Tulaai Leitung Thuthang Tuamtuam Updates July 9, 2014

·      Leitung World Cup tukpeeng kimawl na taangthu ah aom ngeinaailo thulamdang mahmah Brazil in Germany te July 8 ni in Goal 7-1 tawh lel ahihman in Brazil gambup mipite kahna leh hagawina tawh kidim uhhi. Mipi te kahna pan luankhite puanbang nuulkikding in President Dilma Rousseff  in hehneem hi. Brazil dawisiam te in Germany te gualding dawi ai tawh bawlding ci in thuthang ah genkhia uhhi. Germany ten Dawi ai sang ibiak Pasian lianzaw cihtel uh ahihman ang kawk hiathiat lel in akimawl uhleh Brazil te dawi ai lehtaai Thal lam cilsiat eitungtu cihbang in Brazil te zukham bang , Lawihon hai bang in lomtai ngeingai pong uha, A coach pa bang uh haidektak liang hi. Hih thu ah Zomi ten iphawkding thu namnih kisam kasa mahmah hi.

1.    Dawi ai tawilaai khua Zomi sung ah pawlkhat ki omlaai a, Dawi ai peuh tawh leitung ah na kiseemthei nawnlo cih telhuai ta hi.

2.    Pasian thuzui pipi dawi aikhawng uploh ding leh  Dawi ai ciangciang I Pasian in daalzo lua cih iphawkding kisam hi.

·      Iraq gam Bagdad khuapi khanglam gamsung munkhat  ahi Shia Muslim te teenna kiim ah Iraq gaalkaap te in thau tawh kikaaplum pasal 50 asisa in July 9, 2014 ni in mukhia uhhi. Hih misi te peen akithah zong sawtpian ta leh kilawm a Sunni Muslim migilo te thah hikhading in lam en uhhi.

·      China President South Korea gam azin lungkimlohna lah na in North Korea te in July 8 ni in Nahtang Um tangnih South lam tuipi tung ah lotsuk leuleu uhhi. Hih peen Kaalnih sung ah 4 vei a lot sukna uh hia, South ten bel mi mi leh gam sukhakhol lo ahihteh aneihteng uh abeidong lawnlawn lel le uh cihsan uhhi.

·      India gam Bihar state sung ading a BJP party te  MP teelcing Taangmi khat ahi Giriraj Singh  in ka inn kiluh in $800 kiim mang ci in Palik te kiang ah July 9, 2014 ni in gen a palik ten azon leh MP pa zum nasem khat leh adangthum te guk nahi ahihman man uha, amat uhciang $190,833 leh Nai,Ngun pawlkhat ngahkik uhhi. MP khat  Mee kuang aluiding ciang neihsa akidotna ah Mr Singh in Rs 50,000  beknei ciin pulaak ahihman Police ten Tax vaaisai tekiang ah gen in akansan laaitak uh ahhi. Azenzen in mawhna akimuh leh MP thongkia ongsuak ding hi.

·      Palestine gam sung a kiphual Hamas migilo te in Israel gamsung July 9, 2014 ni in Rocket thaupi tang 72 lotphei uha, Khuapi sung a tuding tang 14 siktumpi nabenkhia man hi. Israel Prime Minister Benjamin Netanyahu leh Militant Chief te July 9, 2014 ni thukin kimukhawm uha, Gaza dung leilam tawh nasiatak nuaiding gaalkaap 40,000 paisakding in thukimna nei uhhi. Palestinian gamsung ah Hamas te phualpi 550 om a, 129 Vanlamtawh kizial khin in adangteng leilam longkhia in cimangsakding angim uh ahhi. Nasia lua ding ….

·      Indonesia gam President kiteelna Mee tang kong July 9, 2014 ni in kikhakta a, President ding a taaikidem ahi Joko Widodo leh Prabowo Subianto te in anih un thukante tung ah ken kazo cituak uhhi. Ahizong kuanzo kuanlel cihtaktak official in July 21-22 niciang thuneite in taangkokhia ding uhhi.

·      China leh USA gam kumpi thuneite gamnih kikaal kumsim thukikuppi na July 9, 2014 ni in Beijing khuapi ah kipanta a  ninih sung sawt ding hi. US lam pan Secretary of state John Kerry leh apawlte kah  uha, China President Xi Jinping in thukonghonna nei hi. China leh USA kipawlkhawm a kilemtak anasepna peen gamnih ading leh leitung ading namtui mahmah a  ahizong in gamnih kilem keilian leh leitung ading in uih mahmah ding hi ci in genbeh hi.

Lungdam ei

Thang Khawm Pauzomi