangtolo peen leh azawngpeen nihna Rakhiang state ah Federal kumpi phualpan zatding a kipia sum vaal hi ci in Rakhaing state kumpi te in August 23, 2014 ni in kawlgamsum Kyats Aawn 10,300 Federal kumpi tung ah ap kik uhhi. Hih thu hang in Rakhiang state teelcing palaai te phung neunau keei uhhi.

·      Israel gaalkaap te in Gaza khuapi sung a om apartment dawl 12 sung a om mipi te minute 30 sap in kihemding in thupiakhol uha,tuakhit ciang August 23, 2014 ni in kapzan uh ahihman in mi mi 10 si in 22 liam uhhi. Gaza pan Hamas ten Rocket tang 70 tawh Israel August 23, 2014 ni in kapphei uha, Israel ten Vanleeng tawh 60 vei bomb khiatphei uhhi.

·      USA gam Ferguson Khua Missouri state ah mivom tangvaalno khat mikaang palik khat akaplupna tawh kizawitawn in Palikte in thau atawiciang azatdanding tawh kisai etphat ding in President Obama in August 23, 2014 ni in thupia in taangkokhia hi. Hih mivomno pa kikaap lupna mah lungkimlo in mipi 1,000 vaal in New York khuapi ah August 23, 2014 ni in lungphona nasiatak in nei uhhi.

·      Central African Republic gam Bambari khuakiang aom Suai tawhna dum khat August 23, 2014 ni in kicim a mi atawmpeen 25 si in tampi tak dum in vuknelh hi ci in CAR kumpi thunei te in taangkokhia uhhi.

·      Amangcip Malaysia Vanleeng MH370 zongkiding in China gamte neihsa Zhu Kezhen tembawpi leh Dutch gamte neihsa Fugro Equator tembawpi te September khabei ah tuisung luutding in gamlim suaih kipan ziahziah uha 60,000 sq km huamsung zongding ci in thuneite in August 23, 2014 ni in taangkokhia uhhi. Australia kumpi thunei te upmawhna ah kumkhat bangsawt khathei ding in gen uhhi.

·      Iceland gam a om Bardarbunga meimual puakkham ding a lauhuai mahmah ding ahihman in kidawm un ci in Iceland kumpi te in August 23, 2014 ni in taangkokhia uhhi. Hih munteng ah tun kaalsung in zin ling letlet ta hi ci in behlap uhhi.hihmun ah 2010 kum in meimual khatvei puakkhama, $1.5billion suplawh khin uhhi.

·      Germany gamte Prime Minister nu ahi Ms Angela Merkel Ukraine gam leh Russia gam kikaal buaina thu kikumkhawm ding in August 23, 2014 ni in Ukraine gam Kyiv khuapi tung a, Ukraine President Petro Poroshenko tawh kimukhawm uhhi.

·      India gam leh Pakistan gamgi Kashmir kuam ah India leh Pakistan gaalkaap te August 23, 2014 ni in nasiatak in kikaap uha, India gaalkaap 2 leh Pakistan gaalkaap 2 tuak si in Kashmir khuami 4 si in tampitak in liamna baaina thuak uhhi.

·      Iraq gam saklam Bani Wais khuaneu khat a om Sunni Muslim te biak innkhat ah mipi thungen a aom zihziah laaitak in migilo te in August 22 niin bomb puakkham sak uha, kikhawm mipi 60 si uhhi. August 23, 2014 ni mah in Sunni Muslim te omna mun 3 ah bomb puakkham leuleu in mi 30 si  a  100 vaal liam uhhi.

·      Zanni August 22 ni Hainan tuikulh ah China gaalvanleeng khat in US te Navy tembawpi nehlua ci a US te hehna tawh kisai in China te in alauhuailo akigamla mun ah kovaai tawh aleeng hilel ung ci in August 23, 2014 ni in olmawh meello tak in thukkik uhhi.

Lungdam

Thang Khawm Pauzomi

Tulaai leitung Thuthang Tuamtuam Updates August 23,2014

·      Hamas te in Gaza pan Israel gamsung Rockets tang 80 tawh August 22, 2014 ni in kaap uha, Tangkhat kitam in Gaza tawh gamgi a teeng Israel khuatami naupang kum 4 ding khalum hi. Hih thu hang in Israel te in Vanleeng 30 tawh Gaza beelmaai khiatphei uha, Hamas te 4 go leuleu in Inn pawlkhat susia uhhi. Palestine mi pasal 18 Hamas ten Israel tawh kipawl ci in ngah uha, August 22, 2014 ni in kaplum uhhi. Israel naupang no sihna hang in a innkuanpihte tung ah Israel Prime Minister Benjamin Netanyahu in adahnathu puak a hihthu hang in Israel ten Hamas te dona azahtampi in khanto ding in August 22, 2014 ni in genkhia hi.

·      Hainan tuikulh kiang a laamdeedee US te Navy gaalkaap phualpi tawh meters 10 bek kigaamlaatna ah Chin te gaalvaanleeng SU-27 te khat nehtak haileen dengdang a kapkhiat ding lah hilodeuh bang adeihna uh hipeuhmah hiam hibang a ahaileeng uh March kha pan a 4 veina hita in kimeeklum theiding hi ci in Pentagon phualpi August 22, 2014 ni in taangkokhia uhhi.

Tuni thuthak lua na omkei ei

Lungdam

Thang Khawm Pauzomi

Tulaai leitung Thuthang Tuamtuam Updates August 22,2014

·      Nung kawlgam Census sung a 914-Zomi ah agelhkhalo tun Zomi naak utluakik kisa a zawhngeu huuk bang a akineelneel teng leh ihmu theilo a agawnggawng te ahizong in Zomi aut kheempeuh sum pia khat zong beilo in Kawlpi,Tedim,Yangon leh gamtuamtuam te ah kiluut kikthei ta hi. Tapa taaimang apa in nialhetlo, hamsiat hetlo in adonkik bang in khedap hoihpeen ongkibulhsak in Tunu thau peenpeen leh itnatakpi tawh ong ki welcome ding cihthu Zomi makaaite tungpan thuhoih kiza hi. Lawm le gual nangawn mitdim a en ngam nawnlo a paigualgual liangsang napa kiang  ahi Zomi ah ciahkik ta in.

·      Kawlgam zong himahmah nawnlo Democracy Drama siam mahmah cihding hilodia maw ongtungding September khapan kipan E-VISA kici Online pan in VISA kila theitading a online ah siau in kaalkhat sung in angah leh angahloh zasak kikpahpah ding ci in hihlam tawh kisai kawlgam thunei te in August 21 ni in taangkokhia uhhi. Pawlkhat in bel umtaklo uha, Kumpi lamten bel baihkhia mahmah lel khualzin mi ongtam semsem nading ngaihsutna hi ci uhhi. Kawlgam hawhnop tinten tawh pha ei kaci pong

·      July 17,2014 ni a Netherland gam pan Malaysia zuan aleeng Malaysia Air Line MH17 Russia deih Ukraine singnuaimi te kaapkhait tung atuang Malaysia gammi 43 lakpan 28 aluang khentel theita uha, Luang 20 I aguh teng August 22, 2014 ni in Kualalumpur khuapi tungta hi. Malaysia gambup in misite zahtaakna piakna in minute 1 sung daaidide in ki om hi. Misi luang adange peen asawtlo in tungkikding ci in thuneite in gen uhhi.

·      Japan gam Hiroshima khuapi ah nungni nih sung guahtam luatna hang in menkicim a kumpi thuneiten misi leh mimangteng azonzon napan August 22, 2014 niciang misi 39 cingta a 52 mangthang laai ci in thuneite in genkhia uhhi. Misi luangpeen 80 bangphato theiding in kumpi thunei ten ummawh uhhi.

·      Egypt gam Sinai mualtung ah August 22, 2014 ni in Bus Lianpi nih nasiatak in kiphulkha a  mi 27 thakhat in sipah in 40 vaal liam pikpeek uhhi. Hih Bus tung a tuang khualzin mite atamzaw peen Yemen,Russia leh Saudi Arabia gammite ahi uhhi.

·      Israel te in Gaza vanlamtawh beltung akhiatna hang in Hamas Gaalkaap Maangpi thu ahi Mohammed Barhoum , Mohammed Abu Shamala leh Raed al-Attar  August 21 ni in si uhhi. Tuabek hilo in Hamas no 7 zong sibeh laailaai hi. Israel te in Hamas cimangding in geelna nei uha, August 22, 2014 ni in Gaza khuapi kiimkot Tank thaupi te tawh umcih dimdem ta uhhi. Kaalguk sung kidona ah Palestine lam misi 2,138 phata a Israel lam 67 mah hilaai in tuni August 22, 2014 ni in bel pawlkhat thaupi neen in sukha in liam uhhi.

·      IS kici Muslim migilo te in USA thuthang kankhia Mr James Foley ngawngtanna Video akhahna sung uh a Foley ngawngtanpa peen British gammi hi in London khuapi pan Syria gam a gaalhuhding a pai hi ci in kipsakna omnaailo British thuthang khat ah kigelh hi. Hih thu hang in leitung gambup leh adiak in British gambup linglawng uha, August 21 nipan Palikte leh thukante in hih ngawng at pa nasiatak in kancianna bawl uhhi. IS lutuam migilo te in Hih Mr Foley bangdan mi 20 vaal man in keem laai uhhi. James Foley angawng akitan  madeuh in anasepna GlobalPost  tekiang ah IS Luntun dawikungpu te in $132million ngen uha, US ten hihbang mikiman te sumtawh tanloding cih thukhun ahihman kitanlo a ngawngtan atuak ahihi. Asawtnaailo khat in Foley akihel US gammi IS te matteng honkhia ding in US gaalsiamte President Obama phalna tawh kuan uha, aupmawhna mun uhah naomlo ahihman honkhiazolo ci in August 20 ni in Pentagon ten genkhia uhhi.

·      Belgium gam te I Prime Minister ahi Mr Elio di Rupo  I computer laptop Brussels khuapi sung party apai laaitak amawtaw hawlpa laaibusai khat aluut kaal in guta te in guuksak uha, asung ah Royal Family tawh kisai thupi tuamtuam leh gamthu laai manpha tampitak omhi ci in August 22, 2014 ni in statement bawlkhia hi. Dihdih kumpi pipi na mansuah mate

·       Africa gam ah micimawhte ahuhna pan Ebola natna lungno angah kha ahi US gammi Dr Kent Brantly leh Nancy Writebol te kaalnih dektak Siavuan ten abawlkhit ciang damsiang sitset in Emory University Hospital, Atlanta khuapi pan August 21, 2014 ni in  zato tuakta uha, Siavuan ten siang kingkengta uhhi ci in genkhia uhhi.

Lungdam

Thang Khawm Pauzomi