Tulaai Leitung Thuthang Tuamtuam Updates May 3, 2015

Tulaai Leitung Thuthang Tuamtuam Updates May 3, 2015

·      Leitung ah minthang vangvang khuttawh kitup haat/siam  Philippine gammi Manny Pacquiao leh US gammi Floyd Maywealther te May 3, 2015 ni in USA gam Las Vigas khuapi ah kitum uha, Pacquiao mi atamzaw in muangmahmah himah leh point tawh le citciat hi. Kimawlna khawl 12 ciang kuamah kitum tuuk zolo uh ahihman in Thukhen/Matla te kikhensak a, Thukhen thum in 118-110,116-112,116-112 cihbang in athum un Mivompa in zo ci uh ahihman in kinial theilo mawk hi. LEitung bup ah mi Awn khat vaal in sumpia in en uha, US gambang ah TV pan et man $100 kiim la uhhi. Amun ngiatpan mipi 16,507 in en uha, US mihau mahmah  Donald Trump zong vapai celcal hi. Hih pawi tawh kisai in Sum $400million ngahding in ki ummawh uha, $230million akitum geel in hawmbawlding uh ci hi. BBC

·      Iraq gam Mosul khuapi nitumna lam ah May 2,2015 ni in IS migilo te in Yazidi mi 300 gawltan uhhi ci in Yazidi Progressive Party te leh Iraq  kumpi thunei te in May 3, 2015 ni in taangkokhia uhhi. BBC

·      Thailand gam gamsung guamkawm giahphual munkhat ah May 2, 2015 ni in Thai palik te in misiluang katawm uhhi ci in May 3, 2015 ni in taangkokhia uhhi. Hih Buuk peen Kawlgampan Malaysia mi apaisak Puaisa te mikholna giahphual hi in Rohingya minamte tam om cin gen uhhi. Ahizong in tu amisite kuate hiamcih akantel laaitak uh ci hi.BBC

·      USA gam Newyork khuapi sung ah May 3, 2015 nitaak in Palik khat alutang thautawh kikap in akikaapzawh nai 4 ciang zato ah ki at hi.Palik pa naakliam mahmah sim ahihman in damding maw siding kiciannaailo ci uhhi. Nung mahmah in zong Palik leh mipi kikaal buaina amunmun ah piang kawikawi hi.CNN

·      Nepal gam zinlin nahang in kaalkhat sung in misi 7,000 cingta a, neek le dawn kisam tengzong UN ten hunlap tak in amunmun pan puakciat uhhi. Hih misi te Innkuanpih te Nepal kumpi ten siatvehna $1,000 ta pia uha, Hankuang manding $400 tazong pia uh ci in taangkokhia uhhi.VOA

·      Nigeria gaalkaap te in Boko Haram migilo te mat numei naupang mi 300 May 3, 2015 ni in honkhia leuleu uhhi. Nung deuh mah inzong mi 200 honkhia uhhi. Nungkum numei 200 vaal Boko Haram ten amat laai in Leitungbup mipil, gamhau US te nangawn in zongnapin muzolo uha, tu in Nigeria gaalkaap ten autut un honkhia ziauziau uhhi.VOA

Lungdam

Thang Khawm Pauzomi