· Kawlgam-Thailand gamgi Tachileih khuapi ah September
17 ni nasiatak in guahzuvat ahihman in tuikhang a mi 3 tui in ataih ban ah
micimawh 10,000 vaal om in inn le lo tampi tui in tuumcip hi. Tuikhanna hang in
Thailand-Myanmar kikawmna leipi gamnih thukimna tawh September 18 ni in
kikhakcip phot hi.
· President Obama in IS migilo te dozia ding ageelna
Secretary of State John Kerry in September 17 ni in Congress ah pulaakhiatna
nei a atom in leitung gam 50 tawh vanlam pan zialding, Syria gamsung a te Syria
kumpi do a thautawi tapongte gaalvan kicingtak pia in gaaldozia sinsakding
tuakhit ciang IS zialsak ding ci hi. Tuaban ah Iraq gam a leuleu te peen Iraq
gamsung a IS te do thautawite panpihding ci in genkhia hi. HIh tawh kisai in
Hlutdaw pawlkhat phun nengnung pian uhhi. Ahizong in Syria gamsung a kumpi
langdo thautawi tapongte gaalvan kicingtak a huha gaalkaap zia sinsakding tawh
kisai in Parliament dawl nuainungte in September 17 ni in thukimna ngahkhin
uha, September 18, 2014 ni in Parliament dawl tungnung ah khensatna neiding
uhhi.
· China President Xi Jinping leh India Prime Minister
Narendra Modi te India gam New Delhi khuapi ah September 18, 2014 ni in
kimukhawm uha, nam 12 thukimna na suaikaai khawm uhhi. HIh thukimna sung ah athupi peenkhat in
ahihleh China te in India gamsung ah $20billion tawh sumbawl ding cih ahihi.
Tua ban ah gamnih kikaal gamgi buaina zong nasiatak kikum uha, daaitak leh
oltak in asawtlo in buaina teng vengding ci in anih un thukikup maciang
genkhawm uhhi.
· Australia gam thukante in Australia gammi AU sung
ateeng IS migilo makaai zalian khat in Australia gammi khatpeuhpeuh macip in IS
dialkhai tawh tuun in ngawntanding ci in AU gamsung aom IS nautaangte thupia hi
cih thu kumpi tung zasak uh ahihman in Sydney khuapi sung September 18, 2014 ni
phalvaakma in Palik thautawi 800 in nasiatak buluh ngeekngeek uha, mi 15
mankhia uhhi. IS lubawk ding a upmawh AU gammi Omarjan Azari kum 22 tuni in
thukhen zum ah thu kidongding a AU gamsung a IS gamtatsawmzia thukante muhkholh
zuau hilo ahihna ongkilangding hi ci in PM Tony Abbott genkhia hi.
· Africa gam sung ah Ebola natna lungno abeimang nading
ngimnatawh UN Security Council te in thukikupna September 18, 2014 ni in
neiding uhhi. Tuamun ah US thupuakluut zato pawlkhat lam in Siavuan hoihte leh
zatui zaha tawh nawhtak a delh kawikawiding cih mee tangtawh thukimna lading
uhhi. Hih natna abeinading in atawmpeen sum $1billion zatkuul ci in WHO te in
genkhia uhhi.
· Ukraine kumpi te leh Russia deih tapong tekikaal
kilemna abawlzawh uh kidona omkik in Ukraine gaalkaap 12 sikik ahihman in
Ukraine President Poroshenko in Russia gamgi a om Ukraine gaalkaap thauzangno
kaaikik ding in September 17 ni in thupia hi. President Poroshenko in US Congress
ah thugenna September 18, 2014 ni in nei a, tuama kha 4 laai a US ten sum $70
million tawh huhding acih asiik kawm in gaalkaap tha mahmahtawh onghuh un ciin
ngetbeh hi. Hih $70 million vaai ah avekpi in piakhia pahlo in $46 kipiaphot
ding a President Obama in tuzawh asawtlo in ongtaangko khiading ci in US
Congress a zaliankhat in Associate Press thukante kiang ah genkhia hi.
· Kum 300 vaal sung Britain (or) United Kingdom-UK
khutnuai ah nuamtak in akhuasa Scotland te gamtuamding huai maw huailo cih mipi
in mee tangtawh teelna September 18, 2014 ni in kipan ta hi. Tuciangciang
thuluang zia ah tuamdin huailo acilam meetang tamzaw pian ci in endik te in
pulaakkhia uhhi. Mipi 4.2 million in meetang piading uha, September 18, 2014
nitaak nai 10 ciang kikhak ding hi. Scotland gam tuamdinmaw dinglongding mee
kingahdaan September 19 niciang kitaangkokhia ding hi.
· IS migilo te in US gami 2, Britain mi 1 angawngtan
khitciang Britain te US te huh a Vanlamtawh IS te ongdo leh thatding ci a apu
laakkhiat uh thukan Alan Henning khitciang September 18, 2014 ni in Video khat
khah khia leuleu uha, Lingmaw color puan asilh Britain gammi thuthak kaaikhawm
John Cantlie thu genkhia sak uhhi. IS migilo te lim kimulo se a “ Banghang in
kei leh thukan dangte US leh Britain kumpi te ongpampaih sehiam” ci in thugen
sak uhhi.
· French President Francois Hollande in Iraq kumpi te in ongngetna tawh kizui in
Iraq gam a IS migilo te vanlamtawh azialding French gaalvaleengte kakuansak
ding ci in September 18, 2014 ni in pulaakhia hi. Ahizong in leilam donading
gaalkaap kapai sakkeiding hi ci in behlap hi. IS migilo phualteng telsinsen
takteh Beltung khiat kakipan pahding uha sawtnawkenteh ci in genbeh laai hi. US
te in tuniciangciang 170 vei Beltung khiatkhin ta uha, leitung gam 50 in panpih
in nasepna zong ahiciangkhat kineikhawm ci in US Secretary of state John Kerry
in September 17 ni in Congress ah pulaakhia hi.
· Iran gamte Nuclear vaai tawh kisai Leitung gamthahaat
gam 5 te in September 19 niciang Iran tawh nasiatak in kikupkhopna US gam ah
neikhawm ding uhhi. HIh mun ah thukikupna anuamzaw ding ci in US palaai te leh
Iran palaaite September 18, 2014 nikaai lam in Washington DC munkhat ah kihuau
ding uhhi.
Cipak ni ei
Nai 2 sung na ihmupak ning in nasep vakuan kik ning. Zingciang
kithu zakik ni maw guai. Khialhna aomkhaak aleh ngaihdam bawm ah maw
Thang Khawm Pauzomi
No comments:
Post a Comment