Thuthang Tuamtuam Updates

·      

Zomi te neihsun Party ahi ZCD party te in thupi khualtak in Kawlpi ZCD makaihna tawh Kawlpi ZCD zumpi ah May 28 ni in Kuki minam huu makaaipawl kimuhpih uha, Minam thu, gamthu tuamtuam nasiatak in kikum thei uhhi.

·      Rakhaing gamsung a om Bangali kala tapong te leh ngapik palik te Maungdaw khuanawl Bangladesh tawh gamgi ah May 28 ni in kikap nong uha, Sapadeeh te khat si hi ci in Kawlgam palik ten genkhia uhhi.

·      2008 Kawlgam pingpei thukhun pi sunglak pan 168 puahphat ding kamu uha, hiteng puahpha leeng Federal cihzong kipau theita ding ci in May 29, 2014 ni in taangkokhia uhhi. HIh 168 puahtheih nading a atawhtang a hi thukhun 436 peen Upper Paliament sehthum suah sehnih ahihkeh alangsaang atamzaw in athukim leh ki semthei bekding ahihi.

·      Ukraine gam nisuahna lam Russia deih migilo te ukna sung ahi Slovyansk khua kiang ah Ukraine gaal vanleeng khat tapong ten May 29, 2014 ni in kapkhiat sah uha, atung atuang gaalkaap bu khat leh nautnag 13 sihkhat in si uhhi.

·      Dawi havang kaal ah Egypt gam kiteelnapi na May 29, 2014 ni in zawhbawl taktak ta uha, Gaalkaap Maangpi lui Abdel-Fattah el-Sissi 93% tawh gambup kiteelna zawhcih tak mah in zogawp hi. Amah adem khat ahi Hamdeen Sabahi bang in 3% bek ngah hi.

·      Aw & Bil ngaihna leh Electronics company ahi Beats company Apple company te in $3bn tawh leiding in thuna leh khensatna May 29, 2014 ni in neitaktak ta uhhi. Beats company phuankhiate lak pan Jimmy Lovien leh Dr Dre te khawngpha kisa mahmah in nui piakpuak uha, Apple Boss Tim Cook inbel mailam saupi enkei uhteh maw cin amukmul nuul hiathiat lel hi.

·      Leitung Billionaire te lak ah khat ahi 2005 kum Manchester United Club Euro 790 million tawh aleigiap Mr Malcolm Glazer kum 85 in May 29, 2014 ni in a it mahmah azi leh atate 4 nusia in apa kiang ah ciahta hi.

·      March 8,2014 a amangthang Malaysia vanleeng MH370  peen tuma huntampi sung India tuipi sung ah agingkiza ci in azonzon uh himah leh, tua agingpeen Vanleeng pan hilo a Vanleeng omna mun kizong khanaailo hi ci in US Navy te in May 29, 2014 ni n gencianna nei uhhi.

·      Venezuela gamsung ah February kha pan kipan mipi lungphona kitatsat lo a kumpi lampan bangmah awlmawhna neilo in mipi 42 bang that khinta ahihman in khalna nasiatak piading in US kumpi ten May 29, 2014 ni in thukimna neita uhhi.

·      US president lui W.Bush leh UK Prime Minister lui Tony Blair  in Saddam Husein manding a akihona uh leh athukimna teng uh akikankhia ahi The Iraq Inquiry  kici laaibu May 29, 2014 ni in kihawm khia tading a athusim zawdeuh te bel kihel loding hi ci in UK kumpi ten taangkokhia uhhi.

·      Central African Republic gam Bangui khuapi ah  Muslim te biak inn pi khat May 29, 2014 ni n Christian te in haaltumsak uhhi. Mun dang a I guallelh banglo in CAR ah bel I Christian mipih ten a gual heu mahmah dan uh hi ei guai

·      Nigeria gam sung ah sangnau pang numeino 200 vaal gumang in US,AU te in Migilo nam a akoih uh Boko Haram tapong te in May 28 ni in Gurmushi khuaneu ah mi 42 that leuleu uh ahihman in President Goodluck Jonathan in hih mite nasiatak docip ding in May 29, 2014 ni in kiciamna muanhuai nei hi.

·      India gam Uttar Pradesh state khuata kiang khat ah numeino nih kum 14,15 te singkung tung ah kikhailum sa in May 29 ni in Palik ten mu uhhhi. Palik te genna ah akibuan khitciang kikhai uh hia, hih numeino nihte peen tuma nithum laaipan mimang a kiciamteh hi ci in genkhia uhhi.

Lungdam ei

Thang Khawm Pau Zomi