Tulaai Leitung Thuthang Tuamtuam Updates Feb11, 2015

·      Europe gam ah gambeel ngending a pai Tembaw nih Mediterranean tuipi tung ah February 10 ni in kibung a mi 9 kihonkhia zo in mi 300 tuihualpi in valhtum hi ci in Italy gam UNHCR tanupi Carlotta Sami in February 11,2015 ni in genkhia hi. Hih akihon khia zo mi 9 te peen Piantit pau pauthei in vombengbang geuh uh ahihman Africa gam nitumna lam mite hiding in ummawh uhhi. BBC

·      Yemen gam sung amau le amau buaina hang in  khamuanna kiam hiaihai ahihman US,UK leh Piantit te in apailaai zumpi te uh khakcip phot in agammi kheempeuh uh samkikphot ding in February 11 ni in taangko uhhhi.UK leh US ten February 11 ni mah in khak kipanpah uha, Piantit ten February 13 nipan khakphot ding ci uhhi. BBC

·      South Korea gam Inchoen International Vanleeng tualpi gei a om tuitung apai Leipi tung ah February 11 ni in  Bus khat in mawtaw khat aphut khaak nahang in mawtaw a theihsa 100 vaalding khat leh khat kiphu kha zihziah uh ahihman in mi 2 si in 42 liam a aliamte lakpan mi 8 gim mahmah uhhi.BBC

·      US President Obama in US ten kha 7 sung bang IS migilo te Vanlam tawh Beltung ikhiat khiat hang in Pu ten Beltung ongkhiat cilel uh a, kizo siangthei mahmah lo ahihman ci in Leilam Gaalkaap tha mahmah zang in viksiang theihnading Congress tetung ah February 11, 2015 ni in phalna ngetna laai puakto ta hi.BBC

·      Nungdeuh mahmah in Taiwan Taipei khuapi ah akia TransAsia vanleeng company te vanleeng hawlkheem peuh amuan huai taktak mah hiam ci in February 11, 2015 ni in kumpi lampan laaivuansak kik uha, mi 29 kia mawk ahihman in anasepna pan uh kikhawlsak hi. Tua ban ah nung a akia vanleeng tung asi 42 te TransAsia company ten mikhat $470,000 ta tawh a innkuanpih tetung ciat vuah thuumna bawl uhhi.BBC

·      Sen gamte President Pu Xi Jing Ping leh US pResident Pu Obama February 11 ni in Melmuhloh tongsan tawh kiho khuankhuan uha, maitang kingat hilo ahihman in aw khum tuaktuak mahmah agennop thupi peen bang uh mangngilh liang nuamsa uha, tualaai tak President Pu Xi Jinping in September khaciang thupi tak in US gam konghawh ding a tuaciang Iran Nuclear vaai, Computer gaal kidona vaai leh Leiba vaai kikum ni kici in OK lah cihtawh phone khia uhhi.VOA

·      Ukraine gam ah daihna aomtheih nading in Ukraine,Germany,Russia leh French gam makaaite Belarus gam Minsk khuapi thukikum ding in February 11, 2015 ni tungkim dimdem ta uhhi. Kilem ding thukikupna kipan zong kipan naailo in Russia te sawltaak tapong te leh Ukraine gaalkaap te nasiatak nakikaap uha, mi nautang 2, gaalkaap 19 si in 78 naakliam mahmah uhhi. Kawlgam tawh kisut naciang khat nei sa ing. VOA

·      February 12,2015 ni a Nypidaw khuapi a kibawlding Kawlgam Union Day ah kahding kawmding leh bang hamphatna kangading om cih engualgual ding in Mualtungmi thautawi khenkhat Nypidaw Feb 11 ni in tungkhinta uhhi. HIh Mualtungmi thautawi telak ah diak in CNF zong tungkhin a Dr Suai Khal bang zusai zongpah bualbual hileh kilawm hi. Kawl ten naupang bang ah akheem pakpak zawhloh uh, Kachi,Kaya leh  Palong ten bel Kawlgam Union naaikhang kikaap kaap lai hang in ko ongpai zokei nung cihsan ziau uhhi.RFA

·      Kokang-Sen te leh kawl gaalkaap te Feb 9-10-11 sung in 12 vel sinsin kikaap uha, Kawlgaalkaap ten Helicopter, Machine Gun leh gaalvanleeng te zangliang in dolah keei uhhi. Palong te leh Rakhaing te honkhat zong hi Kokang-Sen te kiang ah om uh ahihman in gaaldona sung ah kihel loh theihloh in kihel uhhi.  Sen kumpi ten bel khat lah ka tem khat lah abul himawk uhcin athu hoih pending kikum unla kimai sak le vua cihsan uhhi.RFA

·      Kawlgam sung a zatdinga kumpi te bawltawm Pilna tawh kisai thu milet pi deihlohna tawh hansanna alak sangnaupang te leh Kumpilam, Kumpi sawltak palaaite le Pilna lamtaw kisai thuneite hih Lutang 4 teng kimuhkhopna February 11, 2015  ni in Yangon khuapi ah kimu khawm uha, Sangnaupang ten get bangbang kumpi lampan aw-aw, he-he cimawk uh ahihman in thukimna hoih ngahphot tadih uhhi.VOA

Lungdam

Thang Khawm Pauzomi

Tulaai Leitung Thuthang Tuamtuam Updates Feb 7, 2015

·      Jodan gamte in IS mi songbong te Vanlam tawh bomb khiat in aomomna uh aleizon uh ani 3 na February 7,2015 ni in nuamtak in mahial thei uha, United Arab Emirates –UAE ten kalai sai noguak in bukkhuk buanglo e kizong ci in F-16 Gaalvanleeng tetawh Vanlaai ah phialphiah bang in lampah dede uhhi. UAE leh Jordan te peen US te makaihna IS dona ah taangtha kuan gamte ahihman  US le apawlten zong kozong cipah in zialhuan ciatciat uha, kitha nopsuah uh ahihman khawlthei lo dektak uhhi. Asi aliam leh vansia hizah hi cihpeen taangkokhiatna nei lo bilbel uhhi.BBC

·      North Korea gamte in Tuipi tung a taai Tembaw pi te tungpan deihdeih na munkaap theihna thautang lian sin leuleu uha, US leh South Korea te kipawl a gaaldokhop sinna adeihlohna uh alahna kawm uhhi ci in February 7,2015 ni in  South Korea thuthang te in taangkokhia uhhi.BBC

·      Iraq gam thunei kumpi te in kumkhat sungbang Baghdad khuapi zanlam kuamah vaak theiloding cih thukaam abeisakzawh anikhat ni February 7,2015 ni in Baghdad khuapi sung munnih ah Bomb puakkham pah a, mi 59 si in adangtampi tak in liamna ngah uhhi.VOA

·      Kachin gam Mitkyina Township Palanah khuata sung aom RC pawlpi te makaihna tawh gaaltaai te kepna Camp February 7,2015 ni in meikaang a, inn teng kaangtum mang ahihman in Innkuan 30 mimal 183 inn le lo, um le beel neilo in cimawh lungleeng khuangaai in omlaaitak uhhi.RFA

Lungdam mahmah

Thang Khawm Pauzomi

Tulaai Leitung Thuthang Tuamtuam Updates Feb 6, 2015

·      IS migilo pawl in Jordan gaalvanleeng hawl Moaz al-Kasasbeh ahallup na hang in Jordan gaalvanleeng ten Syria gam leh Iraq gamsung a IS phualpi leh gaalvan tuamtuam abawlna uh munte February 5 ni in banzial kipan uha, IS phualpi tampi asuksiat ban ah IS migilo atawmpeen 20 golum ci in Jordan Foreign Minister Nasser Judeh in genkhia hi. Tua ban ah tu a vanlamtawh azialna uhpeen abeina hinailo in akipatna hipan a IS te omna munmun banzial laiding ci in genthuah hi. Jordan gaalvanleeng ten nai 12 sung Syria gam a IS te azialkhit uhciang Feb 6,2015 ni in akihallum al-Kasasbeh tenna khuatung ah lungleen huaitak in leng ngelhngelh uhhi. Tutung a IS te vanlamtawh avazial na uhah Jordan King-Kumpipa zong hehlua mahmah ahihman in alutuunna dial hawkkhia in gaalkaap commando puan asilh khit ciang thau man in amahngiat in doding in kithawi pah a, mipi in phalsamlo  in naleen ngeeingaai uh ahihman in paikhalo kiau hi. Hih Jordan ten IS te akapsung in IS migilo temat ahi US gammi numeikhat si ci in IS te February 6,2015 ni in taangkokhia leuleu uhhi. US ten bel umtaktak lo ahihna thu leh Iraq gamkhun lam munhoih lading in US galvanleeng pawlkhat Kuwait pan akhindeetdeetna thu taangkokhia uhhi. BBC

·      February 3,2015 ni a Taiwan gam a vanleeng kia tawh kisai in Vanleeng omzia akeem black box sittelna Taiwan thunei ten bawl uha, Vanleeng peen aleeng kimlaai thakhat in asset mitvat in start kiktheinawlo ahihman kia ci in February 6 ni in amukhiatna uh mipi theiding in taangkokhia uhhi.Hih Vanleng sung ah mi 58 tuang a 35 si in 15 ahing in kihonkhia man bek in 8 tuisung ah mangthang laai hi.BBC

·      Sengam tawlam Guangdong province sung Huidong county sung ah om Vantuamtuam kizuakna innpi khat February 5 nikaailam in meikaang a , mi 17 kaanglum in pawlkhat muinam ciciai sa in zatolam ung uhhi. Innpi liankhat kaang himawk ahihman in miphel zumnaseem mi 200 in nai 6 sung buaipih ngeekngeek uhhi.BBC

·      Syria gam Dmuscus kuapi kiim naai ten gah Syria kumpi te leh Kumpi langpang thautawi te February 6  ni in nasiatak in kikaapna  uh ahihman Naupang 12 tautawi  11 leh naupang 47 avekpi a kigawm mi 70 in sihlawh hi ci in Syria khuahu encik SOHR ten genkhia uhhi.VOA

·      Nigeria gam sung a migilo ahi Boko Haram te in Niger gam Bosso khuapi February 6 ni in sim uha, Chad leh Niger gaalkaap ten nasiatak na nang uh ahihman in mi 5 bek liam in asi ommanlo hi. Feb 4,2015 ni in hih Boko Haram migilo te mah in Cameron Fotocol khuapi sim uha, mi 110 si in 500 vaal liam uhhi.BBC

·      Kawlgam kumpi te bawl pilna thukhun lungkilo sangnaupangte leh kumpi thunei te kimukhawm himah leh thukimna ngahzolo nailo uh ahihman in kawlgambuppi amuhamuh ah Sangnaupange February 6,2015 ni in kitom ziahziah uhhi. University atamzaw kiso ziahziah himah leh Zomi-Chin te atampeenna Kalay University-Meidawi University pan aw khatzong kiza nailo hi. Mung-Khua pan Siamsin te leh Pakhup-kuk khua  Siamsin te Feb 6,2015 ni in ongkihawm petpet ta uha, nasiaktak Pakhupkhuk khua ah kitom khawm uhhi. Kawlgam Kiu tek pan Yangon khuapi lam zuantekding uha, akisap leh Nypidaw dong athu in tengpaih toding geelna nei uhhi. Ongkituah khin taktak le uh 8888 sang muhnopzaw maithei ding a, 555@5-5-15 nipeen mitsuan pianpian ta uhhi.Tuaban ongkimawk leh 666@6-6-16 ciang kawlgam avom akaang ongkitel maitheiding ci in pawlkhat in ummawh uhhi. RFA

·      Uruguay gam aom Israel gam te Palaai zumpi mai ah Bomb koihding geelna nei hi cih muanmawhna tawh Uruguay gamten Iran gammi thunei mawhlo khat February 6 ni in Uruguay gampan hawlkhia in ongnung leh hei peuhmah nawnken ci uhhi.Haaretz.com

·      IS migilo te in mi mawkthah bek hilo in adiak in Iraq gamsung ah Nuapangno kumcinglo kum 8 kiimpawl man in sila ding in zuak, azuak uhciang vokno zuakdan in atung ah aman at sese uha, gaalkaap dan sinsak in gaalkap khawng in zang ban ah bomb tawh apuakkham khawmding in sawl kawikawi uhhi ci in UN ah Nuapang lamtawh kisai zalian khat ahi Renate Winter in February 6,2015 ni in taangkohkia hi.CNN

Lungdam mahmah!

Khialhna aomkhaak aleh Ngaihdambawm ah maw

Thang Khawm Pauzomi

Tulaai Leitung Thuthang Tuamtuam Updates Feb 4, 2015

·      Tg Pau Lian Khai  amukha leh athei kha  na om uhleh hehpihna tawh ongzasak un. Amah peen 2003 kum in kawlgam Mawng Ken khuapan pan Malaysia gam pai hi a, atunzawh kha 3 sung inn lam tawh kithuza thei in kha 3 khit pan kipan tuni dong atun abanna kithei nawnlo, inn lam lah ho nawnlo hi. Athei kha I om leh hih phone nambat te tung ahhehpihna tawh ong zasak pah un. 01127006159,00957050147,0102752477.

·      Khualzinmi 58 apua Taiwan gam bulphuh TransAsia Airline te vanleeng ATR-72 February 3 ni in Taipei khuapi tungpan kia suk mawka, vanleeng hawlpan Taipei khuapi laaizang a luang Taipei gunpi sung tukding ahanciam kawm in Vanleeng kha in leidaalna naphuka sawnsawn ahihman in tuisung ah akituiphum dan khuahlua a  mi 15 bek ahing in kihonkhia zo a, mi 31 asi sa in kihonkhia in 20 kiim tuisung ah mangthang laai uhhi. Vanleeng akiat madeuh in Vanleeng hawlpa in May day, may day kavanleeng kuang onghuh un ci in kiko ci in Vanleeng thunei te in gen uhhi. Vanleeng tuang atamzaw Sen gampan ongzin Sen mihau te ci uhhi.BBC

·      Nungkaal Sani ni January 30 ni zankim pawl in Somalia gam sung a akithuak lah mahmah  Vompi ahilodeuh al-Shabab migilo te makaaipi pa Yusuf Dheeg US ten ahawl palo Drone vanleeng tetawh vanlaai pan mu Ak tuahbang in tuahkhia ziau in golum uhhi ci in Somalia kumpi thunei te in Feb 4 ni in taangkokhia uhhi. BBC

·      IS Muslim ganhing te in February 3 ni in Jordan Vanleeng hawl Muath al-Kaseasbeh ahingtang in asihdong ahalna uh limtaang khahkhia uhhi. HIh Jodan vanleeng hawlpa zahtaak piakna in Jordan gam buppi February 4, 2015 ni in daaitak in om uhhi. HIh IS te gamtatna  tungtawn in khat le khat lungdam kilahna kitheihsak na in Jordan gamten zong kumpi pa thupiakna tawh  IS tetawh kizom amat uh thongkia minih angawt attan ek uhhi.  Jordan vanleeng hawppa akihing halna hang in Jordan kumpi-King Abdullah II US valeeng pak a, President Obama tawh February 3, ni in kimuzual uhhi. February 4, 2015 ni in Jordan atunphet mipi in namuak pah ziahziah a amanzong hih IS te um gui gam maai gui gam abatdong nasiatak in do ni ei ci  in awngpah baba hi. VOA

Lungdam Sengseng ei

Thang Khawm Pauzomi