Thursday, June 19, 2014

Tulaai Leitung Thuthang Tuamtuam Updates June 19,2014


·      Zomi khawmpi USA 2014 ah paiding in nakiging tahiam? Puan e leh naman lohnading aciapteh nopding na lei khinzo hiam? Mipi 5,000-10,000 kipha ding ahihman Puan kician le Shoes kician naneih kei leh mi ongsiklum khading hi.  Zomi Idol,Zolia &Taang kidemna, Zomi Innkuan USA Cup, Zomi Innkuan Concert, Zomi Forum leh Zomi Student Forum nasia tak in kineiding ahihman nakihel khaakloh ding pammaih mahmahi. Zomi te peen minau neuneu tetawh kibanglo in Bawhlung (Tukpeeng ) suiding nangawn Team 17 akimuang sinsen kipah a Music , Lasa ding peen asanuam, atumnuam kheempeuh saangleeng kumkhat a zong kimanlo ding ahihman asiamtata tengbek akiteng cimawk hi. Zomi Innkuan Kentucky pan zong Zolia,Idol leh Tukpeeng te ah akhatna ngahding in nasiatak kakiding khinzo uhhi. Tutung Zomi khawmpi peen nidang tawh kibanglo in Tui kihello Zomi sitset teng hitading ahihman in siangtho in kisuakta mahmah ding hi. Azenzen in Pawlpi, Mimal,Kipawlna te ah Zomi deihlo in Zomi khawmpi khawng ah Vanzuak doidoi nuam, Lasa nuam doidoi a kituul mawh mahmah Tuikihel miginalo pawlkhat kumdang in kimuthei zeel a, tutung in ki ngahnawnlo ding hi.  Azenzen in hihbang mi namuh a leh Zomi kheempeuh in thapia vetlo a nehpik sanding ahihi.


·      Malaysia gam Sepang khuakiang a gun sung ah Indonesia gam ah aciahding Permit neilo Indonesia mi 26 apau Guunkuang khat  June 19, 2014 ni in kibung leuleu a, mi 9 mangthang in mi 18 Malay kumpi thunei ten honkhia zo uhhi. June 18 ni in zong Banting-port Klang ah khat kibung a mi 10 si in 25 mangthang a, pawlkhat Immigration ten honkhiat leh mat thuah uhhi. Akihonkhia teng Immigration Law tawh leen uhhi. Muslim le khakhat anntan thunget naaita ahihman tuazang ding Malaysia gam a 0 tawh aom Indonesia mi te alomlom a aciah laaitak uh ahhi.

·       Pakistan gam khunglam Waziristan state sungteng a kibusa Taliban te leh gamdang Tapong pawlkhat Pakistan gaalkaap ten June 16 nipan Vanlam tawh nasia tak in azial ban ah Leilam ah Tanks,Gaalkaap tha tampi puak ahihman in mipi te in Inn le lo te nusia in gaaltaai uha, Kumpi geelsakna Camp sung a ann le tui khamzolo in mi  Aw 10 vaalbang cimawh in om uhhi. June 19, 2014 niciang hih gaaldona ah migilo 160 vaal kigozo ci in Pakistan kumpi te in genkhia uhhi.

·      Israel gaalkaap te in Hamas migilo te mat hiding a upmawh Israel tangvalno thumte West Bank kuam ah azonna pan June 19, 2014 ni in Palestinian mi 30 kiimding in nado uh ahihman in Tawlkhat sung Thautang kikhek uh a Palestinian mi 30 hingmat uhhi.

·      Iraq gam singnuai mi ISIS te leh Sunni Muslim thautawi te in Bagdad khuapi khung a om ahi Iraq gamsung a Sathau bawlna alianpeen ahi Baiji Refinery Innpi doding in neh uh ahihman in Iraq gaalkaap te zong ahihzawh zah un kiging khin uhhi. Iraq ten US tung Vanlam tawh huhding angetna tawh kisai in June 19, 2014 ni in President Obama in thusuah bawlding hi. Amin gennuam lo US Ulian khat genna ah US in Vanlam gaalhaang  100 leh Vanleeng 50 tawh hih Iraq gam a migilo te nuaipak ding geelna om ci in June 19, 2014 ni in genkhia hi.

·      Ukraine President Petro Poroshenko in  ongtungding June 27 niciang Europe gamte tawh nasepkhopding thukimna Suaikaai tading in ci in pulaakkhai ahihman Russia te in Ukraine gamgi dung ah Gaalkaap athuangthuang in behlap  uha  tu in 40,000 kiim omta ci in NATO in June 19, 2014 ni in taangkokhia hi.

·      Thu lamdang mahmah in Saudi Arabia Kumpi pa ahi King Abdullah June 20,2014 niciang Egypt gam ah teelthakna angah ahi President Abdel Fattah EL-SiSi thapiakna kawm in Egypt gam va ngaihhawhding hi ci in Saudi leh Egypt kumpi thuthang te in June 19, 2014 ni in taangkokhia ciat uhhi.

Lungdam

Thang Khawm Pauzomi

No comments:

Post a Comment