Tulaai Leitung Thuthang Tuamtuam Updates July 3, 2014

·      Kawlgam Mandalay khuapi sung ah Buhdha biakna azui nungak khat Muslim puteek Niangtuisai nei khat in buan hi cihthu Facebook ah mipawlkhat in akizelhsakna hang in Lutol honkhat leh Buddha biakna azui kawlmipi 400 vaal in Muslim te sai,Inn leh Biak inn teng July 1,2014 ni in Buluh uha, mi 5 liam uhhi. Palik ten mipi teng khenmang in July 2 ni daaisim zawzen himah leh, Phone tawh langnih buaina ding thu athangsak pawlkhat  July 3, 2014 ni in ongkipan leuleu ahihman Muslim leh Buhdha nasiatak buaina piangkik a mi 2 si hi. Kumpi te in zan kuamah vaakkhia theilo thukhun nambat 144 tawh Mandalay khuapi sung ukcip phot uhhi.

·      Australia Foreign Minister Julie Bishop Kawlgam President U Thein Sein leh kumpi ulian pawlkhat tawh July 3, 2014 ni in kimukhawm uha, gamnih kizopna khansemsem ding kikum uhhi. Ongtungding kum 2 khitciang Australia leh Kawlgam te University sangnau pang kikheek nading zong kihel ci hi. Minister Julie July 3, 2014 ni mah in Daw Aung San Suu Kyi tawh minutes 45 sung kimukhawm uhhi.

·      Japan minam mi 13 te 2002 kum North Korea gamte in gu mang in amatcipna uhtawh kisai in Japan Prime Minister Shinzo Abe leh North Korea gammakaai te China gam Beijing Khuapi North Korea palaai zumpi ah July 3, 2014 ni in kikup khopna nei uha, hicihding cih omlian naailo napi in Japan ten North Korea te a gawtna tawm kolsakding ci in Mr Abe in thukan te kiang ah genkhia hi.

·      Uganda gam sung a om Entebbe Vanleeng tualpi apawlmin kitheilo migilo terrorist ten July 3, 2014 nitaak 9 pm-11pm kikaal simding susia ding hi ci in Uganda aom US Embassy te in Uganda kumpi te tung ah theihsakna nei uhhi. US Palaaizum te in thukan muntuamtuam pan kiciantak in angahna thu uh zong telgen uhhi. Nungdeuh mahmah inzong UK sung migilo te nawkding US genkhol man uha kidaal man uhhi. 

·      North Korea gamte in Kiim le paamteng alauphawn detkeeina tawh kisai kikumding in China President Xi Jinping  leh a angkawi Peng Liyuan te Seoul khuapi July 3, 2014 ni in tung tapetpet uha, mipi  in nasiatak in namuak zihziah uhhi. South Korea President Park Geun-Hye tawh holimna nasiatak neikhawm uhhi.

·      Germany gam te in alamdang mahmah khat leh amasapeen zong ahi Germany gammi te thaman tawh kisai aniampeen tanding ciangtanna July 3, 2014 ni in Parliament ah  neitaktak ta uhhi. Thaman peen German a nasemkhat peuh in atawmpeen Euro sumtawh naikhat  8.50 hiding a Pound tawh hileh 6.80 hiding cih ahihi. US gam ah thaman aniampeen uniciang $7.25 ahihmna in US sang thaman hoihzaw mahmah cihna ahihi.

·      Ukraine Defense Minister thak liklek pa ahi  Valeriy Heteley in Kiev Khuapi Parliament ah  July 3, 2014 ni thugenna nei a, Ukraine gam pan taaikhiat asawm kumpi langdo kheempeuh kamaimang sakding a, Russia ah akigawmsa Crimea tuikulh zong lakik in Ukraine gam angei bang in kalam kikding hi ci in Kumpi thunei te leh mipi te tung ah kamciam pia hi.

Lungdam zel ei Guai

Thang Khawm Pauzomi