Tulaai Leitung Thuthang Tuamtuam Updates Jan 10,2015

Zomi te mah hiding

Zomi te sung ah kampau khat le khat awsuah zui in ahizong in a U zaw a Nau zaw kituhna tawh ahizong in Laaizom meelmaa ongtunthei ding thunengneng pawlkhat ongbuaisak leh kilawm kasa mahmah hi. Tuate sung ah kei mimal kanna tungtawn in Abul zaw ahihkei leh Mimasa cihtawh kisai in pawlkhat kongsung nuam hi. Akhangto gam te  I et ciang adiak in USA gam bang ah Leitangngaak leh mimasa peen Red Indian minam te ahihi. Ahizong in Red Indian minam te peen tualniam in mipil,mihau tawm ban ah mimal mahmah tawh uh ahihman in Mikang-English te khutnuai ah omle uhhi. Tua bang mah in Malaysia gam leitang  ngaak leh abulpeente peen Orang Ashli te ahihi. Nuntaakna tualniam,pillo haulo,  mitawm uh ahihman in Malayu minamte khutnuai ah omlel uhhi. Tua ahihman in Zomi sung ah zong no nau zaw ko U zaw ahihkei leh ko bulzaw, ko minam min  cihpeuh tawh ibuai  hang  mitampeen te deihna leh apil ahau peen tem ah in thuneihna ongnei ding higige hi.

·      Pakistan gam Karachi khuapi ah January 10 ni in Sathau pua Mawtawpi khat leh mihing pua Bus pikhat kipuhkha a, mi 30 sipah in tampi liam ci in Karachi palikte in genkhia uhhi. Kawlgam danmah in Bus dawn ah atuangpawlkhat om uha tuate pawlkhat leengkhia man ahihman in bangmah acilo zong  om uhhi. BBC

·      December 28,2014 ni Indonesia leh Singapore kikaal a kia Air Asia QZ8501 I ameidawk Java tuipi sung pan kikaaikhia zota ci in Vanleengzong makaai Indonesia thuneite in January 10 ni in pulaakkhia uhhi. Vanleeng taangthu akeemcing black box peen ameikawm a omding hinapin mundang tung hiding inlam uhhi. Jan 10 niciang misi luang 48 tawmkhiazopan uhhi.BBC

·      Britain Prime Minister David Cameron ongtungding January 15 in USA gam Washington DC onghawhding a US President Obama tawh Computer Dawi (sataan) te doziading kikumkhawm ding ci in White House te Jan 10 ni in taangkokhia uhhi. BBC

·      US leh apawlte in IS  migilo te phualsaatna ahi Syria gam Kobani  khuapi kiimteng mun 12 Jan9-10 sung in vanlamtawh nasiatak bomb khiat kik leuleu uha, IS migilo te gaalphual mun 15 suksiatsak in IS te zumpi pawlkhat zong denzaansak ci in US gaalkaap te in taangkokhia uhhi. VOA

·      Nigeria gam khunglam Maiduguri khuapi sung mitam mahmah munkhat ah naupangno numei kum 10 dingkhat January 10 ni in amah le amah bomb tawh kipuakkham sak a mi 16 si in 20 liam uhhi. Kua migilo te sawtaak hiding cih kithei zo naailo a thunei ten akan saan laaitak ahihi. VOA

Lungdam

Thang Khawm Pauzomi