Tulaai Leitung Thuthang Tuamtuam Updates May 23,2016

Tulaai Leitung Thuthang Tuamtuam Updates May 23,2016

·      Leitung pianzawh amasa peen athupi peen Zomi te in Music City ci a leitung ah aminthang vangvang Nashville Khuapi Tennessee State pan  ongtungding July 1-2,2016 Niciang Zomi Innkuan USA vaihawm nawtawh Zomi Innkuan TN te Innteek in Leitung bup thawnziahziah ding uhhi. HIh hun ah India,Kawlgam,Canada,USA leh gamtuamtuam pan Zomi sung ah imuan isuan Politics lam, SIavuan lam,Taangthu lam , Sum le Paai zonnalam, Leitung Pilna lam, Khangno tawh kisai leh Zomi tawh kisai FORUM tuamtuam nasia tak in kineiding ci hi. Zomi Sung ah imuan diak ahi ZoRO,ZRO,ZCD,ZYA,GZA, LZI,ZIUSA, ZOMI COUNCIL-INDIA/BURMA pan Makaipi te ongkituah ding uha, Nasiatak in gamvaai, Minam vaai ongkikum ziahziah ding uhhi. Tua ban ah Zomi Idol, Zolia, Zotaang kidemna, Tukpeeng kimawlna  leh Lasakpawi pi zong omding hi. ZIUSA Media te zong Leitung bup a om Zomi te neekngaih na tawh Ready pianpian ta cihthu kiza hi.

·      Thailand gam Bangkok khuapi pan KM800 nakiim a om Biakna Numeino sang khat May 22,2016 ni in meikaang a mi 38 a omlak ah 15 puanza peh in paden pan leengkhia zo in adangteng kaangtum uhhi. Numei no te peen kum 5-12 gual vive ci in Rueters ten gen uhhi.CNN

·      US gam te in Gaal a aneihngei uh ahi Vietnam gam te tung ah  Gaalvan zuaklohding thukham peen kisumit ta a kizuakthei ta ci in President Obama leh Vietnam Tran Dai Quang te in May 23,2016 ni in Veitnam khuapi Hanio ah taangkokhiatna nei ta uhhi.VOA

·      Syria gam Tartus leh Rahman khuapi ah May 23,2016 ni in mun 4 ah bomb puakkham a mi atawmpeen 146 si in 200 vaal ding nasiaktak in liam uh ci in Syria gam encik pawl ahi SOH te in taangkokhiatna nei uhhi.CNN

·      Indonesia gam Sumatra Province Sinabung mualtung ah May 22,2016 ni in Meilmaul puahkhatna hang in mi 7 si a tampi gaaltaai uhhi. Indonesia gam ah apuakkham theiding Meimual 120 kiim aomlak ah tu a peen khat hipan ci in Leisunglam siam ten gen uhhi.BBC

·      Yemen gam Aden khuapi sung ah IS misok te in May 23,2016 ni in bomb puakkham sak uha, mi 45 phualsih pah in 100 si tawh naaitawh kidim in zato lam kipuak hi. Yemen gam sung bekbek ah IS te khutsiamna tawh mi 2015 kum beipan tukikaal mi 6,200 sita a million khat vaal kitheh thaang uhhi.VOA

·      Thailand gam Sumkaung tuikulh a Mithat upmawhna tawh kiman in thahding a thukikhen kawlgam mi-2 te May 23,2016 ni in Thai thukhenzum ten Kawlgam mi-2 te in Lawer te ngetna ahi athu atunglam ah sitphat ding peen saanna neita uhhi. Kawlgam mikhat hihna tawh kivei ciat ding in ka um a lungdamhuai thu hicih zong kiphawksak hang ei. VOA

·      India President Narendra Modi May 21 nipan Iran gam vazin tadihdih a, Iran President Hassan Rouhani  tawh Tehran khuapi ah akimuh khitciang India gam Iran tawh kikawm nading Pakistan gam kiang ah Tembaw khawlna munpi khat $500miliion bei in lamding ci in May 23,2016 ni in taangkokhia  hi. Hih Tembaw khawlna ongzo leh uh Leilam tawn a Pakistan gamtotna peen kitat ding ahihman in Pakistan gam kiamding ci uhhi.CNN

·      Sri Lanka gam ah  Nungkaal sungpan kipna gauh tam lua mahmah ahihmna in tuikhang in men kicim ziahziah a, May 23,2016 niciang misi bekbek 92 phato ta in 109 mangthang laai ahihman in gaalkaap te in zong ziahziah uhhi. Hih bang a guahtamna peen tuama kum 25 khit amasapeen in ciamteh uhhi.CNN

LUNGDAM

Tulaai Leitung Thuthang Tuamtuam Updates April 18, 2016

Tulaai Leitung Thuthang Tuamtuam Updates April 18, 2016

·      Abeisa ninih pan kipan Ethiopia gam leh South Sudan gamgi ah singnuai mite leh Ethiopia gaalkaap te  nasiatak in kidona hang in Ethiopia mi 208 sita a, Singnuai mi 60 si in Singnuai mi ten Naupang meelmawl 100 mancip uhhi.VOA

·      Sengam leh akiim a gamneu te kituhtuhna South China na tuipi tung ah Sen te in Gaal vaanleeng April 18, 2016 ni in tusak ta uh,a angapngap kipan thei ci in pangta uhhi. US ten lah USS John C Stennis Gaal Tembaw pi kilehsak dede ta ohhoi! Hih USS John C Stennis tung ah Gaalkaap leh Tembaw nasem bekbek 6,500, Helicopter 90, Gaalvanleeng 75 tuang in Aman peen $4.5billion ci zen ei.BBC

·      Abeisa ni nih laai a Ecuador gam zinlin na hang in misi 413 phato in 2,500 liam uhhi. Inn le lo, Lampi kisia bekbek puahding in kipan ding hileng US Dollar a billion a sim abeiding in cizen uhhi. BBC

·      Iraq gam Bagdad khuapi avatung zal US Secretary of Defense Ash Carter in Iraq gaalkaap ten IS migilo te adona ah atha haat zawk theih nading ngimnatawh Gaalkaap 200, leh galvan pawlkhat, Helicopter cihte puakbehding ci in April 18, 2016 ni in taangkokhia hi.CNN

·      ISRAEL gam Jerusalem khuapi khuataw lam Hebron lampi kiang ah April 18, 2016 ni in Bus pi khat puakkham ek a, atung tuang mi 21 te liamna tawh zato lam kipuakpah a mi 2 ahihleh lam et beipianpian zahdong in gim uh ahihman in sikhading in kilam ci uhhi.BBC

·      Gengen taleeng gen bangle North Korea gam te in A (5) veina Nuclear thau tang lawtsinna asawtlo in bawlding in kigingkhol khin uhhi ci in South Korea te in April 18, 2016 ni in  genkhia uhhi.Tutung a peen asin mawkmawk hilo in munkhat peuh asinkhial kineih in ongkap khading cih lauthawng mahmah uhhi. US Today

Lungdam

Thang Khawm Pauzomi

Tulaai Leitung Thuthang Tuamtuam updates April 5,2016

Tulaai Leitung Thuthang Tuamtuam updates April 5,2016 

Kawlgam Tahan Khuapi ah Mizo ten abawl den uh Zomi Sialsawm or Lawm ann neek pawipi siim ding in India gam Mizo Ram State Chief Minister Pu Lal Than Hawla te Nupa April 5,2016 ni in Kawlpi Vanleeng tawh tungta uhhi.  Chin Media

Sagiang Divition sung makaih ding Minister mi-6 lak ah Pu Kam Za Mung ongkihel a ama panmun ding ahihleh, Khaicinna, Khawi le vulh cih te lam ahihi. The Irrawaddy 

Chin State sung makaih ding NLD Minister mi-5 bek koih a Tedim Tonzang kuam ai-aw in ZCD party pan Pu Tg MP Pau Lun Min Thang ongkihel hi.  Atom in Chin State NLD khawk-5 ongsuah hi a Zomi ten zong khawkkhat hamphatna akingah suak hi.  Pu Pau Lun peen banglian seemding cih amun kitel nailo hi. ZCD

Kawlgam Prime Minister or Forein Minister thak liklek Pi Suut Cing sapnatawh ongpai China Forein Minister Pu Yang Yiechi leh Pi Suut Cing te April 5,2015 ni amasa peen kimu zual uha, Mr Yang inbel zawlheel kahi cikawmsa in Irrawaddy guunpi khaktanna Mitsong vaai ongngaihsut sakseiletin kakipakding ci in ngen hi. Nitaak lamciang Nyipidaw Forien Minister huang ah thukan tetung thupulaakna bawl uhhi. Eleven Media

Tunung mahmah a Amyotha Hlutdaw pan ZCD MP Pi Cing Ngaih Mang thukimna abawl Daw Aung San Suu Kyi Gambup thudotpi asuah nading thukhun peen Pituh Hlutdaw ah April 5,2016 ni in kipsak leuleu uh ahihman in President in Suaikaai leh apapai hita hi.  Gaalkaap lamten Kumpi pa thudot cihbeek ah ongkhiam un Gambup cih lawmlawm ci in thuum ngeetngut mahleh ngahlo uhhi.  Hih Gambup thudotpi cih peen Prime Minister tawh azakikim ci in thuthei ten gen uhhi.  VOA

Kawlgam Federal tawh kaalsuan theihna ding kal masa lam ahi State Counsellor neihding tawh kisai Amyotha Hlutdaw  ah April 5,2016 ni nasia tak in kikum uha,  Gaalkaap te akeelluphuum uh ongkidawk pianpian ta in 2008 Thukhun pi ah Federal cih malkhat zong kimulo ahihman in ongtam ham kei un ci in dingluailuai uhhi.  Atamzaw thukimna mee tawh kila ahihman in neihding in kikipsak hi.  March 17 Ni gaalkaap Ni in Min Aung Hlaing in kumpi thak ten 2008 thukhun azuih leh kipawlkhawm ding azuihkei leh gilbeem cikha dektak hi. Ongdin khawlloh ding uh thungetna ah phawk ni.  Amyotha Hlutdaw pan 

India gam Bihar state te in amau state sung ah Khamtheih ZU acid limlim kikhaam kilkel ta hi ci in April 5,2016 ni in State Chief Minister Nitish Kumar in taangkokhia hi. VOA

US President demoing Democratic Party pan maaitaai ahi Pi Hillary Clinton leh Mr Sanders te ongtungding April 14,2016 niciang CNN pan nasiatak in Kam kinialna neiding uha, tuakhit pan kua maaitaai suakding cih ongkitel to ding hi. CNN

Indonesia gam Jakarta khuapi sung a om Jakarta Van Leeng tualpi tung ah  April 5,2016 ni kaai lam in Van leeng nih kiphulkha ta dihdih a atung atuang mikheempeuh kua mah aliam abai omsamlo in kihonkhia khinzo hi. BBC

Lungdam

Thang Khawm Pauzomi 

Tulaai Leitung Thuthang Tuamtuam Updates March 23, 2016

Tulaai Leitung Thuthang Tuamtuam Updates March 23, 2016

·      Zomi sung ah Paltan ineihsun ahi ZRO/A te in aneihden uh A 14 veina gambup khawmpi ZRO Phualpi Mount Sinai Camp ah March 17-19,2016 sung  kipawl a tuamun ah Panmun kiteelna zong kinei in Pu Thang Lian Pau in President teelcing kik hi. Pasian naseem te thupha piakna tawh hun mansak uhhi.B.MUAN NGAIHTE

·      Kawlgam Lower House Education Committee ah Secretary aseem ahi ZCD Party pan MP Pu Kham Khan Thang te alawmte mi -5 asawtlo in Japan kumpi sapna tawh Japan gam vazinding uhhi. Pu Kham Khan Thang genna ah abeisa hun in Japan te in Chin state ading Huhna sum alompi in ongpia himah leh Tedim,Tonzang lamten kiliak khalo in atun abanna kitheilo hi. Tutung in lomkhat kongkaih khiat sawmding thu ngetna ah ongphawk un ci hi.ZCD

·      Belgium gam Zaventem Vanleengtual ah Bomb sukham in mi 31 that in mi 271 aliamsak migilo hiding a upmawh Unau nih te min Belgium thunei ten taangkokhia ta uhhi. Tua te in Ibrahim al-Bakraoui kum 29 leh anau Khalid te ahihi. A U zaw al-Bakraoui peen Turkey te in gitlohna hangtawh man in EU gam apuakkik hi ci in Turkey President Recep Tayyip Erdogan in March 23, 2016 ni in genkhia hi. CNN

·      Yemen gam Hajr acihna mun a om al-Qaeda migi te gitloh sinna Camp pi March 22,2016 ni zan US ten genkhol selo in Nahtang Um nasiatak in khiat sim ek uha, Migilo 40 sipah in migilo 25 liam ci in US gaalkaap ten gen uhhi. Misi peen bantop in kisim manlo ahihman in tamzawding ci in gen uhhi.BBC

·       Pi Suut Cing in muang mahmah a Kawlgambup sum encikpi ding a ateel U Kyaw Win I angah Doctor Degree peen Huihlak Dr nahi ahihman in March 23, 2016 ni in amah le amah in atuh fake ahihna pulaak hi. Hih Dr peen Brooklyn Park University kici Online sangpan angah hi a, Pakistan gampan kibawl hi in atuh ahihi. Kei le kei zong Dr ci in kaki gennawn keiding ci in tamlo keei hi. NLD ten bel atuh asit poilo teel te teelsa ci in seemsak veve ding ci in Media ah gen uhhi.CNN

·      IS misok te in Europe gamsung adoding in gaalkaap mi 400-600 kikaal limtak in kisinsak uha tua teng in tun EU sung asualsual hi ci in Associate Press thukizakna te in March 23, 2016 ni in amuhkhiat na uh genkhia uhhi. Europe gam bekbek pan  Syria leh Iraq ah IS tawh kizomding a aciahkik mi 5,000 kiim pha ci  uhhi.ABC

Lungdam

Thang Khawm Pauzomi