Tulaai Leitung Thuthang Tuamtuam Updates Feb 26, 2015

·      Syria gam khunglam Hassakeh province sung khau neu 10 IS migilo ten tuma ni 2 pan kipan umcih uha, Assyrian Christian biakna zui amat uh tuniciang 220 cingta ci in SOHR te in February 26, 2015 ni in taangkokhia uhhi. Hih amat te uh peen ahingtang a amat uh hia, amat kawm un athahlup zong pawlkhat om ci in gen uhhi.Hih thu hang in Kurd gaalkaap te leh US le apawlten zong nasiatak February 25 ni in dopah uha, Iraq gamtawh akizopna lampi bulpi khaktan zo uhhi.BBC

·      IS migi te lakpan Amai tuam in asang zeza Mihing takpi Ak ngawngtan bang in atangiapgiap Jihadi John akici pa peen amin taktak Mohammed Emwazi hi in kum 27 pha a, London nitumna lam a teeng in University of Westminster pan Computer programe tawh sangman ci in thukan te February 26, 2015 ni in pulaak khia uhhi. Amah peen Somalia gam a mgilo al-shabab tetawh zong kizom ngei a misok khat a kiciamte ci uhhi.VOA

·      Nigeria gam khung lan Biu khua aom Bus khawlna ah Boko Haram te Bomb sukham uh ahihman in mi 17 si a ahun kibang lian pawl mah in Jos khua sung ao m Bus khawlna mun ah Bomb mah puakkham sak uh ahihman in mi 15 si hi.BBC

Lungdam

Thang Khawm Pauzomi

Tulaai Leitung Thuthang Tuamtuam Updates Feb 25, 2015

·      Afghanistan gam Panjashir province sungteng ah February 25, 2015 ni in Vuuk khal Suangtum bang in nasiatak in kia a mi 108 khalum in adang mi 30 kiim vuknelhcip ci in Afghanistan gam thunei te in taangkokhia uhhi.BBC

·      South Korea gam Seoul khuapi pan tai 75 kigamla Sejong khuapi sung a vanzuakna sai khat ah pasal khat in February 24,2015 ni in mi bankaap a, mi 3 kap lum amah asisa in khuapua lam ah Palik te ani mah in mu uhhi. Korea gam peen Pasal kheempeuh phial paltan tum vive ahihman in thaukap kiva thei mahmah uh ci hi.BBC

·      Russia gammi Computer guta siam mahmah ahi Evgeniy  Bogachev aman khia zo aom leh $3million piading ci in February 25, 2015 ni in taangkokhia uhhi. Amah peen anunung peen akimuhna Russia gam hi in tuazawh atun abanna kithei talo hi. US kumpi ten Computer guta te matnading a akhap nalak uh-ah sum atampeen ci uhhi.Zomi sung ah man thei bang omleng bel tawm kei maw angap I om leh kipan vuau .BBC

·      Iraq gam khuapi Baghdad khuapi sung ah I misok ten February 25, 2015 ni in Bomb leh agilpi uh puakkham sak khawm leuleu uha, mi 37 thakhat thu in sikhin in adang tampi tak liam ci in thunei te in gen uhhi.BBC

·       Nigeria leh Cameron gamgi ah Boko Haram migilo te leh Chad gaalkaap te February 24,2015 ni  nasia tak kikaapna oma, Chad te cihtham savetlo bekthamlo in Boko Haram migilo 207 nikhat thu in thatlum ci in taangkokhia uhhi. Hih Boki Haram te peen Nigeria leh akiim apaam teng ah IS te zahmah a kithuaklah ahi uhhi.VOA

·      Sen gam Xinjiang huam sung Highway tung ah Bus pi khat February 25, 2015 ni in Kongfu sin lah hisamlo napin kilum let ek a atung atuang mi 22 sipah lian in adang 38 si le naai tawh kidia in liam ngeeingaai uhhi ci in Xinhua thuthang ten genkhia uhhi.ABC

·      Kenya gam sung ah Islam Biakna hai a ahaita migilo te in 2012 kumsung in Kenya gammi 312 thatlum in 779 kapliam uha, 2013 kum sung in 67 that in 2014 kum sung in 173 thatlum uhhi ci in Kenya palik te in February 25, 2015 ni in taangkokhia uhhi.ABC

Lungdam

Thang Khawm Pauzomi

Tulaai Leitung Thuthang Tuamtuam Updates Feb 24, 2015

·      Zomi ten tukum I omna munmun pan Zomi Nam Ni nuamtak in dawnthei kimciat ding in kadeih bawla, Abawl naailo ten zong nuamsa mahmah seemding in kalam en hi. Net sung tuamtuam te ah Zomi Nam Ni tawh kisai bawlni ding kiseel zeelzulna leh ka a man acitawh ani mah in bawl ung acitawh kibuai pih mahmah a hihman in hihthu tawh kisai in kamuhna leh kei sandan konggen nuam hi. Zomi Nationa Day-Zomi Nam Ni peen February 20 ni ta hia, Ahizong in Zomi ten hih nipeen kithupi saklo, ataktak in ei le ei mahmah zong kithupi sakthei naailo ihihman in pawlkhat ten mikim nipeending leh akinaai theipeen ni in bawl, Pawlkhat ten Company semte kimding ci in Weekend ni abawl, Pawlkhat leuleu ten animah ahi February 20 ni mah bawlpong sam in , Shusi zialmankhit peuh, Zumkah mankhit peuh tawh kituak ding zanlam peuh ah bawl haaihaai in Zomi National Day peen Zomi Nationa Night peuh suah Nigh Club khawng isuahloh ding thupi ding. Adiak in gampua lam a omten hih atung a bang zeelzuul in ibawl kheempeuh peen khatzong manlo ban ah iminam ni, Zomi mahmah ithupi sim kei hi. Zomi Nam Ni man taktak peen February 20 hidinga, ahunpeen Office Hour 8am-5pm hi hamtang ding hi. Febrruary 20 ni 8am-5pm kikaal in bawl in naseem te zong kaminamni hi ci in off ding, Shusi zong off ding, Zum kah te zong off ding , sangkah te zong off ding, akisap leh Zomi makaai ten kumpi tung ah laaikhia ding, Tuabang in ei Minam Ni eimah ithupiitsak ciang minamdang ten eithu ei la ongkanding, ongsin ding uhhi. Tuni ciang ciang gampua lam aom Zomi atamzaw ten Zomi Nam Ni peen misi nung leengkhawm bangciang lel in kizang cih kei muhna ahihi.

·      Bangladesh gam Dhaka khuapi pan tai 25 na Padma gunpi tung ah mi 100 apua gunkuang khat February 22, 2015   ni in kibung a naupang no akihel mi 41 si in adangteng si le naang in suakta liamliam uhhi.BBC

·      South Korea leh USA ten kumsim a neih den uh kipawlkhawm a gaaldo kisinna peen 2015 aiding March 2,2015 ni pan kipan ziahziah tading a, Vanlam, Leilam,Tuilam kithuahkhawm in kisin ding uhhi ci in February 24, 2015 ni in taangkokhia uhhi. Tutung a peen gaalkaap Tulsawm bangzah hiam kihelding a kumdang sang tamzaw ding ci uhhi. North Korea ten bel amau ato dan in ngaih sun pahpah uh ahihman na heh mahmah citciat uhhi.BBC

·      Syria gam akiu dawklam Tal Tamr khua kiim khuapaam khuaneu teng ah IS misok te February 24, 2015 ni in banluut in numei naupang kihel Christian biakna zui mi 90 man uhhi. Hih bang a agamtatna hang un Kurdish gaalkaap te leh US ten suulzuih pah uha, IS misol 12 viklum uh ci in Syria gam encik pawl in taangkokhia uhhi.CNN

·      Amau le amau ki ukna pan Ngapik gaalkaap te khutsung atung ahi Kokang gaalkap te Phualpi te February 23,24,2015 sung Ngapik lomtang in nasia tak in buluh uha, Kokang Nupi gaalkaap ten cimphawng in nagaal kap hiathiat ahihman in ninih vilvel abuluh uhhang luhzolo in        kilek kik bektham lo in azalian 3 si in 7 liam uhhi. Irrawady

Lungdam

Thang Khawm Pauzomi

Tulaai Leitung Thuthang Tuamtuam Updates Feb 20, 2015

·      Somalia gam Mogadishu khuapi sung a om Hotel khat al-Qaeda tetawh khutnuai al-Shabab migilo te in Feb 20,2015 ni in sim uha, alamdang mahmah  in mi 20 lian mah si se uhhi. Hih misi te lak ah Somalia gam mipi teel makaaipi pawlkhat zong kihel ci in gen uhhi.BBC

·      Libya gan khung kuui a on al-Qubbah khuapi sung   munnih ah February 20, 2015 ni in Bomb tang 3 puakkham a mi 40 si in adang 30 te naisia tak in liam uhhi. Libya gamsung aom IS migilo te Egypt ten vanlam tawh anuai  nahang in IS ten bomb apuah khapsak uhhi ci in IS ten gankhia uhhi.BBC

·      Australia gam Queensland leh atung lam teng Cyclone huihpi leh guahpi kituah in February 20, 2015 ni in nasiatak in nawk ahih man in Inn le lo tampi sia a pawlkhat te lauhuai luamahmah ahihman in kumpi thunei ten mundang ah nawnkhia uhhi. Mi bangzah si a bangzah mang cihte atelcian in kithei nailo hi. BBC

·      IS migilo te in Rome khuapi do nading in Libya gam ah gaalkaap kakaaikhawm saan uha, gitloh kisin teng mankhin le uh Rome khuapi doding ci in Online pan February 20, 2015 ni in taangkokhia uhhi hihthu hang in Italy kumpi thunei te in lamdung lamvaai ah gaalkaap 4,800 vaakkhia sak pah ziahziah in Rome khuapi daal kipanta uhhi.VOA

·      Thailand gamte gaalvanleeng F-16A khat thau tang ot dan kisin in alengzialzial kimlai February 20, 2015 ni in kia mawk in ahawlpa si hi. Thailand gamte in F-16A 50 nei uha, 1988 kum in khat kia, 2010 kum in khat kia in tutung a peen athumna ahihi.VOA

·      India Prime Minister Narendra Modi  in January kha,2015 kum President Obama India apai laaia apuan tungsilh silh peen kuan atampeen tawh leinuam ci in azuak ek leh Kham le Nung zuak mihau mahmah khat in $690,000 tawh leiding in February 20, 2015 ni in  kithukim uhhi. BBC

·      2014 kum sung Insurance neilo pipi  Tax refund siauh ciang nei aciteitei Innkuan 80,000 kimukhia ta a kikheelkik in hoih tak kigaampha ding ci in US kumpi te in February 20, 2015 Zomi Namni in taangkokhia uhhi. Tax File laaiding te  zuau nagen kei un sum naliau zaw un.abc

Lungdam

Thang Khawm Pauzomi