Thulaai Leitung Thuthang Tuamtuam Updates September 20,2015
Leitung Gaalpi Nina laaipan kipan Japan gamte in gaaldo nawnlo ding cihte akipan Gaalkaap tha tamzat lohding a ageelna na pawlkhat khiam tading in September 19,2015 ni in Japan Upper Parliament in thukimna ngahta uhhi. Akiphasak aom leh Japan ten viik theita cihna ahihi. Hih thu hang in China te zong lunghimawh in buai citcit ta uhhi.VOA
Syria gam sung Tualgaal buaina kum 2 vaalbang sawtkhin in azo zaw kuamah omtuanlo ban ah Leitung in Kumpi thuneite mawhsak in aso litlit laaitak September 19,2015 ni in Russia te in Gaalvanleeng akop athuah in puak ngawngaw ta uhhi.VOA
Pope Francis zong Cuba-US gam heelding in September 19 ni Havana khuapi Vanleeng tual tudede ta a, President Raul Castro in Vanleeng tualpi ah namuak catcat mai hi. Biakna Makaai, kumpi thunei te leh University te ah thugen na neiding ci uhhi.BBC
Syria gam leh Africa gampan EU gamsung ah gambeel ngeending a pai Gaaltaai te tuanna Tembawpi khat September 20,2015 ni in kibung a mi 13 si in 30 vaaldeuh mangthang uhhi. Misi te lak ah Nau pang khawng zong kihela a mulkim huai thei mahmah hi.BBC
Pakistan gam Peshawar khuapi khunglam a aom Pakistan Vanlam gaalkaap te phualpi September 19 ni in Taliban migilo ten buluh ek uha, bankaap ziahziah uh ahihman in mi 29 si in tamhkop khat liam uhhi. CNN
Tusung ten Friday September 18 ni pan kipan tuni ciang Iran gam i khuapi Tehran leh Iran gam tawlam teng ah nasia tak in guahpi zu ahihman in tui khang in Inn le lo tampi sia a mi 10 kiim sikhin ta hi. BBC
No comments:
Post a Comment