Tulaai Leitung Thuthang Tuamtuam Updates July 6, 2014

·      Ingak lah mahmah Zomi Khawmpi USA 2014 lungkim huaitak leh tha ngah huaitak in buaina bangmah omlo in kizo sianta hi. Tutung Khawmpi ah Adiak in Siamsin Forum, Zomi Forum, Tukpeeng , Zomi Idol, Zolia  kidemna, Zomi Concert  cihte  ah kumdang sang in lungkim huaipha diak a pawituamtuam tamsese himah leh Zin bekbek peen 2,000-3,000 kikaal kipha veve hi.

·      Tutung Tukpeeng kidemna ah Zomi Innkuan OK ten khatna ngah in, Nashville Zomi United anihna leh athumna Atlanta Zomi Innkuan te in ngah uhhi. Tukpeeng kimawl sung mipi atamzaw gensipsip peen Tulsa Zomi te tukpeeng kimawl siam mahmah ahiciang mundang khuadang kimawlna te ah zong ongpaikhia le uh cih ahihi. Zolia Zotang leh Zomi Idol te anuai a bang ahihi.

Zomi Idol

1. Lia Paal Nu (Music City)

2. Tg Thawn Pi

3. Lia Mang Nu

Zolia 2014

1.    Lia Cing San Nuam ( Atlanta,GA )

2.    Julia Ciin Suan Ciin ( Texas )

3.    Marry Kim Nu ( Tulsa,OK )

Zotaang 2014

1.    Tg Pau Sian Thawn ( Chicago, IL )

2.    Tg Cin Lam Khual

3.    Tg Thang Sian Tuang ( Huston,TX )

·      Kawlgam bup NLD khangno khawmpi Yangon khuapi sung ah July 5-6 sung nasiatak in kibawl a, mi 15 kihel Central khangno Committee phut khiazo uhhi. Muntuamtuam khangno makaaite kimtak in kahciat uha, Makaaipi Daw Aung San Suu Kyi in in khangnote hanthot na pia kawikawi hi.

·      Tibet gam Buhdha biakna te Makaaipi khat ahi Lutol Dalai Lama kum 79 acinna suahni thuphapuakna aneihkawm in Buhdha biakna zui mi atamzaw ateenna gam a hi Kawlgam leh Sri Langka gamte ah Muslim tetawh buaina akuamaciat khawlding in Buhdha biakna zui te Lutol Mangpi Dalai Lama in July 6,2014 ni in thum ngetngut hi.

·      Israel minam tangvalno thumte Hamas migilo ten gumang in asisa in akimuh khit zawh asawtlo in Jerusalem khuapi sung ah Palestinian naupangno khat kihalum sa in kimu leuleu ahihman in Palestine leh Israel kikaal nasiatak in buai uhhi. Hih Palestine naupang ahaltum hiding a upmawh Israel minam mi 6 Israel palikte in July 6 ni in man uhhi. Israel khangno thum athat ahi Hamas migilo pawl leh Pelestinina galkaap te in Israel gamsung July 5, 2014 ni zanthapai Rocker Motor tang 150 lot uh ahihman in Israel Vanlam gaaldopawl in zong zanthapaai Vanlamtawh Gaza gundung teng ah Palestinian te khiatsang atanggol zaw pawlkhat khiat suk uh ahihman Hamas migilo 6 leh Palestinian gaalkaap 9 si uhhi.

·      US gamsung ah Zomi tampi tak mah aomna khuapi minthang mahmah khat ahi Chicago khuapi sung ah USA gam suahtaakni July 4 ni  zan in thautawi mi kikap bekbek mi 50 liam a mi 7 si hi ci in ABC thukizakna te in lamdang mahmah asakna uh July 6,2014 ni in genkhia uhhi.

·      Poland gam Czestochowa khuakiang ah mimal neihsa Vanleeng khat July 5, 2014 ni in kia a atung a tuang 12 lak ah mi 11 khatte thakhat thu in sipah in khat bel naaklaai sam ahihman in Zato nawhpuak mahmah uhhi.

·      Russia gam tawh kipawlding alunggulh ahi Ukraine gam nisuahna lam ah Thautawi ten Ukraine kumpi tungpan asuhsa  uh khuapi 3 te Ukraine gaalkaapte in July 4 nipan nasiatak in nawk uh ahihman in lakikzo uha July 6 ni in Ukraine dialkhaite ongkhai kik zo ngawngaw ta uhhi.

·      July 4 ni World Cup Tukpeeng kimawlna ah Columbia te Juan Zuniga in Brazil gaamte i Gaal maainawkpi ahi Neymar  nungzangguh suihtan sak ahihman Neymar Rio khuapi Zato ah Vanleengtawh kipuakpah in tawm nuamtuam ahihman in ateenna Inn Sao Paulo khuapi ah July 5, 2014 ni in Vanleeng tawh kipuak suk leuleu hi. World Cup 2014 ah Brazil gamte in akhatna ngahding ci a kasun mang peen kei ka omloh hang ka lawmten taangtung sak veve ding hi ci in Neymar in July 6 ni in genkhia hi.  Ni Mang ahihleh 2014 World Cup kimawl zo nawnlo ding ahihi. World Cup Tukpeeng kisui etman ding amaailam munhoih deihleeng Semi-Final ni kisuihna $1,320 Final kisuihna etman $1,980 hize en eipawl I en zodiam ow.

Lungdam ei

Thang Khawm Pauzomi