T
Ø India leh Pakistan gamte in aphelhawm na uh Kashmir
kuamteng ah September 4 nipan tuikhanna hang in India lam ah mi 65 si a,
Pakisatan lampang ah 73 si in mihing 100 gaalkaap te in honkhia uhhi. Gamnih
gaalkaap te hihmun teng ah kikap kiman denphial a aomna pan tutung tui ongkhan
lian ciang mihonkhia in buaituak uh ahihman in kikap cihtha dah in kikawi,
kiphul kha liang uhhi.
Ø Russia te Ukraine gam ah kilawmlo tak a agamtatna hang
in Australia te mitdongkholh lua mahmah ahihman in Gaalsiam gaalkaap pawlkhat
puakdinga, akibangmah in Iraq gam a ISIS migilo te ado ahi Kurdish thautawi te
ading gaalvan leh akisapleh Vanlamtawh beltung khiat US te ahuhding AU
gaalvanleeng akigingsa linlian in omkhin dimdiam ta hi ci in India gam
angaihhawh ahi Australia Prime Minister Tony Abott September 4 ni in Mumbai
khuapi ah genkhia hi.
Ø Iraq gam Bagdad khuapi sung munnih ah September 4 ni
zan in migilo ten bomb puakkham sak uha, mi 20 si in 60 liam si le naai tawh
kidim uhhi. UN te genna ah August kha sungbekbek in mi 1,420 si, July kha sung
in 1,737 si in June kha sung in 2,400 si ci in genkhia uhhi. Tuaban ah mipi
1,370 in liamna ngah uha, 600,000 in inn
le lo nusia in gaaltaai keek uh ci in genthuah hi.
Ø Gam 28 kipawl NATO pawlpi tein Russia gawtziading
taangkokhia ding ci in akigin linlian
laaitak September 5, 2014 ni in Russia,Russia deih thautawi te leh Ukraine
kumpi te kilemnading tawh kisai
September kha 5 ni nikaailam ah thukikum toding in thukimna ngah uhhi.
Gaalkaap tha akisap khak leh ci in UK te gaalsiam 10,000 NATO pawlpi ah apkhin
uhhi.
Ø Iraq gamsung a ngongtat migilo ISIS te US khut
kileenkhawm a nasiatak vado ding in Iran gaalkaap Mangpi pa in September 5,
2014 ni in thukimna neita ahihman in Ui leh Akk abang akigawi tawntung Iran leh
US te lawmta bang in IS te ongbengkhawm hialhial ding hita uhhi.
Ø Bosnia gam Zenica khuakiang leisung pi 1,600 bang
athuukna ah mi 39 in suangmeihol to kisa aomlaaitak uh September 4 nizan in
zinling a mi 5 sipah in adangten ataaikhia mantawh kumpi thuneite huhna cihbang in suaktak liamliam uhhi.
Ø Nung July khasung a kibawl Afghanistan gambup
President kiteelna ah metaang kiguuksakna om ahihman in simpha kik uha, September
5, 2014 ni in asimkik kizo siangta in tuzawh nai 72 sung in azo alel kiciantak
in kitaangkokhia ding ci in thunei te in taangkokhia uhhi. President kidem geel
ahihleh Dr Abdullah leh Mr Gani tea hi uhhi.
Zom toto ni
Lungdam
Thang Khawm Pauzomi
No comments:
Post a Comment