Tulaai Leitung Thuthang Tuamtuam Updates October 8, 2014

Tulaai Leitung Thuthang Tuamtuam Updates October 8, 2014

·      Leitung ah akilau khia mahmah ahi Ebola natna lungno hang in US gam Texas state ah mikhat October 8, 2014 ni in si hi. Africa gam ah hih natna hang in mi 3,400 sikhinta a, 7,400 in hihnatna angah laaitak ahihi. Pasian US gam tawsatna in ongzang khamai ding ci in Pasian thu um pawlkhat lau thawng mahmah uhhi. Zomi te htungetna tawh mapang ciat ni .US gampan azinkhia ding leh ongluut ding peuh mah Vanleng tualkheempeuh ah cisa kisit in kivel ngiatngiat ta ding hi. UK teng Africa gam sung a Ebola natna doding in Gaalkaap 7,500 paisakding ci in October 8, 2014 ni in taangkokhia leuleu uhhi.

·      Syria gam leh Turkey gamgi a om Kobani khuapi asim ahi IS te US leh apawlten Vanlam tawh dozel himah leh tha hat tektek uha, October 7, 2014 ni in munhoih nateng IS ten lazo uhhi. Ahizong in Pentagon pan agenna uh ah Kobani  a Kurd minam te huutding cih US leh Pawlte ngimna bul hilo a IS migilo te zialding cih hizaw ci uhhi. October 8, 2014 ni in  US leh apawl ten Vanlam tawh IS mi 43 leh gaalvan tuamtuam pawlkhat suksiatsak  uh ahihman lam et bei a vulningniang Kurd minam thautawi te ongtha hat kik in Kobani khuapi pan IS lutun ngiaungau puantual pelpal te hawlkhia zo uhi.Canada gamte in zong IS te vanlam tawh zialding in October 7 ni in thukimna ngahsiang ta uhhi. Hih IS migilo dona in US ten 60 million beita uhhi.

·      Turkey leh Syria gamgi a om Kobani khuapi IS migilo ten nasiatak in do mah leh Turkey lampan pausese lo in omdide ahihman in Kobani khuapi a teeng Kurd minam te banghang onghuhlo ci in Syria gamsung aom Kurd minamten tuman ninih pan lungphona nei uha, October 8 ni in lungphona bawlte mi 19 si in 145 liam uha, 388 Turley kumpi thunei te in man uhhi.

·      US gaalvanleeng F-15D te khat Lincolnshire gam Western Hill ah October 8, 2014 ni in ginneihlo pi in lolaai khat ah kia a vanleeng hawlpa ahihleh lengkhia mansam in tawmliam a zato ah kipuak phot ci uhhi.

·      Indonesia tam Bali tuikulh ah mopawi bawl a pai leh mopawisiim mi honpikhat tuanna tembaw October 7 ni in tuipi tung ah kibung a mi 17 sipah in adang 30 kiim mangthang uhhi. Palik te leh tuilamsiamte in ahah zonsanlaaitak hi ci in Indonesia thunei te in genkhia uhhi.

Lungdam

Thang Khawm Pauzomi