Tulaai Leitung Thuthang Tuamtuam Updates April 6, 2015

Tulaai Leitung Thuthang Tuamtuam Updates April 6, 2015

·      Bangladesh gam Dakha khuapi leh Bangladesh gam I atunglam teng ah April 5,2015 ni in nasia tak in huihpi nung a, mi 41 si in mi 200 vaal deuh  aliam ban uh-ah inn le lo mawtaw akipan lampi te siagawp hi.VOA

·      Malaysia gam Seminyih khuakiang ah kumpi te neihsa Helicopter khat April 4,2015 ni in  vanlaaipan puakkham in kia ahihman in mi 6 atuang avek un sipah uhhi. Hih misi 6 te lak ah US gam a Malaysia palaaipi luui 2009-2012 aseem Jamaludding Jarjis zong kihel hi ci in gen uhhi.VOA

·      Chile gam atunglam teng ah April 2 ni pan kipan  nasiatak in tuicin tung ahihman in April 5,2015 niciangciang mi 25 si in 125 mangthang a, mi 30,000 in inn le lo neilo in inn 3,000 kiim mundang ah kumpi ten kituahsak uhhi.CNN

·      Syria gam Afrin khuapi pan Aleppo khuapi lamzuan a gaaltaai Kurdish minam pasal 300 Syria gam sung a gamtaang al-Qaeda migilo te in mancip uha, thatding maw koilam puakding cih kitheilo ci in Kurdish makaaite in April 6, 2015 ni in taangkokhia uhhi.BBC

·      Kenya gam a sang innkhat al-Shabab migilo te in bankap in mi 147 athahna hang in Kenya gaalkaap te in Somali gam a al-Shabab te phualpi teng Nahtang-um khiat April 5, 2015 ni pan kipan pah ngeekngeek uha, abeisiangdong misi zong simsese lo in khiat ciatciat ding ci in President  Uhuru Kenyatta in  taangkokhia hi.CNN

·      Dutch gammi  Sjaak Rijke kicipa al-Qaeda migilo te in Mali gampan 2011 kum  November kha pan amatcip uh Piantit Commando gaalkaap te in April 6, 2015 ni in vahonkhia ziau uhhi ci in French leh Dutch thunei te in taangkokhawm uhhi.VOA

Lungdam

Khialhna aom khaak aleh ngaihdam bawm ah maw

Thang Khawm Pauzomi