Wednesday, August 13, 2014

Tulaai leitung Thuthang Tuamtuam Updates August 14,2014



·      Pope Francis amasa peen Asia gam khualzin na kipanta a August 13, 2014 ni in South Korea gam tungta a, President Park Guen-Hye  in vanleengtual ah vadawn ngiat hi. Pope South Korea atunmadeuh minutes 35 asap lian in Satan omtheinawnlo a North Korea te zang in Rocket tang 3 South Korea gamlam ngat in lawnsuk uhhi. Pope Francis peen South Korea gam RC khangno te anntan pawi ah akah kawm in upna hang a 18,19th century hunlaai a south Korea mi 124 asite zahtaakna piakawm peenpeen gam hi a, mimal 5.4 million pha in gambup milip I 10.4% ahihi.

·      Brazil gamte in maailam ah President ding a angaihsut uh leh amuan mahmah uh ahi Mr Eduardo Campos kum 49 Sao Paulo state Santos khuapi azinlaaitak khuahun siatna hang in atuanna vanleeng August 13 ni in khuasung ah kia, atuanpih mi 4, vanleeng hawl 2 tawh si uhhi. President Dilma Rousseff in Brazil gam in supna lianpi ituak hi ci in dahna thu pulaakkhia hi.

·      Switzerland gam St Moritz khuapi ah August 13 ni in zanthapaai guahzu ahihman in men kicim a khualzinmi apua meileeng khat kibung hi. Kamphatna tawh asi omsamlo in mi 6 naakliam mahmah a adang 5 zong liampha simsim uhhi.

·      Israel leh Hamas te in nithum sung kilemna amankhit ciang ni 5 sung kilemna bawlto laaiding in langnih thukimna leh taangkokhiatna August 13 ni in nei uhhi. Ataangkokhit phet un Gaza pan Rocket pawlkhat Israel gamsung tu ahihman in Israel in zong vanlamtawh tawmvei zial uha, zanlam ciangbel daiphot tadih uhhi. Kilemna aomsuak theihnading in Egypt gam Cairo khuapi ah kihosuak ding uhhi.

·      Saudi Arabia gamte in Terrorist migilo te do nading akisam bang a zatding leh adiak in Iraq gam a migilo te nuainading in UN tekiang ah $500million August 13 ni in piakhia uha, UN General Secretary Mr Ban Ki Moon in khuttung ah ap uhhi.

·      Iraq gam saklam ah amau le amau ki uk tuam ahi Kurd minamte gamteng Islam migilo pawl in nasiatak do a agam uh asuhnapan Kurd minam gaalkaap ten alehdo zawhnading un galvan kicingtak in kahuhding uha, asawtlo nai 1,2 sung in kapuakding uhhi ci in French President Francois Hollande zumte in August 13 ni in taangkokhia uhhi.



Tusung tengpeen sunlan annzong nemanlo liang in nasepnei kahihman in thuthang zanlam ah aziakaai deuh in ongsuak ahihi. Hun awng neihsunsun ihmulo liang a konghanciam ahihman in alemdandan in ongsuakding a nongtheihsiam tek nading un kongthum hi.


Lungdam ei

Thang Khawm Pauzomi

No comments:

Post a Comment