Tulaai Leitung Thuthang Tuamtuam Updates June 6, 2015

·      Kawlgam Democracy makaaipi leh NLD Party Makaaipi Daw Aung San Suu Kyi Sengam ah June 10-14 nili sung taamding vazinding ci in NLD Party ten June 5,2015 ni in taangkokhia uhhi. Pi Suut Cing peen China’s Communist Party te sap hia, President Xi Jinping leh Premier Li Keqiang tawh vakimuding ci hi.VOA

·      Sen gam Yangtze gunpi sung a kibung Tembawpi tuipi sungpan June 6, 2015 ni in khaikhia ngengngang uha, June 6, 2015 niciang misi 396 muta in 100 kiim mangthang laai hi. Tembaw tungtuang mi vekpi 456 lakpan mi 14 bek suakta uhhi.Tembaw hicia Tuisung pan alik khiat ziau uhpeen Sen te siamna leitung in lamdang sasimsim ciat hi.CNN

·      Malaysia gam Borneo tuikulh tung a om mihau khualzin te avakah denna Mount Kinabaru tung ah June 6, 2015 ni in 6.0 Magnitude tha tawh zinling a, mi 11 si in 8 mangthang uhhi. Misi te lak ah Singapore Nu Ngakno khat leh Innteek te pawlkhat kihel uhhi. Mualtung kahlaaitak mi 137 zong sawtkhopkhat awkcip uha, bangmah cilo in suaktak kik uhhi.BBC

·       Tuma kum 20 laai a minam khat le khat biakna khat le khat kikaal nasiatak kidona aomkhit ciang kideidanna aom teitei laai Bosnia gam ah Leitungbup RC makaaipi Pope Francis June 6, 2015 ni in vatung a, Sarajevo khuapi laaizang ah Biakpiakna vabawl in RC pawlpi mi 65,000 bang in namuak zihziah uhhi. 1992-1995 kikaal Minam,Biakna khat le khat kikaal buaina hang in tualgaalpiang a mi 100,000 si in million khat taaikeek mang uhhi. BBC

·      Yemen gam abuluah sawm Houthi  migilo te in Yemen gampan Suadi Arabia gam tawlam a om Khamis Mushait khuapi akaapna uh thaupi tang 2 June 6, 2015 ni in lei atukma in kakapkhia ziau uhhi ci in Suadi kumpi lam thunei te in taangkokhia uhhi. Hih peen leilam tawh Houthi migilo te leh Suadi gaalkaap te kidona pan ongleeng hia, hih kidona dung ah Saudi gaalkaap 4 si in Houthi migilo lompikhat si hi.ABC

Lungdam

Thang Khawm Pauzomi