Tulaai Leitung Thuthang Tuamtuam Updates Jan 25 ,2015

·      US President Barack Obama nithum sung taamding in India gam  January 25,2015  ni in Delhi Vanleeng tualpi tungta hi. Nikaai lam in India Prime Minister Narendra Modi leh sumhau minthang pawlkhat tawh kimukhawm a, India Zozu mahtawh Puzu naluup uhhi. January 26,2015 ni a kibawlding India gamte Republic Day nithupi ni ah   zinmaangpi in vakihel ding hi.BBC

·      US gam Portland khuapi leh Milwaukee khuapi pan Atlanta khuapi atuding vanleeng nih January 24 ni in atung ah Bomb kipuahkhap saksawm cin in thudding ahihman in US gaalvaanleeng nih in anungzuihpah ceuceu lel a, Atlanta khuapi nuamtak tuthei in Palik ten uisiam leh vanhoih tuamtuam tawh vanleeng sung azon uhleh bangmah na omlo ledih hi. CNN

·      Zambia gambup President kiteelna azo alel taangkokhiatna kiteelna thuneite in January 24 ni in taangkokhia uhha, Defense Minister lui ahi Mr Edgar Lungo in mipi meetang 48.3% ngah a atampeen hipah ahihman in January 25 niciang President thakding in kiciamna lading ci in taangkokhia uhhi.BBC

·      Ukraine gam nisuahnalam a om Mariupol khuapi sung ah Ukraine gaalkaap te leh Russia te sawtaak thautawi te January 24 ni in nasiatak in khuapi laaizang nangawn ah kikaap uha, Thaupi tang te puakkham ziahziah ahihman in khuasungmi 30 nikhat thu in si in adangtam pi liam uhhi.BBC

·      IS migilo te in Japan gammi nih amatte uh Japan kumpi ten $200million tawh atatlkei leh goding ci in January 20, 2015 ni in ataangko bangteek un kitanlo ahihman in January 24 ni in minih amatte lakvuah khat ahi thuthang kan leh limtaang gawmsiam Mr Kenji Goto athahna uh video khahkhia uhhi. Hih thuhang in Japan PM Shinzo Abe leh Japan gam mipite hambangvaai kisaciat uhhi.BBC

·      Nigeria gam khunglam Yobe state sung pan January  kha kipatlam a Boko Haram migilo te in khuasungmi amat uh tampi lak pan mi 190 January 23-24 sung in ongkhah khia uh ci in Nigeria kumpi te in January 24 ni in taangkokhia uhhi. Nungkum a sangnau pang Chibok khua a akaihte uhbel khah nuam naaike uh ci uhhi. Hih thu tawh kizawitawn dekak in US Secretary of State Mr John Kerry  January 25 ni in Nigeria gam tungseisai a President Goodluck Jonathan leh amahtawh akidem  Muhammadu  Buhari tawh kimukham ding uhhi.VOA

·      North Korea gam kalkaak a aukcip Leikha Maangpi Kim Jong Un ongtungding May kha ah Russia gam Moscow khuapi a kibawlding Leitung Gaalpi nihna laai a Soviet Union ten Nazi Germany te azawhna uh phawkna pawipi ah pawisiimding leh zawlleeng kawmding in akuasung pan kizawngkhia in vazinding ci in Russia gam Ulian te in January 24 ni in taangkokhia uhhi. 2011 Leikha Maangpi za angah zawh gampua apialkhiat masak peenna zong hipah ding in gen uhhi.VOA

·      Pakistan gam nitumna lam Waziristan kuama  kibu khinkhian migilo te Pakisatan gaalkaapte in January 24 ni zan vanlam tawh nasiatak beimaai khiat temtem uha ahihman in migilo khamu chiapchuap mi 35 golum cin January 25 ni in taangkokhia uhhi. VOA

·      Philippine gam tawkawdok lam a kibusa ahi MILF  Muslim singnuai mite leh Philippine palikte January 25 zan ki umciticit uha, sial talkap in kikap ngekngek uh ahihman in mi 30 in sihlawh uhhi. Nungkum sung in hih singnuai mite leh Philippine gam thunei ten sauvei kimangding kilemna suaikaai khin napi hibang a kikiapkikna ongpianna hang in Philippine gam politics zinlin kipan citcit kikzel hi.VOA

·      Libya gam kumpi langpang thautawi pawl in January 24 sun in Libya gam I Deputy Foreign Minister pa man in taaipih mang hi ci in  Interior Minister pa in January 25 ni in taangkokhia hi. Abeisa kha khat laaipan kipan hih kumpi langpang te onghaat semsem uha, kumpi lamtetawh khuasung nangawn ah kikaap kipan uhhi.CNN

·      Egypt Leikha Maangpi atutna pan akituatkhiat nahaang in milompi sihna piankum 2011 phawlna in mipi te in nasiatak in January 25 ni  in lungphona lakkhia uha, palikte tawh kihehsuahkha uh ahihman in mi 15 sihlawh kik uhhi.VOA

·      December 28,2015 ni a Java tuipi sung a  akia Air Asia 8501 I apumpi tuipi sung pan domkhia ding in Indonesia te makaai in vanleeng zongte January 24 ni kipankhia ta uha, misi luang Vanleeng sung ah mi 6 asi kimukhia in akiim ah luangli nalaam ahihman in avek a kigawm tuniciang 162 lakpan 69 kimukhia ta hi. Vanleeng pumpi peen giksimsim ahihman in domkhiatpakding haksa ci in gen uhhi.CNN

·      Kachin gam Phakant Township sung Kamai leh Mukawng lampi dung ah KIA gaalkaapte leh kawl gaalkapa te kikaap daaidektak himah leh January 24 zanlam in langnih nai khat sung nasiatak in kikaapkik uhhi. Langnih asi aliampeen thuthangkan ten theikhia zonaailo uhhi. Kawlgam gaalkaap 70 kiim leh KIA 15 kiim kivik hi a kawlgaalkaap te aciahkik tawm ci in gen uhhi.FRA

·      Kawlgam kumpi kipsak pilsinna tawh kisai thukhunpi adeihlo Kawlgam sangnaupang te in lungkimlohna alahna uh nisim zomtoto uha mipi in nasiatak thapia toto ahihman in nopciseemseem a kawlgam bup buaizo phialding ci in kawlgam thu aencik te upmawhna genciat uhhi. FRA

·      Ongtungding February 12 ni Kawlgam Pithaungsuh Nih niciang Nypidaw ah Mualtung thautawi kheempeuh kihelkim in President U Thein Sein tawhkimuding in sam hi ci in Mualtungmi thautawi palaaipi U Khun Ohka in January 25 ni in genkhia hi. Hih niciang Predident U Thein Sein in Mualtungmi thautawi te kawlgambup kilem na suaikaaiding in heel himah leh Mualtungmi ten Federal tawh kisai thukimna lamasading in ngen uhhi.RFA

Lungdam zel ei

Thang Khawm Pauzomi