Tulaai leitung Thuthang Tuamtuam Updates August 17,2014

·      Zomi sung ah Lasa siam minthang vangvang leh a aw asiatheilo ahi VC Mang leh Atlanta khuapi pan Guitar siam mahmah E-Tuang leh alawmte in Bowling Green Khuapi ZMBC biak in ah August 17, 2014 ni in Zomi kheempeuh tawh Pasian minphatna neikhawm in Phatna la ongzai ziahziah uha, mipi ten tha kingah mahmah leh hampha ka kisa mahmah uhhi. VC Mang tawh holimna,gualnopna August 17, 2014 nitaak kinei khawm laaiding a, August 18 niciang Sia VC Mang Louisville Khuapi Sia Pau Khai te kiang ah ongpaisan ta ding hi.

·      Indonesia gam Lombok leh Komodo tuikulh kikaal ah mihau khualzin hiauhiau te apua Tembawpi khat August 16, 2014 ni in kibung a, atung a tuang mi 10 leh Tembaw naseem 5 akigawm 15 te tuisung ah tum in mangthang uhhi. Hih amang mite peen New Zealand, Germany, UK,Spain,French leh Netherland gammi tea hi uhhi. Indonesia kumpi te in amanpan kipan nasiatak zong uh himahleh August 17, 2014 niciang muh neinaailo uhhi.

·      Hongkong gam Democracy diktak a kalsuantheih nading in leh China in a ut bangbang vaaihawmlo a Hongkong gam  amau le amau in vaai ahawmtheih nading deihna in Hongkong mipi 111,000 te  in August 17, 2014 ni in nasiatak in lungphona nei uhhi. Hih peen 2014 kum ading in anihveina hi a, July kha sung in zong khatvei neikhin ta uhhi.

·      Nigeria gam ah August 11 ni a Boko Haram migilo te matcip Nigeria mipi 85 te Chadian gaalkaap te in asun azan in suulzuih uha, Chad tuikulh tungpan August 17, 2014 ni in honkhia zo uhhi. Hih mikiman te peen pasal 65 leh numei 23 ahi uhhi. April khasung a sangnaupang numei 200 kiim amatte uh ahihleh tudong kimu zonaailo phot hi.

·      Israel leh Palestine te in gamnih kikaapna akhawlsiantheih nading in August 14 ni pan Egypt gam Cairo khuapi ah langnih kikupna nasiatak nei uh himah leh August 17, 2014 nitan bangmah thukimna ngahnaailo uhhi. Ahizong in ni 5 kilemna ahun abeima thukimna khat teitei leh asawt kilemna ngahding ahanciam uh ahihi. Azenzen in kilemna angah zawh kei uhleh August 18 niciang kikaap kipan kik ding uhhi.

·      Ukraine gam nisuahna lam teng a micimawh te huhnading Russia huhnapua mawtaw te gamgi ah August 17, 2014 ni in ding ngillngelh a, Ukraine gam luuttheiding maw kilehding angak laaitak un Russia deih thautawi te in Ukraine gaal vanleeng MI-29 tekhat August 17, 2014 ni in kapkhiat sak leuleu uhhi.

·      Nepal gamte khuapi Katmandu khuapi pan nitumna lam tai 250 agamlaat na munteng ah August 14 nipan nithumsung guahciin ngekngek ahihman in men kicim ziahziah tui khangziahziah a, mi 54 asikhin kimu in 142 mangthang uhhi.

·      Kawlgam Mualtung thautawi te palaai ahi NCCT leh Kawlgam kumpi palaai te Yangon kilemna Innpi ah nithum sung thukikupna August 17, 2014 ni in hialbawl phot uhhi. HIh thu kikup nasung ah Kawlgambup kilem suaikaih khitciang gamthu kikupma thautawi ten bangseemding, Kua Thautawi teng kawlkumpi tawh kilemna suaikaai theiding, Party ten bangseemding cih namthum thukimna ngahzolo uh ahihman in September khasung kikupkik ding in khinto uhhi.

Lungdam

Thang Khawm Pauzomi