Tulaai Leitung Thuthang Tuamtuam Updates July 24, 2014

·      Ongnusia sa Dr Chin Do Kham I a Upinu leh kawlpi Cmedia Peter Khampu I apianna anu Pi Niang Khaw Ciin in July 25, 2014 ni in nitaak 7:30 kiim pawl in Kawlpi zatopan Pasian kiang ah ongciahsa ta hi. Adah akap te Topan onghehnep sak ta hen!

·      Zomi te Ak tamang kuan in kitutu acihbang in midang nawk ngam peuhmahlo in eiteng ikinawknawk kikaal in Namdangten I Innphualzaang ahi Tedim Khuapi ah suahtak tak a giak a vahzialzial theihnading CNF zumthak khat July 25, 2014 ni in hongkik uhhi. Ei le ei khawng kithatthat a  hangsan ikisak mahmah saang Pasal a haat kisa a hangsan kisa ihihleh ei inntual  ongluah mite gawhding ahihi. 2013 kipat in Leitung Bup athu a huam gaalkaap zong anei Zomi kipawlna khat makaaite tawh kiho in CNF peuh mah in Tedim ah zum onghonsawm leh zial leeng kacihleh ko kipawlna mintawh hileh lianlua hoih kenteh ongci nong. Zomi ten Verbal & Propaganda Politics bek ithei a lawmten politics taktak anaseem higige hi.

·      Khualzimi 116 atuang Algeria gamte vanleeng Flight AH5017 khat Burkina Faso khuapi pan Algiers khuapi atuding July 24, 2014 ni in atun abanna kitheinawlo radar in manthei nawnlo a, Mali gam sung khuahun siatna hang in kia hi. Hih vanleeng tung ah French mi 50,Burkina Faso pan 24, Lebanese 8, Algerian 4,Luxembourg 2,Belgian 1,Swiss 1,Nigerian 1,Cameronian 1,Ukraine 1 leh Romanian te khat tuang uhhi.Vanleng kiatna namun ah French gaalkaap 100 mataw 30 tawh vapai uha, anungta khatzong omnawnlo in Vanleeng Blackbox pen ngah uh ci hi.

·      Gaza khuap sung a UN saang khat Israel Vanlamte in July 24, 2014 ni in zial kha uha, mi 15 si in 200 liam uhhi. UN Secretary Mr Ban Ki Moon leh US Secretary of State John Kerry te Israel gamsung ah aomlaatak uh hia, langnih kilemnading zong lam et om ci in John Kerry in July 23 ni in genkhia hi.Ahizong in bingkhol theipak omkenteh ci in Mr Ban Ki Moon in genkhia hi. Ni 17 acingta gaalkidona sung ah Palestine 800 si in 4,600 liamta uha, Israel te 36 sita uhhi.

·      Zanni July 24 ni a Gaza khuapi sung aom UN sangkhat Israel te azialna lungkimlo in West Bank ateeng Palestinian te nasia tak lungphona neiluailuai vial uha, July 25, 2014 ni in Israel khuasung cingpawl in tawmkhat avik ek uhleh mi 4 sileuleu zelmai uhhi.

·      Iraq gam Bagdad khuapi pan km 24 na lampi tung ah thongkiate apua Bus pi khat migilo thautawi te in July 24, 2014 ni in bomb nasiah uha, thongkia mi 51 leh palik 9 si uhhi ci in thong thuneite leh cidamna lam thunei ten genkhia uhhi.

·      Ukraine gam Russia deih tapong kapkhiat hiding a lam et Malaysia Vanleeng tuang misi luang 40 te July 23 ni in Netherland gam tungkhina, acian laai anihveina pawlkhat July 24, 2014 ni in tung kik leuleu hi. Tapong te luang 282 kapia uhcin gen uha Netherland ten 200 hi ci ahihmna misi kitawmzah kicianlo suakphot hi. Australia gamte in UN thukimna ombang in Vanleeng kiatna mun kancianding in palik zalian 50 July 24, 2014 ni in London paisakta uhhi. Hih thubuai bilbial kawmkaal ah Ukraine Prime minister Arseniy Yatsenyuk in apanmun khawlsan a, President Poroshenko in sang himah leh ni 60 sung athak kiteelma seemding taangkokhia uhhi.

·      Kawlgam kiteel kikciang PR zangding cihtawh kisai nungkha sung in Lower House ah thukimna sa July 24, 2014 nii n Upper House ah kikum kik ding Tura U Swe Mann in genkik a Daw Aung San Suu Kyi leh Mualtungmi pawlkhat in thalnial himah leh atamzaw in deih ahihman in kikup ding in thukim uhhi. Hih PR kikimtak a meetang hawmna peen kawlte theih zong hikhollo in NDF party ten kuamah zawhngaplo adiak in NLD lelh ngaplua uh ahihman ongphuang khiat uh ahihi.

·      Tuma asawtlo khat in Thailand gam meileeng tung ah numei kum 13 kiimding khat Pasal pawlkhat in naliak in dehgawp uh ahihman August  ni khat ni a kipan numei leh pasalno kum 10 nuaite Meileeng tung kheempeuh ah atuannading atuam a bawlsak in tuamkhending tading ci in Thai kumpi thunei te in July 24, 2014 ni in taangkokhia uhhi.

·      Tukum February kha pan nasepkhawlsakna angah ahi Medicins Sans Frontieres ( MSF ) te suaktak tak in Rakhaing gamsung ah  naseptheina ding Rkhaing gam uk kumpi thuneite tungpan ngah kikta  hi ci in July 25, 2014 ni in taangkokhia uhhi. Muslim te leh Rakhaing te deidan cihtawh akihawlmang ngei uh ahihi.

·      July 17 nipan kawlgam sung gawtmun teng atoknawi zihziah khin ahi UN –Kawlgam Human Rights Palaai thak Ms Yanghee Lee July 25, 2014 ni in alungtup pipeen ahi Daw Aung San Suu Kyi tawh Nipydaw khuapi ah atuam in kimukhawm thei uhhi. Ms Yanghee Lee tuni kawlgam uk uital mangpawlkhat tawh zong kimuhkhop sawm a, Zing ciang aciahma in Vanleeng tualpan thukante tawh holimna nei ding uhhi.

·      Lam etkholh lohpi in US Foreign Department te  Computer thunei peen khat in July 25, 2014 ni in nasemlo pak ekmawk a nuakmawk ahihman in US ulian te buai mahmah bekthamlo in adiak in US Passport, Visa leh kumpi laaituamtuam angente ziakaai mahmah khading hi ci in Foreign Dept te in taangkokhia uhhi.

Lungdam ei

Thang Khawm Pauzomi

Tulaai Leitung Thuthang Tuamtuam Updates July 23, 2014

·      Malaysia Vanleeng kia tung tung a tuang misi akilathei teng July 23 ni in Netherlands gam Eindhoven khuapi vanleeng tual tungta a , misite dahpihna lahna in Dialkhai Flag te alang ah kikhiamsuk in uliante leh mipi te in dahna daihna nasiatak in neiciat uhhi.

·      Taiwan gam te neihsa ahi TransAsia Airway company ATR 72-GE222  nam mi 54 apua Vanleeng khat Kaohsiung  khuapan Penghu tuikulh tung aom Magong vanleeng tual abawhding Typhoone huihpi in nanawk ahihman in atuk nading mun tuhteinawn vetlo in Inn tungzaang  khat kia suk in mi 47 si in 11 zato kipuak hi.

·      UN Human Rights Boss pinu ahi Navi Pillay in Israel te in Gaza asimdan peen mawhna neilo milomthah leltawh kibang ahih man in War Crime mawhna thuakkha theiding uhhi ci in July 23 ni in UN thukin kikupnawina ah genkhi ahi. Israel tenbel hikampau peen Israel huate kampau hilel in thu luut khol kenteh cihsan ziau uhhi. Gaza pan Hamas ten Israel sung asun azan cilo in Rocket tawh kaplai uh ahihman in Israel ten zong vanlam leilam tawh zialngekngek uhhi. EU leh US te in Israel gamsung zinding avanleeng te in July 23 ni pan adang 24 sung khawlsak laaiding in thupia uhhi.

·      UN ten War Crime ongpau lian akipan US te omtheinawnlo in Secreatary of state Mr John Kerry July 23 ni in Israel gam vatungseisai ta hi. Tulian in Palestien lam 664 sita in Israel 35 sita uhhi. Palestine asi atamzaw ahi 70%  mipi himawk ahihman in mulkimhuai zek kisa ciat hi. Israel ten bel kodo Hamas migilo te hi in mipi asite peen Hamas te hang a si hin kotawh kisai kei cihsan uhhi.

·      Ukraine gaalvenleeng SU-25 namte nih July 23 ni in Russia deih thautawi te in kapkhiat sak leuleu uhhi. Vanleeng te peen leipan Pi 17,000 asanna a leeng hi a Russia gamsungpan thaupi hoihtetawh kikaapkhia hi ciin Ukraine thunei te in genkhia uhhi.

Lungdam

Thang Khawm Pauzomi

Tulaai Leitung Thuthang Tuamtuam Updates July 22, 2014

 Zomi Zomi Zomi

·      Zomi te ingak lah mahmah leh ithu ngetna ahi UNO I ameeng Economics and Social kipawlna ah Zomi Innkuan USA in Consultative ( Zopau in Siampu dinmun ) July 14 ni in kingah taktak ta hi hi. Tu in Zomi te Leitung minam tuamtuamte leh kipawlna lian tampi te lak ah pawlmi member nengneng hilo in Siampu dinmun ki omta ahihi. Topa aw Zomi te minam lian in ongbawl ci a ithu ngetna te Pasian in ongdawng ta a , Minam lian isuakta hi. Kawlgam Thein Sein kumpi nengneng leh mipawlkhat te Zomi omlo ci a mawh otot laai uhleh ahailam uh akipholaak hizaw ta ding hi. Amasa in eite thahaatna hang hilo ibiak Pasian in Zomi te honglamsang ahihman in I omna ciatpan Pasian minphat ciat ni. Hih bang gualzawhna ongpian theih nading a Vaaihawm ZIUSA President Pu Go Sawm Khup,Secretary Pu Dr Do Khan Khup, Dr Kham Khan Suan te leh makaai kheempeuh pahtawina ipia  a Pasian in thupha ongpiaksak a Zomi te kumsawtpi ong makaih zawh nading un thu ingetsak hi. Pasian in ongbawl in Zomi a ongbawl ahihman in Zomi Vantung ah kiciamteh khin a tu in Leitung gambup kipawlna UNO ah Zomi kikhum leuleu ahihman in hisang ilungdamna alian zaw omnaailo hi.

·      Atung a thutawh kizawitawn mah in ongtungding August 27-29 nisung New York khuapi sung a om UN zumpi sung ah Zomi te thu avasung ziahziah ding leh gualzawhna pawipi avakhaam ding in Zomi makaai 10-200 kikaal vapai ziahziah ding uhhi. Pasian in Zomi te onglap saang petpet the Zomi ten UN zumpi ah zingzun vatha ziahziah tading hi. ZIUSA makaai te thusiamna tawh sapna kangah a angtang kakisa mahmah hi. Pasian lemsakna aomleh kava kihel nuam mahmah hi. Pasian minthang tawntung ta hen.Amen

Zuu Zuu Zuu

·      Tonzang khuapi ah Zuu nekhawm lawm 5 lak ah 4 te in alawmpa uh khat July 19 ni in thatlum uha, mithat mi 4 teng kiman in Falam thong ah kipuak hi. Ahang peen Zuu hilel ngeel hi. Kum 15 gualding khatpa bang anu in zuu thawlkhat luup cih limlim peen Nu le Pan Zuu dawn amuhding alau a abubu te nangawn khuasuaklo cileeng Nu in zuuluup cihpeen Zomi ten ngaihsut huai mahmah kasa hi.

·      Tukum April kha sung South Korea gam a mi 300 sisak a akibung Tembaw pi company neipai Billionaire mihaupi Yoo Byung-eun kum 74 Italy bawl khedap leh niikleh puan tamman mahmahtawh akiim apaam ah Zuthawl dimzihziah sa in Seoul  khuapi pan km300 na singlangkhat ah June kha sung in asisa in kimu a ameel kitello ahihman DNA asit uhleh July 22, 2014 ni in amah ahihna kumpi ten kipsak uhhi.

·      Chin state mitawm mahmah napi in bangsep sawm uhhiam Chin Democracy party cihkhat ongpiang leuleu a, July 15 ni in Kawlgamsung a om phalna angah party khat in kawlgam kiteelna thusaipawl in phalna piata uhhi.Chin ten party 3 neita cileeng Zomi ten ee khatbek mah maw adang neihsawm, ahihkeh mi ek siaksiak sawmmaw I degree tawh servant seem a nitum sawm maw, I de gree zuaksawm ngaihsut huai Zomi Zomi Zomi …..Internet politics kisam nawnlo ataktak kisam ta ….

·      Khalkha gam Paletwa khaukiim ten gah ALP Rakhiang thautawi pawl in inn khat 10,000 ta tu laaitak khon ziahziah uh ahihman in Khalkha lamte buai thei mahmah uhhi. Kenbel navawh bang un na atding uhhi ci in la kanasak san lel hiven ALP tawh kiho theihnading athei na om uhleh ongzasak un innkhat 100,000,000 ta nadong un cihbeh nuam ing.

·      Canada gam pan ongkuankhia ahi FOF ( Forum OF Federation ) kici Federal ki ukzia hilhcian pawl in kawlgam sung mun 25 ah thugenna aneih khit uhciang July 21-23 nidong Zomi tampi te tenna Kawlpi ah thugenna neiding acih uh Kawlpi khuasung thuneite in phalnawnlo ahihman in nikhat abawlkhit uhciang July 22 ni in dinkhawl uhhi. HIh nikhat abawlnisunsun un Chin minam makaai te leh khangno tampi pai uhhi ci uhhi. Zomi te bel pailo maw minthei khalo cihkhat hituak …

·      UN Human right pan kawlgam palaaiding a kiteelthak Ms Yanghee Lee ( Korea minam ) tuni July 22, 2014 ni in Bamaw thong inn sung hawha, July 21 ni in  Mitkyina khuapi pai in July 24 niciang Mandalay khuapi paiding hi. Ms Lee peen Asia mi ahihman in ama maai a sem Mr Quintana sang kawlgam thupiang amaan kanzo zawding in kilam en hi. Kawlgam amuhdan aciahni July 26 niciang Yangon vanleeng tual ah thukante tung ah gending ci uhhi.

·      Kachin gam Laiza khuapi gei aom Kachin gaaltaai  mi 8,000 vaal omna mun ah July 22, 2014 ni guahtamlua in men kicim ahihmna in naupang 3 leh ulian 2 akigawm 5 si uh ahihmna in thuneite in Camp tuah in guahzu daaikaai nuai ah buai mahmah uhhi. Thungetna ah phawktek ni inaute hi

·      Leitung ah Muslim biakna zui atamteen peen na leh Democracy alianpeen thumna gam ahi Indonesia gam ah June kha ni 9 ni a President kiteel azo alel pulaakkhiatna July 22, 2014 ni in neita uha, Jakarta Major luui Mr Joko Widodo in 54% tawh gualzawhna ngah hi. Akidempih ahi Gaalkaap maangpi lui Mr Subianto  in  azo alel kitaangko madeuh in golhguuk paulap in lungkimlo in dinkhawl san hi. Indonesia Constitution tawh kituak in  Mr Subianto in thukhenzum tunthei hi. Ahizong in mipil te genna ah Mr Subianto pen bangbang in asemzong alel limlim ci in gen uhhi. Democracy leitung alianpeen 3 na ban ah Muslim atampeen gam ahihnatawh kizui in buaina apiangkhaak ding kumpi te patau mahmah uha, gaalkaap le palik athuangthuang in khuapi sung koih zihziah uhhi.

·      July kha 17 ni a kikapkhia Malaysia vanleeng tung a tuang misiluang 200 te Russia deih tapong te kepcipna pan July 22 ni in Ukraine kumpi te ukna sung ahi Kharkiv khuapi tungta hi. Kuami kuasa cih asitding in gammi tam asumpeen Nederland gam ah puakding ci uhhi. Vanleeng taangthu keemcing Black Box peen Malaysia kumpi tung ah July 22 ni in piakhia ta uhhi. Hih vanleeng kiatna mun ah suaktatak in kuamah thukantheihna Russia deih tapong ten pianuamlo ahihman in Australia PM Julie Bishop thusun nahaang in UN Security council in suaktatak a kantheihna ding ngetna July 21 ni in bawl uhhi. US thunei te Vanleeng peen Russia deih tapong ten kapkhial hileh kilawm a Russia pan direct apaibel hihtuak kei ci uhhi. Russia deih tapong ten ko hikei ung ci in July 22 ni in nial uha, Ukraine gaalkaap kapkhialh hizawding hi hihvanleeng kiatlaaitak in Ukraine gaal vanleeng khat akiim ah leeng ci zawsop uhhi. Russia President Putin inbel hihvenleeng hang in kuaman Politics ameet laaksawm sekei un cihsan ziau hi. Misi luangte tulaaitak vanleengtung ah omta a, July 23 niciang Eindhoven khuapi Netherland gam tungta ding a gambup daaitak in hini sung omding uhhi.

·      US gamsung aom Company nasepna te ah Gay (mipalaang) te kideidan hetlo in midangte mahbang in company ten abawlnading in President Obama in July 21 ni in thupiakna nei a suaikaihna zong bawlpah hi. Amah hoh Gay hiphial hiam cihnop huai hizah a alungluut bilbel maw

·      Israel Palestine kilemnading lunggulh natawh UN General Secretary Mr Ban Ki Moon leh US Secretary of State John Kerry te Egypt gam Cairo khuapi July 21 ni in tungta uha, July 22 ni in Palestinian PM Rami Hamdallah tawh kimu khawm in July 23 niciang Israel PM Benjamin Netanyahu tawh kimu khawmding uhhi. Lawmgel ahihleh kilemding sang kikaap na nasia tektek a, July 22, 2014 nizan Israel ten vanlam tawh azialna hang un Gaza tawlam ah Palestine 15 si in Leilam ah Israel paltan 1 si hi. Ni 15 gaal kido na dung ah Tuni ciang Palestine lam misi   652, aliam 4,000 phata a Israel 30 sita uhhi. Hamas migilo te in Israel gamsung nasia tak in July 22, 2014 ni in Rocket tawh kaap uh Tel Aviv khuapi lam neh mahmah ahihman US gampan Tel Aviv khuapi Israel gam tuding vanleeng kheempeuh July 22, 2014 ni pan nai 24 sung kikhawlsak kik hi.

·      Palestine minam te agum Piantit gam Paris khuapi sung aom khangno pawlkhat in July 21 ni in Israel minamte biak in leh vanzuakna teng simgawp uh ahihman Israel minamten nalehdo in nasiatak buaina piankhit ciang Palikten Vanleengtung pan huihthautawh kaap in khenkhamzo uhhi.

·      Philippine gam ah mihing 94 that in China gam ah 38 agawh khitciang Typhoon huihpi in Vietnam gam July 22 ni in nasiatak in nawksuk leuleu a, mi 11 si in tampi mangthang ci in Vietnam thuthang te in taangkokhia uhhi. Kawlgam lam ah ongleet in NYpidaw teng zialleh cihkhawng ngaihsun dandan kha hang ee

·       China ten zong US te nawlkhin ahi South American gamteng ongbannawk a, July 22 ni in China President Xi Yinping Cuba gam ongtung ngawngaw ta hi. July 20 ni in Argentina tawh $11b tawh kizopding thukimna nei uha, July 22, 2014 ni in Venezuela tawh $4b tawh kizopding thukimna nei leuleu uhhi. Brazil, India,Russia ,South Africa tawhlah nasepkhopding $45m thukimkhin laai tun Cuba tawh hileh USA saang leitung ah ahaatzaw gam ongsuakmaiding hi leh kilawmta hi. Vun kaangte Vunsan ten ukding acih hipianpian ta ei…, Zomi hanciam

·      Leitungbup AIDS natna encik pawl in 2014 Khawmpi Australia gam Zomi te khuapi ahi Melbourne  khuapi ah July 20 ni kipanding hipan Malaysia vanleeng kiatung ah makaai pawlkhat simawk ahihman July 23 ni in kipan theipan a US President lui Mr Clinton in thukonghona leh misite zahtaakpiakna nei hi. Kawlgam panzong palaai pawlkhat paining uha, Leitung ah miten AIDS natna koicih leeng beiding acihlaaitak un, Kawlgam palaaite AIDS natna veite zatuiding kuan ongpiading ci in khuakha giaugiau laaimawk uhhi.

Zom toto ni ei

Thang Khawm Pauzomi

Tulaai Leitung Thuthang Tuamtuam Updates July 21, 2014

·      Kawlgam leh Thailand kikaal a gaaltaai te akhua uh puakkik ding Thailand-Myanmar kumpi te kithukimna om mahbang in July 21, 2014 nipan kipan Thai kumpi te in gaaltaai buuk te ah min khum census kipan ta uhhi.

·      Israel leh Palestine kidona ni 13 ongcingto ta in misi zong ongkibehlap toto hi. July 21, 2014 ni bekbek in Palestine te 25 si uha tun in Palestine lam 524 misi omta in Israel lam ahihleh 20 cingta hi. US Secretary of state Mr John Kerry zong langnih lemtuah ding in Cairo khuapi tungkhin ta hi. UN Security council ten ahileh tu mahmah in nalangnih un kilemna bawl un ci in July 21, 2014 ni in taangkokhia uhhi.

·      China gam sung a KFC leh McDonald  neektheh zuakte in sa aleidet na uh ahi Shanghai Husi Food Co te in sa namsia sa zangkik hi cihthu mukhia uh ahihman in sa leinuamnawnlo uha KFC leh McDonald zuak  July 21, 2014 nipan tawlngasak phot uhhi.

·      England Tukpeeng kimawlsiam mahmah leh England te Captain asem ahi Steven Gerrard in leitung Tukpeng kimawlna kakhawlsan phot ding Pension kala mai tading hi ci in July 21, 2014 ni in taangkokhia hi.

·      Ukraine gam a akia Malaysia vanleeng tuang misi 280 te luanghawm July 21, 2014 ni in vanleeng kiatna gei Torez meileeng khawlna mun pan koimun puakding cih kithei lo asa neding maw cihzong kitheilo zahkhop in Russia te sawltaak thautawi ten meileengpi  tawh paikhiat pih photphot uhhi.

·      China President Xi Jinping zong bangthu bangla om cih genkholna omkhollo pi in Venezuela gam July 21, 2014 ni in tunglian hi. Kumpi thunei te in nasiatak in nadawn uha, China te peen US tawh kilem meello tata gamte ah hawh hileh kilawm ci in mipi in gensipsup ta hi.

Lungdam

Thang Khawm Pauzomi