Tulaai Leitung Thuthang Tuamtuam Updates October 7,2014

Tulaai Leitung Thuthang Tuamtuam Updates October 7,2014

·      Kawlgam sung ah kilemna aom semsem theinading ngimna tawh President U Thein Sein thupiakna hang in kawlgam thongkia mi 3,073  te kawlgam thong inn tuamtuam pan 10/07/14 ni in kikhahkhia  hi. Hih suahtak na angah te sung ah adiak in kawlgam thukan maangpi Pu Khen Muan tawh kizom mihingte tampha deuh ci uhhi. Zomi ten zong thongkiamite suahtak nading ci a thu kingengen ahihman in ilungdam veve hi.

·      N Korea leh South Korea gamte gamnih kihokikding ci in tuma  ninih lai in thukimna nei khin uh himah leh kingai luazaw a akinono uhhiam, ahihkei leh kineek ngaih luazaw a kihawhhawh zaw uhhiam October 7 ni thapaai in gamgi dung ah gaalkaap tembaw te thautang kilotkheel in thautang kikheekna nei uhhi. Aliam abaai liang leh vansia bangmah omlo hi.

·      Hong ah Democracy diktak tawh kalsuan a China ten atungpan aut bangbang un thumawkpiaklo in amau le amau amakaaiding uh teeltheihnading adeih a lungphona anei sangnaupang te leh Hongkong ulian thunei te adeihna uh kikum khawm liailiai ding uha lungphona ngongtatna khawlbawlding in thukimna October 7,2014 ni in ngahta uhhi. Kiho niding ahihleh ongtung ding Friday October 10 ni kipsak uhhi.

·      Syria gam Turkey tawh gamgi a om Kobane khuapi  IS migilo te in nasiatak in kiuthum pan abeisa kaalnih pan kipan sim uha, Kurd gaalkaap te in nasiatak mah in nanang uh ahihman in tuniciang IS migilo asi 219 phata in Kurd gaalkaap 173 phata ci in mihing noptuam vaigeelpawl in October 10 ni in taangkokhia uhhi. Hih Koban kimmteng a IS te phualpi teng US leh apawlpi ten October 6-7 sung nasitak in bomb khiat uha, IS te phuapi nih leh vanleengkaapna thau apua mawtaaw pawlkhat suksiatsak ci in US ten genkhia uhhi. Turkey gamsung aom Kurd minam te in Turkey  kumpi IS adoloh na thu lungkimlohna lungphona nei uh a palikte tawh kibuai ahihman in Kurd minam khat si hi.

·      India leh Pakistan gamgi alangtuak a ahawmna mun uh ahi Kashmir khua ah India gaalkaap te leh Pakistan gaalkaap te khuasung mi 9 sihna hang in October 5,2014 ni pan no  hizaw uhteh kicituak in kinial kawmkawm in thautang kilot kheelzeel uha, apatna lam in thautang kikhekciang hina pin ong manlang semsem a October 7 ni ciang gaal piangzo zadong ding in langnih kithawi in thautang agoldeuh te kitawh kikaap giapgiap uhhi. India te gaakaap phualpi mun 40 Pakistan gaalkaap ten simsawm ci in gamgi upian Pathak  in October 7 ni in genkhia hi.

Lungdam

Khialna aomkhaak aleh ngaihdam bawm ah maw

Thang Khawm Pauzomi

Tulaai Leitung Thuthang tuamtuam Updates October 6, 2014

Lungdam Kohna

Nung September khasung Leitung Thuthang azatding Computer leinading Zomidaily te thusiamna tawh kha khat sung huhna ongngetsakna pan akingah ahi sumtang $ 1,211.74 kiciantak in kana ngah a ongpiakhia mimal kim tung leh ongvaaihawm khiatsak ahi Zomidaily tung ah kalung dam mahmah hi. Tua ban ah kamtawh, laaitawh ongpan pih a tha ongpia teng leh attack ongbawllo kheempeuh tung ah zong lungdamna lianpi kongko hi. Zomi te bangciang in kalsuan khawmthei ta cihpeen liimlangh ah ei le ei I ki et bang in hihtungtawn in ki enkik thei ihihi.  Tutung Fund Rise natawh kisai in Zomi te omzia nam 4 kimukhia a anuai abang ahihi.

1.     Minam,Laai,Gam ading ahihnaal leh , Sum,Kam,Laai tawh huhpah in tha piapah

2.     Athei khalo azakha lo kineih vivel

3.     Ama vaaihawm na kihello ahihman thupi sathei ngiatlo

4.     Lah huh sawmlo, lah sepsawmlo Mualtan gilo bang in mimawh sakding bekbek thei. Khat bang peuh mah in ihmulo liang in ongko in khutdawh ngenpa ongcihna mun kua khasum piak hiliang hiam. US a omte hilaai deep koibang dan a US tungthei zawzen hitam

·      US Vice President MR Joe Biden zong akhuak mannawnlo hiam nungkaal October 2 ni I n Harvard University sangnau pangtekiang ah thugenna nei a Arab kipawlna ten IS te gaalvan alomalom in  huh ci kha mawkmawk ahihman in Arab gam kipawlna UAE te khasia mahmah in US ten nongtua cih uhleh IS te noguak in do un acih ek uhleh Mr Biden zong athugen phawkkik a UAE tetung a khukdin in khitui taakdetdet in mawhmaaina October 6, 2014  ni in nei hi.

·      India- Pakistan gamgi Kashmir khua ah October 6, 2014 ni  in Pakistan gaalkaapten India gaalkaap ten gamgi kantan in Pakistan mi 4 that ci in ngawh uh ahihman  langnih sona ongkibehlap a tawlkhat sung Thautang kikheek diamdiam uha India gammi m I 5 zong thautang kilawnkhial in kha in si uhhi.

·      Tukum March 8 ni a amangcip dildeel Malaysia vanleeng MH370 upmawhna thak zongding a Malaysia kumpi tawh thuciam abawl Misiamte October 6, 2014 ni in India tuipi nuailam ah Tembawpi tawh nasep kipan ziahziah kikta uhhi. Tuipi sung tai1,100 huamsung tuisung manzaihna,sikhuup tetawh akibawl tuhun tawh kituak setvanhoih nono te tawh nasiatak in zongding uhhi.

·      Syria gam leh Turkey gamgi khuapi khat ahi Kobane  abeisa nithum pan kipan tuni October 6, 2014 niciangdong IS migilo te leh Kurdish tualsung gaalkaap te nasiatak in kido uha, October 6, 2014 ni in Kurdish gaalkaap 30 si uhhi. US ten IS phualpi mun 2 vanlam tawh kapzansak sam uha, UAE te ahihleh Biden kampau nahang in khawlphot uh ahihman IS ten nehsawh mahmah ta uhhi. Turkey te zong Tank khawngtawh kithawi keeisam napi in IS te huhzaw maw cihnop huaikhat in mazang khollo ban ah Vanlam pan kisu thei taklo ahihmna Kobane khuapi peen asawtlo in IS te khutsung tungkhading in kilam en ciatta hi.

·      Brazil gam President kiteelna October 5 ni in kipanta uha, President seemlaaitak ahi Dilma Rousseff  in tuciangciang42% khawn ngah in atampeen suak ahi ahizong in kiciannaailo a azo alel October 26 niciang kiteltak in pulaakkhia panding ci in kumpi thuneite in taangkokhia uhhi.

·      North Korea Leikha maangpi Kim Jong Un amangcip dildeel laaitak October 4 ni in North Korea ulian nihte South te kiang vahawh sukvingveng uha, sawtpi tak thukimna angahzawh loh uh kiholim ding thukimna ngahkik uhhi. Lei Kha Mangpi Kim Jong Un thu adot uhleh damlel cihsan uhhi. Ahizong in thukan cianten Kim Jong Un peen ache baailaihlaih a zi in satsakmaw, thaulua a akhe in khohnawnlo maw, kitheilo khe natna tawh bucip ci uhhi.

Lungdam

Khialhna aom khaak aleh ngaihdam bawm ah maw

Tulaai Leitung Thuthang Tuamtuam Updates October 3, 2014

·      India gam Bihar state Patna khuapi ah Hindu Biakna zui te in October 3, 2014 ni in Khuado bawl in nasiatak mi atulsawmlom asim adianziahziah laitak uh Meikhau kitat in mipilak ah kia ahihman mipi mei in ahuupding lau in taaikeek uh a numei leh naupang ahatlo zawdeuh mi 32 mipi in siklumkha in 24 naakpi tak in liam uhhi. India gam ah Hindu te pawiciang  mi lomsih thei gige a August in zong mi 10 si in 2013 October kha sung in zong mi 91 si uhhi.

·      IS migilo te do ding in US te thacialna ah vakuankhia taktak tading in Australia kumpi thuneite in October 2,2014 ni in thukimna ngahta uhhi. Leitung ah gaal aphuangnuam hih IS te peen  acimannading in nga gubuah bangin khatzong siitlo in zialkuul hi ci in AU PM Abbott in genkhia hi. Tu in Australia gamte in Gaalvanleeng  6 leh akilum let thei zialzial gaalkaap 600 paisakding in kithawisak ziahziah ta uhhi.

·      IS migilo te in Syria gam a micimawh huh ahi Taxy hawl Alan Henning British gammikhat angawn atan leuleuna uh Video October 3, 2014 ni in khahkhia leuleu uhhi.   Is migilo te in October 3, 2014 ni  in Turkey tawh gamgi Kobane khuapi nasiatak in niil leuleu uha Kurdish gaalkaap te tawh nasiatak in kido uhhi. Turkey ten bel October 2 ni in gaalkaaptha tawh IS te doding thukikna angahna uhtawh kizui in Kobane khuapi kadaalpahding uhhi ci in kithawi pah ciatciat uhhi.

Lungdam

Khialhna aom leh ngaihdam bawm ah maw

Thang Khawm Pauzomi

Tulaai Leitung Thuthang Tuamtuam Updates October 2, 2014

·      Thailand gam Koh Tao acihna mun Mihau te gualnopna mun ah September 15 ni in British mi 2 asisa in kimu a Thailand palik ten athat atheite Pound sum 13,000 piading ci in akhap uhleh  kawlgammi khat hi kici ahihman in kiman pah a, October 2, 2014  ni in thukisitna pan Kawlgam mipa in kathah mah hi ci in amawhna kipulaakkhia hi. Zumhuai taktak mai

·      India gam Uttar Pradesh state sung ah October 1 ni in khualzin mi apua Meilengpi nih kiphukha a, mi 45 liam in mi 12 si ci in palik thunei te in taangkokhia uhhi. Hih mun ah tukum sung bekbek in meileeng kibung a misi anihveina hi a May khasung in mi 28 si uhhi.

·      USA Secret Service ( Thukan ) te Department  makaaipi nu ahi Julia Pierson Inn Kaangpi sung bitna alaakzawhlohna hang in Congress te mawhsakna thuak ahihman in October 1 ni in bangbang hileh kaza pan khawl maining ci in ngetna bawl hi.

·      Sierra Leone  gamsung ah Ebola natna lungno naikhat sung in mi 5 ta bang in ngahzatzat a asi zong kibehlap zatzat ahihman in huhna apia makaaite in mipi kinaakdop mahmahding in thupia uhhi.  Africa gamsung ah Ebola tawh asi mi 3,3338 cingta a natna angah mi 7,178 phata ci in WHO ten October 2, 2014 ni in taangkokhia uhhi.

·      Bulgaria gam I khuapi Sofia khuasung a  om Nasepna phualpi khat October 2, 2014 ni in ahang kitheilo khat hang in puakkham ek  a mitampi aliam ban ah mihing 15 zancipmaw leengmang maw kitheilo in mang diildeel a kumpi thunei te in nasia tak in zongsan uhhi.

·      Turkey gamte in Iraq leh Syria gamsung aom IS migilo te gaalkaap tha zang in doding  maw dolo ding cih Member of Parliament te in October 2, 2014 ni in Meetang tawh thukhensatna neitading uhhi. Amasa donuam khollo hi banghang hiamcihleh nung mahmah in Turkey gam mi IS temat mi 46 khahkik uhhi. Ahizong in leitung khuahun paizia tawh kizui in doloh phamawh ahihman in hibang a aseem uh ahihi.

·      US, Arab gam 5 te leh EU pawlte in Iraq leh Syria gamsung a om IS migilo te dona nisim in zomto suak uha, UK ten Iraq gam khunglam a IS phuapi ahi Mosul Dam kuamteng sualpi in sual in dang gamteng in Syria leh Iraq teng Taangci vawh bang in thautang theh ziahziah uhhi. French te in gaal vanleeng ahatzawdeuh nih leh Tembawpi khat October 2, 2014 ni in paisak beh laai uhhi.  Tuniciang Iraq gamsung ah 246 vei vanlamtawh sualkhin uha, Syria gamsung ah 77 vei sualkhinta uhhi. Iraq Prime Minister Haider al-Abadi  inbel Arab gamte lawmlawm in Iraq ongdo liangpeen ci in akhasiat ngaihsutna thu BBC tekiang ah October 2, 2014 ni in genkhia hi.

Lungdam

Khialna aom khaak aleh ngaihdam bawm ah maw

Thang Khawm Pauzomi